1 Toe het ek saam met die man teruggeloop na die ingang aan die oostekant van die huis van die Here.
2 Die volgende oomblik het die Here daar aan ons verskyn. Uit die oostekant uit het die God van my volk Hom op ’n spesiale manier aan ons bekendgemaak. Toe die Here praat, het dit geklink soos groot riviere wat oor hulle walle stroom. Hy het soos ’n helder lig, soos die son, geskyn. Alles was verlig rondom ons.
3 Wat ek hier van Hom gesien het, was dieselfde as daardie dag toe Hy my die opdrag gegee het om aan te kondig dat Jerusalem verwoes gaan word. Dit was ook dieselfde as wat ek langs die Kebarrivier gesien het. Ek het op my gesig voor die Here neergeval.
4 Toe het die Here deur die oostelike ingang in sy huis ingegaan.
5 Dit was of die Gees van die Here my optel en my saamvat. Die volgende oomblik het ek in die voorste deel van die huis van die Here gestaan. Die hele huis was vol van die Here se teenwoordigheid.
6 Die man wat die huis van die Here gemeet het, het langs my gestaan. Toe hoor ek Iemand praat met my. Dit was die Here self.
7 Hy het vir my gesê: “Mens, hierdie huis is waar Ek bly. Ek sit hier en regeer oor die aarde. Hier sal Ek altyd teenwoordig wees tussen die Israeliete. Hierdie volk en die mense wat oor hulle regeer, sal nie weer slegte dade pleeg nie. Hulle sal nie meer voor afgode buig nie. En hulle sal ook nie weer hulle konings hier in my huis begrawe ná hulle dood en dan nog vir hulle grafstene in my huis oprig nie.
8 Die konings was so verwaand dat hulle hulle blyplek reg langs my huis gebou het. Daar was net ’n muur tussen my huis en hulle huis. En dan het hulle die afskuwelikste dinge gedoen hier reg voor My! Daarom het Ek vir hulle kwaad geword en hulle gestraf. Nou bestaan hulle nie meer nie. Ek het hulle vernietig.
9 As hierdie volk ophou om voor afgode te buig en hulle vat al die lyke van hulle konings uit my huis uit, sal Ek weer tussen hulle woon.
10 “Gaan vertel vir jou volk hoe die huis van die Here lyk. Dalk kry die volk skaam as hulle hoor hoe sleg dit hier in my huis gaan. Wys hulle op ’n plan van die huis van die Here hoe dit hier lyk.
11 En as hulle dan skaam kry, vertel hulle hoe Ek my huis wil laat lyk. Vertel hulle van die ingange en uitgange van die gebou en die kamers en alles wat Ek hier wil doen. Skryf dit alles op sodat hulle nie sal vergeet nie. Hulle moet die binnekant van die huis van die Here leer ken en weet hoe ’n mens moet optree as jy in my huis kom. Hulle moet doen wat Ek hulle beveel.
12 Wat hulle moet weet, is dat die hele area waar my huis staan, op die top van die berg en die gebied daar rondom, opsy gesit is vir spesiale diens aan My. Daar mag ’n mens slegs met die dinge van die Here besig wees.”
13 So lyk die altaar. Rondom die altaar was ’n voor waarin water kon wegloop. Hierdie voor was ’n halwe meter diep en net so breed. Sy rand rondom was ’n kwart meter breed.
14 Die altaar was van die voor af na die onderste vlak ’n meter hoog. Hierdie onderste vlak was ’n halwe meter wyer as die volgende vlak. Van die onderste na die boonste vlak was die hoogte twee meter. Die heel boonste vlak was ’n halwe meter wyer as die plek waar vuur gemaak word.
15 Die plek waar vuur gemaak word, is twee meter hoog. Op die vier hoeke was daar punte wat soos ’n bees se horings gelyk het en boontoe gewys het.
16 Die plek waar die vuur gemaak word, is vierkantig en was ses meter in deursnee.
17 Die heel boonste vlak was ook vierkantig, sewe meter in deursnee. Die voor wat die water weglei, het ’n rand wat ’n kwart meter breed is en ’n halwe meter diep. Die trap waarteen ’n mens opklim na die altaar, is aan die oostekant daarvan.
18 Toe sê die man met die liniaal vir my: “Mens, die Here my God sê dat jy vir die volk moet sê die dag as hierdie altaar klaar gebou is, moet die mense wat in my huis werk, ’n bul daarop offer vir al die slegte dade wat hulle gedoen het.
19 Net hierdie mense, die kleinkinders van Sadok, mag by die altaar kom. Net hulle mag hier werk, sê die Here, Esegiël se God.
20 Hulle moet van die bul se bloed vat en aan die vier horings van die altaar smeer. Ook aan die vier hoeke van die boonste vlak van die altaar moet jy bloed smeer, en teen die sykante daarvan reg rondom. So maak jy die altaar skoon en mag jy daarop offers vir My bring.
21 As jy klaar is hiermee, moet jy die bul verbrand. Daar is ’n spesiale plek hiervoor buitekant my huis.
22 Die volgende dag moet jy ’n bokram wat nie sieklik of gebreklik is nie, offer vir die slegte dade wat julle gedoen het. Dan moet jy weer die bloed aan die altaar smeer net soos die vorige dag.
23 As jy klaar is hiermee, moet jy ’n bul en ’n ram as offers bring. Hulle mag nie gebreklik wees nie.
24 Die mense wat hier werk, moet sout op die vleis gooi. Dan moet hulle dit voor My offer.
25 So moet jy sewe dae lank elke dag ’n bok- en ’n skaapram verbrand vir die slegte dade wat julle gedoen het. Hulle mag nie gebreklik wees nie.
26 Sewe dae lank moet jy dit doen sodat die altaar daarna gereed kan wees om in my huis gebruik te word. Hierdie altaar mag slegs vir diens aan My gebruik word.
27 Hierna, van die agtste dag af, mag die mense wat hier werk, ook ander offers bring. Ek sal dan julle offers aanvaar,” sê die Here, die God van Esegiël.