11 ‘Ona fa‘aali lea ‘iā te ia le agelu a le Ali‘i, o lo‘o tu i le itū taumatau o le fata e mū ai mea manogi.
12 ‘Ua iloa e Sakaria, ‘ona atuatuvale ai lea, ‘ua o‘o ‘iā te ia le mata‘u.
13 A ‘ua fa‘apea mai le agelu ‘iā te ia, “Sakaria e, ‘aua ‘e te mata‘u; auā ‘ua fa‘afofogaina lau tatalo; e fānau lau avā o Elisapeta sou atali‘i, ‘e te fa‘aigoa ‘iā te ia o Ioane.
14 E ‘iā te oe le fiafia ma le ‘oli‘oli; e to‘atele fo‘i ē fiafia i lona fānau mai.
15 Auā e sili o ia i luma o le Ali‘i; e lē inu o ia i le uaina po o le ‘ava malosi; e fa‘atumuina fo‘i o ia i le Agaga Pa‘ia e āfua i lona fānau mai.
16 E fa‘aliliu e ia le fānauga a Isaraelu e to‘atele i le Ali‘i lo latou Atua.
17 E muamua atu o ia i ona luma ma le agaga ma le malosi o Elia, e fa‘aliliu loto o tamā i le fānau, e fa‘aliliu fo‘i ē ‘ua fa‘alogogatā i le poto o ē amiotonu; e sauni le nu‘u e fa‘atatauina mo le Ali‘i.”