Numere

²²Empa ha motho a tshoha a otla ngwanabo, e seng ka bora; kapa ha a mo betsa ka ntho e nngwe, a sa etse ka boomo; ²³kapa ha a dihetse lejwe le ka mmolayang hodima hae a sa mmone, mme a eshwa, a sa mo hloya, a sa mo otse, ²⁴ke ena melao eo phutheho e tla ahloha ka yona mahareng a motho ya otlileng le mophetetsi wa madi: ²⁵Phutheho e tla lokolla mmolai matsohong a mophetetsi wa madi, mme e tla mo kgutlisetsa motseng wa setshabelo oo a neng a balehetse ho wona. O tla aha teng, ho be ho shwe moprista e moholo ya bileng a tlotswa ka ole e kgethehileng. ²⁶Ha mmolai a ka tswela kantle ho moedi wa motse wa setshabelo, oo a balehetseng ho wona, ²⁷mme ha mophetetsi wa madi a teana le yena kantle ho moedi wa motse wa setshabelo, ha a ka bolaya mmolai, a ke ke a ba le molato wa polao; ²⁸hobane mmolai o ne a tshwanetse ho dula motseng wa hae wa setshabelo, ho be ho shwe moprista e moholo; empa etlare ha moprista e moholo a se a shwele, o tla kgutlela lefeng la hae.