Numere

⁷ha monna wa hae, mohla a utlwang tseo, a ikgutsetsa pela hae ka lona tsatsi leo a di utlwileng ka lona, boikano ba hae bo tla tiya, le tseo a itlamileng ka tsona di tla tiya; ⁸empa ha monna a mo nyatsa ka tsatsi leo a di utlwileng, o tla fedisa boikano boo a bo entseng, le lentswe le phonyohileng molomong wa hae leo a itlamileng ka lona; mme Jehova o tla mo tshwarela. ⁹Boikano ba mosadi wa mohlolohadi, kapa ba ya hladilweng, le tsohle tseo a itlamileng ka tsona, di tla tiya bakeng sa hae. ¹⁰Ha ekaba mosadi ya seng a le tlung ya monna wa hae a ikana, kapa a itlama ka kano, ¹¹monna wa hae, mohla a utlwang tseo, ha a ikgutsetsa pela hae, a sa mo nyatse, maikano wohle a hae a tla tiya, le tsohle tseo a itlamileng ka tsona, di tla tiya. ¹²Empa ha monna wa hae a di fedisa ka tsatsi leo a di utlwileng ka lona, tsohle tseo a ikanneng ka tsona le tseo a itlamileng ka tsona, e tla ba tse sa tiyang, hobane monna wa hae o di fedisitse; mme Jehova o tla mo tshwarela. ¹³Boitlamo bofe le bofe, kapa boikano bofe le bofe boo mosadi wa hae a itlamileng ka bona ho hlomola moya wa hae, monna wa hae a ka nna a bo tiisa, kapa a bo fedisa.