Numere

²⁶Ha mmolai a ka tswela kantle ho moedi wa motse wa setshabelo, oo a balehetseng ho wona, ²⁷mme ha mophetetsi wa madi a teana le yena kantle ho moedi wa motse wa setshabelo, ha a ka bolaya mmolai, a ke ke a ba le molato wa polao; ²⁸hobane mmolai o ne a tshwanetse ho dula motseng wa hae wa setshabelo, ho be ho shwe moprista e moholo; empa etlare ha moprista e moholo a se a shwele, o tla kgutlela lefeng la hae. ²⁹Hoo e tla ba ho lona le ho ditloholo tsa lona taelo e le tlamang hohle moo le tlang ho aha teng. ³⁰Ha motho a bolaya e mong, bophelo ba mmolai bo tla kgaolwa ka baka la polelo ya dipaki. Paki e le nngwe e ke ke ya lekana hore motho a ahlolelwe lefu. ³¹Le ke ke la amohela topollo bakeng sa bophelo ba mmolai ya tshwanetseng ho bolawa, hobane ruri o tshwanetse ho bolawa. ³²Le ke ke la amohela topollo ho mmolai ya balehetseng motseng wa hae wa setshabelo, a tle a kgutlele naheng ya hae ho aha teng, ha moprista a eso ho shwe.