Numere

³⁵Nna, Jehova, ke buile; ke tla fela ke etse jwalo phutheho ena yohle e mpe, e mpokanetseng ho ntwantsha; ba tla fella lefeelleng lena; ba tla hle ba timelle teng. ³⁶Banna bao Moshe a neng a ba romile ho ya hlwela naha, bao ho kgutleng ha bona ba neng ba dumadumisitse phutheho yohle ka Jehova ka ho nyefola naha, ³⁷banna bao ba neng ba nyatsitse naha, ba eshwa pela sefahleho sa Jehova ka lefu la sewa. ³⁸Ho banna ba neng ba ile ho hlwela naha, ha phela Joshua, mora Nune, le Kalebe, mora Jefunne feela. ³⁹Moshe a phetela bana ba Iseraele bohle ditaba tseo kaofela, mme setjhaba sa hlomoha haholo. ⁴⁰Ba tsoha e sa le ka meso, ba hlwela nqa qhoweng ya thaba, ba re: Ke rona bana; re tla nyolohela lefatsheng le boletsweng ke Jehova, hobane re sitilwe. ⁴¹Yaba Moshe o re: Na ke ka baka lang ha le tlola taelo ya Jehova jwalo? Hona hoo ho ke ke ha le fetohela molemo.