1 Nali ilizwi *likaNdikhoyo elafikela uMika waseMoreshete ngemihla kaJotam noAhazi noHezekiya, ookumkani bakwaJuda, awalibonayo ngokusingisele kwiSamariya neJerusalem:
2 Yivani, nina nonke zizwe;phulaphulani, mhlaba nabo bonke abemiyo kuwo.*UNdikhoyo uSomandla unika ubungqina ngawe;yena uthetha esendlwini yakhe engcwele.
3 Nanko ephuma ekhayeni lakhe;ewe, nanko esiza ehamba ezindaweni eziphakamileyo.
4 Uya kunyathela iintaba zitsho zinyibilike,zibe ngathi ngumthwebeba emlilweni.Uya kunyathela iintili zitsho zimke,kube ngathi kuhl' iimpuphuma zamanzi ethambekeni –
5 nto leyo ihla ngenxa yobugwenxa bukaYakobi;ewe, le nto ingenxa yesono sendlu kaSirayeli.Bubugwenxa buni obu bukaYakobi? AsingoSamariya na?Yiyiphi indawo ephakamileyo yokukhonza *izithixo kwaJuda? AsiyoJerusalem na?
6 “Ngoko ke iSamariya ndoyitsho ibe yimbuqe,ibe yintili yokutyala isidiliya.Loo matye ayo ndowaphosa entilini,iziseko zayo zisale zize.
7 Imifanekiso eqingqiweyo yezithixo zakhona yoba ziingceba;iminikelo kwindlu yokunqula yotshiswa ngomlilo.Ndoyitshabalalisa imifanekiso yezithixo.Kaloku izuzwe ngobuhenyu;yophinda ke ibuyele kwakubuhenyu bengqesho.”
8 Ngesi ke isizathu ndobhomboloza ndikhale;ndohamba ndinganxibanga zihlangu, ndizé,nditsho ngomkhulungwane ngathi ngudyakalashe,ndigqumshele ngathi yinciniba.
9 Kaloku inxeba leSamariya alinyangeki,ngoku selisosulela noJuda lo.Selikumasango abantu bam;ewe, kwiJerusalem ngenkqu.
10 Le nto ze ningayibiki eGati;ze ningakhe nigixe konke-konke.Ze nizibhuqa-bhuqe eluthulini eBhete-leafra.
11 Dlulani nihamba zé nilihlazo, nina bemi baseShafire.AbaseZanan abacingi baphume.IBhete-ezele ikwinzilo;akukho ndawo isondele kuyo yokuzikhusela.
12 AbaseMaroti bayapena-pena ziintlungu,belangazelela okulungileyo,kuba isithwakumbe sivele *kuNdikhoyo,sathi gaxa kumasango eJerusalem.
13 Nina bemi baseLakishe, bophelan' amahash' enqwelweni.Yaba nini abangcamli besono,neZiyon nayikhokelela kwakuso;ubugwenxa bukaSirayeli bufunyenwe kuni.
14 Nangoku nab' izipho zokwahlukana,ninikezele kwiMoresheti yaseGati.IAkezibhi yona ngumkhohlisi;ibagqibile ookumkani bakwaSirayeli.
15 Ke nina, bemi baseMaresha, ndiya kunizisela oya kunidla ilifa.Yena lowo usisidima sikaSirayeli uza kufika eAdulam.
16 Zilani nigugule nitsho ngeenkqayi ngenxa yabantwana enibathandayo.Chengezelisani ngeempandla ngathi lixhalanga;kaloku baza kuthathwa basiwe ekuthinjweni.