Numere

¹⁷Moshe a ba roma ho ya hlwela naha ya Kanana, a re ho bona; Le kene ho yona ka nqa borwa, mme le hlwelle dithabeng, ¹⁸mme le tla bona seo naha e leng sona, le bone hore na batho ba ahileng ho yona ba matla, kapa ba fokola; kapa ha ba bakae, kapa ba bangata; ¹⁹le bone hore na naha eo ba ahileng ho yona e ntle, kapa e mpe; le bone hore na metse eo ba ahileng ho yona kapa ke diqhobosheane, kapa ke meqheme; ²⁰le mobu ke o jwang, kapa ke o nonneng, kapa ke o otileng; kapa difate di teng, kapa ha di yo. Ipheng matla, mme le nke ditholwana tse ding tsa naha eo. Mohlang oo, e ne e se e le nako ya dithakangwaha tsa morara. ²¹Yaba ba ya, mme ba hlwela naha ho tloha lefeelleng la Tsine ho isa Rehobe, tseleng ya Hamathe. ²²Ba kena ka nqa borwa, ba fihla Hebrone, moo ho neng ho ahile bana ba Anake, boAkimane, Sheshai, le Talmai. Hebrone o ne a hahilwe dilemo tse supileng, motse wa Tsoane wa Egepeta, o eso ho be teng. ²³Ba tswela pele, ba ba ba fihla sekgutlong sa Eshkole; teng ba ekga lekala le nang le lesihla le le leng feela la morara, mme ba babedi ba le jara ka sefate; hape ba ekga digaranata le difeiye.