Numere

³⁹ho qala ka ba dilemo tse mashome a mararo, ho isa ho ba dilemo tse mashome a mahlano, bohle ba kenang tshebetsong ya tente ya pokano, ⁴⁰ba ngodilweng ka matlo a bona le ka matlo a bontata bona, ya eba dikete tse pedi tse nang le makgolo a tsheletseng a mashome a mararo. ⁴¹Ke bona bao ba ngodilweng ba matlo a bara ba Gershone, bohle ba sebetsang tenteng ya pokano, e leng bao Moshe le Aarone ba ba ngodileng ka taelo ya Jehova. ⁴²Haele ba matlo a bara ba Merari, ba ngodilweng ka matlo a bona le ka matlo a bontata bona, ⁴³ho qala ka ba dilemo tse mashome a mararo, ho isa ho ba dilemo tse mashome a mahlano, bohle ba kenang tshebetsong ya tente ya pokano, ⁴⁴ba ngodilweng ba bona ka matlo a bona le ka matlo a bontata bona, ya eba kete tse tharo tse nang le makgolo a mabedi. ⁴⁵Ke bona bao ba ngodilweng ba matlo a bara ba Merari, bao Moshe le Aarone ba ba ngodileng ka taelo eo Jehova a e neileng Moshe.