Numere

²a re: Lefeng leo ba tlang ho le rua, laela bana ba Iseraele ho nea Balevi metse eo ba ka ahang ho yona. Hape le tla nea Balevi naha e teelang metse eo hare. ³Ba tla rua metse ho aha teng, le naha e pela yona, e tla ba ya makgomo a bona, le ya dintho tsa bona, le ya diphoofolo tsohle tsa bona. ⁴Naha e pela metse eo le tla e nea Balevi, e be le bophara ba ditswe tse sekete se le seng, ho tloha lerakong la motse ho isa moeding wa yona ka nqa tsohle. ⁵Le tla lekanya kantle ho motse ditswe tse dikete tse pedi ka nqa botjhabela, le ditswe tse kete tse pedi ka nqa borwa, le ditswe tse kete tse pedi ka nqa bophirimela, le ditswe tse kete tse pedi ka nqa leboya. Motse o tla ba kahare. Naha e teelang metse ya bona hare e tla ba jwalo. ⁶Metse eo le tlang ho e nea Balevi, e tla ba metse e tsheletseng ya setshabelo, moo mmolai a ka balehelang teng, le be le eketse ka metse e meng e mashome a mane a metso e mmedi. ⁷Metse yohle eo le tla e nea Balevi e tla ba e mashome a mane a metso e robileng meno e le mmedi le naha e e teelang hare. ⁸Bakeng sa metse eo, le tla e nka mafeng a bana ba Iseraele; ba nang le metse e mengata, ba tla nea e mengata, empa ba nang le metse e seng mekae ba tla nea e seng mekae; e mong le e mong o tla nea Balevi metse ya hae ka palo e lekaneng le lefa leo a tlang ho le rua.