1 Kronikak

David, Juda eta Israelgo errege

¹Israeldar guztiak Hebronen bildu ziren Davidengana eta esan zioten: «Zeure odolekoak gaituzu gu ere. ²Lehendik, Saul errege zelarik, zeuk zenituen Israelen joan-etorriak gidatzen. Jaunak, zeure Jainkoak, esana dizu: “Zeuk gidatuko duzu ene herri Israel, eta zeu izanen zara ene herri Israelen agintari”». ³Etorri ziren, bada, israeldarren buruzagi guztiak Hebronera David erregeagana, eta honek hitzarmena egin zuen haiekin han, Jaunaren aurrean. Haiek Israelgo errege gantzutu zuten David, Jaunak Samuelen bidez esana zuen bezala.

David Jerusalemez jabetu

⁴Davidek, israeldar guztiekin, Jerusalemerantz jo zuen, hau da, Jebusera; lurralde hartan bizi ziren jebustarrak. ⁵Hauek esan zioten Davidi: «Ez haiz hona sartuko».Hala ere, jabetu zen David Siongo gotorlekuaz, gerora «Daviden Hiri» deituko zenaz. ⁶Esana zuen Davidek: «Jebustar bat hil dezan lehenengoa buruzagi eta gudalburu eginen dut». Tzeruiaren seme Joab izan zen lehenengoa erasotzen; horregatik, erregeak bera egin zuen buruzagi. ⁷David gotorleku hartan gelditu zen bizitzen; horregatik, «Daviden Hiri» deitu zuten. ⁸Inguru guztian hiria eraiki zuen, Milo deritzan lubetatik barnerantz; bitartean, Joabek hiriko beste alderdiak berriztatu zituen. ⁹David geroz eta indartsuago egiten ari zen, eta berekin zuen Jaun ahalguztiduna.

Daviden gudariak

¹⁰Hona hemen Davidi, bere erregealdian, israeldar guztiekin batera, lagundu zioten buruzagi adoretsuak; hauek ahalegindu ziren David errege izan zedin, Jaunak Israeli esan bezala. ¹¹Hona hemen Daviden gudari adoretsu haien izenak: Jaxobeam, hakmondarra, hiru ausarten buruzagia. Behin batez, hirurehun gizonen kontra astindu zuen bere lantza, eta denak hil zituen. ¹²Honen ondoren, Eleazar, Dodo ahohitarraren semea, hiru gudari haietakoa. ¹³Davidekin zen hau Pas-Damimen, filistearrak borrokarako bildu zirenean. Jendeak ihes egin zuen filistearrengandik. Bazen han garagar-sail bat eta ¹⁴Eleazarrek eta bere gizonek, sailaren erdian tinko, defendatu egin zuten, filistearrak hilez. Garaipen handia lortu zuen Jaunak. ¹⁵Beste batean, hogeita hamarren taldeko hiru buruzagi haitzartera jaitsi ziren Davidengana, Adulamgo leizera. Filistearrak refatarren haranean zeuden kanpatuak. ¹⁶David, berriz, bere babeslekuan zegoen; filistearrek gudari-talde bat zuten Belenen. ¹⁷Davidek gogo hau adierazi zuen: «Norbaitek, Belengo atean dagoen urtegitik ura ekarriko balit edateko… !» ¹⁸Hiru haiek, filistearren gudari-tokira sartu, Belengo atean dagoen urtegitik ura atera eta Davidi eraman zioten. Davidek, ordea, ez zuen edan nahi izan, eta isuri egin zuen Jaunarentzako eskaintza bezala. ¹⁹Hau esan zuen: «Libra nazala ene Jaunak ur hau edatetik! Bizia arriskatu duten gizon horien odola edatea izango litzateke, bizia arriskatu baitute ur hau ekartzeko». Eta ez zuen edan nahi izan.Hauxe egin zuten gudari adoretsu haiek. ²⁰Joaben anaia Abixai zen hogeita hamarren buruzagia. Hirurehunen kontra astindu zuen honek bere lantza eta hil egin zituen. Horregatik, izen handia hartu zuen hiru gudarien artean. ²¹Hogeita hamarrak baino bi bider ospetsuago izan zen eta denen buruzagi. Hala ere, ez zen hiru haiek adinakoa izan. ²²Joiadaren seme Benaias gizon kementsua zen eta egintza bikain asko egina. Kabtzeelgoa zen. Hark hil zituen lehoiak bezain ausart ziren bi moabdarrak. Elurra ari zuen batean, urtegira jaitsi eta lehoia hil zuen bertan. ²³Berak hil zuen bi metro eta erdiko egiptoar erraldoi bat ere. Ehuleen ardatza zirudien lantza zeraman egiptoarrak eskuan; Benaiasek, berriz, makila besterik ez zekarren. Honek lantza eskutik kendu eta berarekin hil zuen egiptoarra. ²⁴Horra, bada, zer egin zuen Joiadaren seme Benaiasek; horregatik, izen handia zuen hiru gudari adoretsuen artean. ²⁵Hogeita hamar gudarietan ospetsuena izan zen; baina ez hiru haiek adinakoa. Davidek bere zaintzaileen buru egin zuen. ²⁶Hona hemen beste gudari ospetsuen izenak: Asahel, Joaben anaia; Belengo Elhanan, Dodoren semea; ²⁷Harodeko Xamot; Pelongo Heletz; ²⁸Ira, Tekoako Ikexen semea; Anatoteko Abiezer; ²⁹Huxako Sibekai; Ilai ahohitarra; ³⁰Netofako Mahrai; Heled, Netofako Baanaren semea; ³¹Itai, Gibako Ribai benjamindarraren semea; Piratongo Benaias; ³²Gaax ibarreko Hurai; Arabako Abiel; ³³Bahurimgo Azmabet; Xaalbongo Eliahba; ³⁴Gizongo Bene-Haxem; Jonatan, Harargo Xageren semea; ³⁵Ahiam, Harargo Sakarren semea; Elifal, Ur-en semea; ³⁶Mekerateko Hefer; Pelongo Ahias; ³⁷Karmelgo Hetzro; Naarai, Ezbairen semea; ³⁸Joel, Natanen anaia; Mibhar, Hagriren semea; ³⁹Amongo Tzelek; Beroteko Nahrai, Tzeruiaren seme Joaben ezkutaria; ⁴⁰Jetergo Ira eta Gareb; ⁴¹Urias hitita; Zabad, Ahlairen semea; ⁴²Adina, Xiza rubendarraren semea, rubendarren buruzagia, eta honekin batera beste hogeita hamar gudari. ⁴³Hanan, Maakaren semea; Josafat mitnitarra; ⁴⁴Axtaroteko Uzias; Xama eta Jeiel, Aroerko Hotamen semeak; ⁴⁵Jediael eta honen anaia Joha, Ximri titzearraren semeak; ⁴⁶Mahabimgo Eliel; Jeribai eta Joxabias, Elnaamen semeak; Moabeko Itma ⁴⁷eta Tzobako Eliel, Obed eta Jaasiel.