1 O le ulua‘i aso o le vaisapati, ‘ua latou ō atu ai i le tu‘ugamau i le tafa o ata, ‘ua ‘ave mea manogi na latou saunia.
2 ‘Ua iloa e i latou ‘ua fuli‘eseina le ma‘a nai le tu‘ugamau;
3 ‘ona latou ulu atu lea i totonu, ‘ae latou te le‘i maua le tino o le Ali‘i o Iesu.
4 ‘Ua femēmēa‘i i latou i lenei mea, fa‘auta fo‘i, ‘ua tutū mai ‘iā te i latou tagata e to‘alua ‘ua ‘o‘ofu i ‘ofu pupula.
5 ‘Ua matata‘u i latou, ‘ua punou fo‘i o latou mata i le ‘ele‘ele, ‘ona la fai mai lea ‘iā te i latou, “Se a le mea tou te sā‘ili ai i lē ‘ua soifua i ē ‘ua oti?
6 E lē o ‘i‘inei o ia, a ‘ua tu; ‘ia ‘outou manatu i lona fetalai atu ‘iā te ‘outou, ‘ina o i Kalilaia o ia,
7 ‘ua fa‘apea atu, e tatau ‘ona tu‘uina atu o le Atali‘i o le tagata i lima o tagata agasala ma ‘ia fa‘asatauroina ma toetū mai i le aso tolu.”
8 ‘Ona latou manatua ai lea i lana fetalaiga.
9 ‘Ua latou toe fo‘i mai nai le tu‘ugamau, ‘ona latou fa‘amatala lea o ia mea uma i le to‘asefulu ma le to‘atasi, ‘atoa ma i latou uma.
10 O Maria fo‘i le Makatala ma Ioana ma Maria le tinā o Iakopo, ma i latou uma sa ‘iā te i latou, o i latou ia o ē na fa‘amatala mai ia mea i le ‘au ‘aposetolo.
11 ‘Ua manatu fo‘i le ‘au ‘aposetolo i ‘upu a fafine e peiseaī o se talanoaga; latou te le‘i talitonu fo‘i ‘iā te i latou.
12 A ‘ua tu i luga Peteru, ‘ua momo‘e i le tu‘ugamau, ‘ua punou fo‘i, ‘ua va‘ai o ia i ‘ie ‘ua tu‘u fa‘atasi; ‘ona alu ai lea o ia, ‘ua ofo i le mea ‘ua faia.
13 Fa‘auta fo‘i, ‘ua ō le to‘alua o i latou i lea aso i le ‘a‘ai, o Emau le igoa, o lo la vā ma Ierusalema pe fitu maila.
14 Sa fetautalatala‘i i lā‘ua i ia mea uma ‘ua faia.
15 ‘Ua la fetautalatala‘i, ma fesu‘ea‘i, ‘ona fa‘alatalata mai ai lea o Iesu, ‘ua ō fa‘atasi ma i lā‘ua.
16 A ‘ua punitia o lā‘ua mata, o lea ‘ua lē iloa ai o ia e i lā‘ua.
17 ‘Ua fetalai atu o ia ‘iā te i lā‘ua, “O a ‘ea ia ‘upu ‘ua ‘oulua felafolafoa‘i ai, a o ‘oulua o sāvavali?”‘Ua tutū i lā‘ua ma mata fa‘anoanoa.
18 O le tasi o i lā‘ua e igoa ‘iā Kaleopa, ‘ua tali mai ‘iā te ia, ‘ua fa‘apea mai, “Pe na o oe ‘ea lē āumau i Ierusalema ma le lē iloa o mea ‘ua tutupu ai i ona po nei?”
19 ‘Ona fetalai atu lea o ia ‘iā te i lā‘ua, “O a mea?”‘Ona la fai mai ai lea ‘iā te ia, “O mea ‘iā Iesu le Nasareta o le perofeta lea sa malosi i mea sa ia faia, ‘atoa ma ana ‘upu i luma o le Atua ma le nu‘u uma.
20 Na tu‘uina atu fo‘i o ia e le ‘au ositaulaga sili ma faipule, ‘ia fa‘asalaina o ia ‘ia oti ma ‘ua latou fa‘asatauroina o ia.
21 Sa matou fa‘amoemoe fo‘i, o ia lava o le a togiolaina Isaraelu; ‘ae lē gata i ia mea uma, o le tolu lenei o aso talu ‘ona faia o na mea.
22 A ‘ua matou ofo lava i nisi fafine o i matou sa i le tu‘ugamau i le tafa o ata;
23 e le‘i iloa e i latou lona tino, a ‘ua latou ō atu, ma fa‘apea atu, ‘ua iloa e i latou agelu na fa‘aali mai, o ē na fai mai, ‘ua soifua o ia.
24 O isi fo‘i o matou, na latou ō i le tu‘ugamau, ‘ua fa‘apea fo‘i ‘ona iloa e i latou, pei ‘ona fai mai ai o fafine; ‘ae le‘i iloa e i latou o ia.”
25 ‘Ona fetalai atu lea o ia ‘iā te i lā‘ua, “O tagata valea ma loto faigatā ‘ona talitonu i mea uma ‘ua fai mai ai le ‘au perofeta.
26 E lē tatau ‘ea ‘ona tigā o le Keriso i mea fa‘apenā, i le o‘o ai o ia i lona mamalu?”
27 ‘Ona fa‘amatala ai lea e ia ‘iā te i lā‘ua o mea ‘ua tusia ‘iā te ia i Tusi uma, ‘ua amata mai ‘iā Mose ‘atoa ma le ‘au perofeta uma.
28 ‘Ua latou fa‘alatalata atu i le ‘a‘ai ‘ua latou o i ai; a o ia ‘ua aga atu peiseaī a alu loa.
29 A ‘ua la pulunaunau ‘iā te ia, ‘ua fa‘apea mai, “Tatou te nonofo ma i mā‘ua nei; auā ‘ua taugagaifo le lā ‘ua lata i le afiafi.” ‘Ona ulufale atu lea o ia, latou te nonofo.
30 ‘Ua nofo o ia e taumafa fa‘atasi ma i lā‘ua, ‘ona tago ai lea i le areto, ‘ua fa‘afetai, ‘ua tofitofi ma avatu ‘iā te i lā‘ua.
31 ‘Ona pupula ai lea o lā‘ua mata, ‘ua la iloa o ia; a ‘ua mou o ia nai ‘iā i lā‘ua.
32 ‘Ona la fetautalatala‘i lea, “E le‘i mū ‘ea o tā loto i totonu ‘iā i tā‘ua, ‘ina ‘ua fetalai o ia ‘iā te i tā‘ua i le ala, ‘ina ‘ua fa‘amatala mai fo‘i e ia o Tusi ‘iā te i tā‘ua?”
33 ‘Ua la tutū i luga i lea lava taimi, ‘ua toe fo‘i atu ai i Ierusalema, ‘ua maua atu fo‘i e i lā‘ua o le to‘asefulu ma le to‘atasi ‘ua fa‘apotopoto fa‘atasi ma ē na ‘iā i latou;
34 o fa‘apea mai i latou, “E moni, ‘ua toetū le Ali‘i ‘ua fa‘aali fo‘i o ia ‘iā Simona.”
35 O i lā‘ua fo‘i ‘ua la fa‘amatala atu mea na faia i le ala ma na iloa fo‘i e i lā‘ua o ia i le tofitofi o le areto.
36 A o fa‘amatala e i lā‘ua ia mea ‘iā te i latou, a ‘ua tu mai Iesu lava i o latou luma, ‘ua fetalai atu ‘iā te i latou, “‘Ia ‘outou manuia.”
37 ‘Ua fefefe i latou, ‘ua matuā matata‘u lava, sa manatu i latou o le agaga ‘ua latou va‘aia.
38 ‘Ua fetalai atu fo‘i o ia ‘iā te i latou, “Se a le mea ‘ua ‘outou atuatuvale ai? Se a fo‘i e māsalosalo ai o ‘outou loto?
39 ‘Ia ‘outou va‘ava‘ai mai i o‘u lima ma o‘u vae, auā o a‘u lava lenei; ‘ia ‘outou tagotago mai ‘iā te a‘u, ma ‘ia va‘ava‘ai mai; auā o le agaga e leai sona ‘a‘ano ma ni ona ivi, pei o a‘u nei ‘ua ‘outou va‘ava‘ai i ai.”
40 ‘Ua uma ‘ona fetalai atu, ‘ona fa‘aali atu ai lea o ia ‘iā te i latou o ona lima ma ona vae.
41 Sa le‘i talitonu i latou, ‘ona ‘ua ‘oli‘oli ma ‘ua ofo, ‘ua fetalai atu o ia ‘iā te i latou, “O ‘i‘inā ‘ea ni a ‘outou mea e ‘ai?”
42 ‘Ona latou avatu ai lea ‘iā te ia se fāsi i‘a tunu.
43 ‘Ua tago o ia i ai ma taumafa ai i o latou luma.
44 ‘Ua fetalai atu o ia ‘iā te i latou, “O ‘upu ia na ‘ou fai atu ai ‘iā te ‘outou, ‘ina o ‘ou ‘iā te ‘outou; e tatau ‘ona taunu‘u o mea uma ‘ua tusia ‘iā te a‘u i le tulafono a Mose ma le ‘au perofeta ma salāmo.”
45 ‘Ona tatalaina lea e ia o latou loto, ‘ina ‘ia latou malamalama ai i Tusi.
46 ‘Ua fetalai atu fo‘i o ia ‘iā te i latou, “‘Ua fa‘apea ‘ona tusia, e fa‘apea fo‘i ‘ona tatau ‘ina tigā o le Keriso ma toetū nai ē ‘ua oti i le aso tolu;
47 ‘ina ‘ia tala‘iina fo‘i le salamō ma le fa‘amāgaloina o agasala i nu‘u uma i lona igoa, e amata mai i Ierusalema.
48 O molimau fo‘i ‘outou i nei mea.
49 Fa‘auta fo‘i, ‘ou te ‘auina mai ‘iā te ‘outou lē na folafolaina e lo‘u Tamā; a ‘ia ‘outou nonofo i le ‘a‘ai o Ierusalema, se‘ia maua e ‘outou le mana mai lugā.”
50 ‘Ua ‘ave e ia ‘iā te i latou i tua, ‘ua o‘o lava i Petania; ‘ona sisi‘i ai lea o ona ‘a‘ao ma fa‘amanuia ‘iā te i latou.
51 ‘Ua o‘o ‘ina fa‘amanuia e ia ‘iā te i latou, ‘ona te‘a ‘ese lea o ia ‘iā te i latou, ‘ua si‘itia i le lagi.
52 ‘Ua latou ifo ‘iā te ia, ‘ona toe fo‘i mai lea i Ierusalema ma le ‘oli‘oli tele;
53 sa i le malumalu i latou e lē aunoa, ‘ua latou vivi‘i atu i le Atua.