Numere

¹⁵Metse eo e tsheletseng e tla ba ditshabelo ho bana ba Iseraele le ho motho wa ditjhaba, le ho motho ya jakileng hara lona; hore e mong le e mong ya bolaileng motho e seng ka boomo, a tle a balehele teng. ¹⁶Ha motho a otla ngwanabo ka ntho ya tshepe, mme a eshwa, ke mmolai; mmolai a otlwe ka ho bolawa. ¹⁷Ha a mo otla ka lejwe leo a le tshwereng ka letsoho, le ka bolayang motho, mme a eshwa, ke mmolai; mmolai a otlwe ka ho bolawa. ¹⁸Ha a mo otla ka ntho ya lehong eo a e tshwereng ka letsoho, le ka bolayang motho, mme a eshwa, ke mmolai; mmolai a otlwe ka ho bolawa. ¹⁹Mophetetsi wa madi o tla bolaya mmolai; mohla a teanang le yena, o tla mmolaya. ²⁰Ha motho a dihela ngwanabo ka baka la hloyo, kapa ha a mo betsa ka ntho e nngwe ka boomo, mme a eshwa; ²¹kapa ha a mo otla ka letsoho, ka bora, mme a eshwa, ya otlileng o tla otlwa ka ho bolawa, hobane ke mmolai; mophetetsi wa madi o tla bolaya mmolai, mohla a teanang le yena.