Numere

³¹Mme Moshe a re: Ke a o rapela, o se ke wa re tlohela, hobane o tseba moo re tla emisa teng feelleng, mme o tla ba mahlo a rona. ³²Ha o etla le rona, molemo ofe le ofe oo Jehova a tla re etsetsa wona, le rona re tla o etsetsa wona. ³³Ba tloha thabeng ya Jehova; ba tsamaya ka matsatsi a mararo; mme areka ya selekane sa Jehova ya ba etella pele sebaka sa matsatsi a mararo, e ba batlele moo ba tla phomola teng. ³⁴Enere ha ba tloha moo ba neng ba emisitse teng, leru la Jehova le ne le le hodima bona motshehare. ³⁵Ha areka e ne e tloha, Moshe o ne a re: Raoha, Jehova; dira tsa hao a di ke di qhalwe! mme ba o hloileng, a ba ke ba balehe pela sefahleho sa hao! ³⁶Mme ha areka e ne e ema, o ne a re: Jehova, kgutlela diketeketeng tsa dikete tsa Iseraele!