Numere

²⁹Le tla di nka lefohlong la bona, mme o tla di nea moprista Eleasare ka mokgwa wa nyehelo e etsetswang Jehova. ³⁰Karolong ya bana ba Iseraele, o tla nka e nngwe ho tse mashome a mahlano, leha e le bathong, leha e le dikgomong, le dieseleng, le dikgutshwanyaneng, le diphoofolong tsohle, mme o tla di nea Balevi ba lebelang tabernakele ya Jehova. ³¹Moshe le moprista Eleasare ba etsa tsohle tseo Jehova a di laetseng Moshe. ³²Haele kgapo, kantle ho dintho tse neng di nkilwe ke ba neng ba ile ntweng, e ne e le dikgutshwane tse dikete tse makgolo a tsheletseng a nang le mashome a supileng a metso e mehlano; ³³le dikgomo tse dikete tse mashome a supileng a metso e mmedi; ³⁴le diesele tse dikete tse mashome a tsheletseng a motso o mong; ³⁵le batho ba dikete tse mashome a mararo a metso e mmedi, ke ho re ba batshehadi ba neng ba eso ho tsebe malao a monna.