Numere

³Yaba Moshe o bua le setjhaba, a re: Hlomellang banna ba lona ba ka yang ntweng, ba futuhele Bamidiane, hore ba phethe phetetso ya Jehova hodima Bamidiane. ⁴Le tla romela ntweng banna ba sekete ka leloko le leng le le leng ho meloko yohle ya Iseraele. ⁵Yaba hara diketekete tsa Iseraele ho kgethwa banna ba sekete ka leloko le leng le le leng; ke ho re, ha tswa banna ba dikete tse leshome le metso e mmedi ba hlometseng. ⁶Moshe a romela banna bao ntweng, e le ba sekete ka leloko le leng le le leng, a romela le bona ntweng mora wa moprista Eleasare, Finease, a jere dintho tse kgethehileng le diterompeta tse mantswe a phepa. ⁷Ba futuhela Bamidiane ka taelo eo Jehova a e neileng Moshe, mme ba bolaya ba batona kaofela. ⁸Ba bolaya marena a Midiane; boEvi, le Rekeme, le Tsure, le Hure, le Reba, marena a mahlano a Midiane, le yena Balaame, mora Beore, ba mmolaya ka lerumo. ⁹Bana ba Iseraele ba hapa basadi ba Bamidiane le bana ba bona, mme ba hapa makgomo a bona kaofela, le mehlape ya bona kaofela, le maruo wohle a bona.