Numere

¹Ke ana maeto a bana ba Iseraele haesale ba etswa naheng ya Egepeta, ka makgotla a bona a neng a tsamaiswa ke Moshe le Aarone. ²Moshe a ngola maeto a bona ho tloha nqalong e nngwe ho isa ho e nngwe ka taelo ya Jehova. Ke ana maeto a bona, kamoo ba tsamaileng kateng: ³Ba tloha Ramsese ka kgwedi ya pele, ka tsatsi la leshome le metso e mehlano la kgwedi ya pele. Ka tsatsi le hlahlamang la Paseka, bana ba Iseraele ba tswa ka matla pontsheng ya Baegepeta kaofela, ⁴ha Baegepeta ba ntse ba epela matsibolo wohle, ao Jehova a a bolaileng hara bona, mohla Jehova a neng a hlahise dikahlolo hodima medimo ya bona. ⁵Bana ba Iseraele ba tloha Ramsese, ba emisa Sukkothe. ⁶Ba tloha Sukkothe, ba emisa Ethame, pheletsong ya lefeella.