Numere

¹⁵A re ho bona: Na le tloheletseng basadi kaofela hore ba phele? Ha ke re, ke bona, ka ho latela keletso ya Balaame, ba kgopisitseng bana ba Iseraele hore ba kwenehele Jehova ka taba ya Baale-Peore, ¹⁶sewa sa ba sa wela hodima phutheho ya Jehova? ¹⁷Jwale, bolayang ba batona kaofela ba hara bana, le bolaye mosadi e mong le e mong ya kileng a tsebana le monna diphateng; ¹⁸le mpe le ipolokele barwetsana bohle ba pholohileng ba sa kang ba tseba malao a monna. ¹⁹Haele lona, salang ka ntle ho diahelo ka matsatsi a supileng; bohle ba ho lona ba bolaileng motho le bohle ba amileng setopo, ba tle ba itlhatswe ka la boraro le ka la bosupa, bona hammoho le batshwaruwa ba bona. ²⁰Hape le tla hlatswa diaparo kaofela le dintho tsohle tsa letlalo, le tse entsweng ka boya ba dipodi, le dijana tsa mahong. ²¹Moprista Eleasare a bolella bahlanka ba neng ba ile ntweng, a re: Se laetsweng ke Jehova ka molao o neilweng Moshe ke sena: