Numere

⁹Ka tsatsi la Sabatha, le tla hlaba konyana tse tona tse pedi tse lemo se le seng, tse se nang sekodi; le tla hlahisa nyehelo ya boshome ba bobedi ba efa ya lefi la phofo le dubilweng ka ole, le yona tshelo ya yona. ¹⁰Ke sona setjheso sa Sabatha, sa Sabatha e nngwe le e nngwe, kantle ho setjheso sa kamehla le tshelo ya sona. ¹¹Qalong ya dikgwedi tsa lona, le tla hlahisetsa Jehova setjheso sa dipohwana tse pedi, le pheleu e le nngwe, le dikonyana tse tona tse supileng tse lemo se le seng, tse se nang sekodi; ¹²le nyehelo ya pohwana e nngwe le e nngwe, e leng karolo tse tharo tsa boshome ba lefi la phofo le dubilweng ka ole; ¹³le nyehelo ya pheleu, e leng karolo tse pedi tsa boshome ba lefi la phofo le dubilweng ka ole; le nyehelo ya konyana e nngwe le e nngwe, e leng karolo e le nngwe ya boshome ba lefi la phofo le dubilweng ka ole. Ke setjheso, ke sehlabelo se tjheswang ka mollo, se monko o monate ho Jehova. ¹⁴Ditshelo e tla ba halofo ya hine ka pohwana; le karolo ya boraro ya hine ka pheleu; le karolo ya bone ya hine ka konyana. Ke sona setjheso sa qalo ya kgwedi, sa kgwedi e nngwe le e nngwe, sa dikgwedi tsohle tsa selemo. ¹⁵Ho tla hlabelwa Jehova phooko, e be sehlabelo sa sebe, kantle ho setjheso sa kamehla le tshelo ya sona.