1 ‘Ua o‘o i le tasi sapati, ‘ua maliu atu Iesu i le fale o le tasi ali‘i o le ‘au faresaio e taumafa ai, ‘ona latou lamalama lea ‘iā te ia.
2 Fa‘auta fo‘i, sa i ona luma le tasi tagata ‘ua ma‘i i le fula.
3 ‘Ua fetalai atu Iesu i le ‘au a‘oa‘o tulafono ma le ‘au faresaio, ‘ua fa‘apea atu, “Pe sā ‘ea ‘ona fa‘amālōlō i ma‘i i le sapati?”
4 ‘Ua latou fa‘alologo lava. ‘Ona tago atu lea o Iesu ‘iā te ia, ‘ua fa‘amālōlō ‘iā te ia, ma tu‘u atu e alu.
5 ‘Ua fetalai atu fo‘i o ia ‘iā te i latou, “O ai so ‘outou ‘ua i ai se asini po o se povi, ‘ua pa‘ū i le lua, e lē sisi a‘e loa i luga i le aso sapati?”
6 A ‘ua latou lē mafai ‘ona tali mai ‘iā te ia i nā mea.
7 ‘Ua fetalai atu o Iesu i le fa‘ata‘oto i ē na vala‘aulia, ‘ina ‘ua silafia e ia o i latou ‘ua filifili i mea sili e ta‘oto ai; ‘ua fa‘apea atu ‘iā te i latou.
8 “Pe a vala‘auina oe e se tasi i le taumafataga o le fa‘aipoipoga, ‘aua ‘e te nofo i le mea sili, ne‘i i ai fo‘i se tasi ‘ua vala‘aulia e ia ‘ua sili ‘iā te oe;
9 ‘ona alu atu lea o lē na vala‘aulia ‘oulua, ma fai atu ‘iā te oe, ‘‘Inā sōsō atu ia ma le ali‘i nei,’ ‘ona e alu ai lea ma le mā i le mea e aupito fa‘atauva‘a.
10 Peita‘i o oe, pe a vala‘aulia oe, ‘e te alu ma nofo i le mea e aupito fa‘atauva‘a; ‘ina ‘ia fai atu lē na vala‘aulia oe, pe a sau o ia, ‘Sole, ‘inā alu a‘e ia oe i le mea e sili;’ ‘ona mamalu ai lea o oe i luma o ē nonofo e ‘a‘ai fa‘atasi ma oe.
11 Auā so se tasi e fa‘amaualuga o ia ‘iā te ia lava, e fa‘amaulaloina lea; a o lē fa‘amaulalo e ia ‘iā te ia, e fa‘amaualugaina lea.”
12 ‘Ua fetalai atu fo‘i o Iesu i lē na vala‘aulia mai ‘iā te ia, “Pe a e sauni se faigā‘ai, po o se talisuaga, ‘aua ‘e te vala‘aulia i au uō, po o ou uso, po o tagata o lou ‘āiga, po o tagata mau‘oa tou te tuā‘oi, ne‘i latou toe vala‘aulia mai fo‘i ‘iā te oe, ‘ona tauia mai lea o oe.
13 Peita‘i o oe, pe a e sauni le faigā‘ai, ‘inā vala‘aulia ia i ē matitiva, i ē mumutu, i ē pipili, ma ē tauaso;
14 e manuia ai oe; auā latou te lē mafaia ‘ona taui mai ‘iā te oe; ‘ae tauia oe i le toe tutū mai o ē amiotonu.”
15 O le tasi o ē na ta‘o‘oto e ‘a‘ai ma ia, ‘ua fa‘alogo o ia i nā mea, ‘ona fai mai lea o ia ‘iā Iesu, “‘Amu‘ia lē ‘ai i le mālō o le Atua.”
16 A ‘ua fetalai atu Iesu ‘iā te ia, “Na saunia e le tasi tagata le talisuaga tele, na vala‘aulia e ia i tagata e to‘atele;
17 ‘ua o‘o fo‘i i le itū aso e fai ai le talisuaga, ‘ona ‘auina atu lea e ia o lana ‘au‘auna e fai atu i ē na vala‘aulia, ‘‘Ia ‘outou ō mai, auā ‘ua uma ‘ona saunia o mea uma.’
18 ‘Ona latou fe‘alo‘alofa‘i ai lea. ‘Ua fai mai le tasi ‘iā te ia, ‘Sa ‘ou fa‘atauina le fanua, e tatau ‘ona ‘ou alu atu e matamata ai, se‘i ē fa‘apea ‘ia tu‘u mai ‘iā te a‘u.’
19 ‘Ua fai mai fo‘i le tasi, ‘‘Ua ‘ou fa‘atau soa povi e lima, ‘ou te alu e fa‘ata‘ita‘i i ai; se‘i ē tu‘u mai ‘iā te a‘u.’
20 ‘Ua fai mai fo‘i le tasi, ‘‘Ua ‘ou fai avā; o le mea lea ‘ou te lē mafai ai ‘ona ‘ou alu atu.’
21 “‘Ua alu atu lea ‘au‘auna ‘ua fa‘amatala atu ia mea i lona ali‘i. ‘Ona ita ai lea o le matai o le ‘āiga, ‘ua fai atu ia, i lana ‘au‘auna, ‘‘Inā alu ia, ‘ia vave i ala ma alātua o le ‘a‘ai, ma ‘ia ‘aumai ‘i‘inei i ē matitiva ma ē mumutu ma ē pipili, ‘atoa ma ē tauaso.’
22 ‘Ona fai mai lea o le ‘au‘auna, ‘Le ali‘i e, ‘ua uma ‘ona faia o le mea na e poloa‘i mai ai, ‘ae le‘i nofoia le fale.’
23 ‘Ua fai atu le ali‘i i le ‘au‘auna, ‘‘Inā alu atu ia, i ala tele ma magāala ma ia pulunaunau atu latou te ō mai, ‘ina ‘ia tumu lo‘u nei fale.
24 Auā ‘ou te fai atu ‘iā te ‘outou, e leai lava se tasi o ia tagata ē na vala‘aulia, e ‘ai i la‘u talisuaga nei.’”
25 ‘Ua ō fa‘atasi ma ia le motu o tagata e to‘atele; ‘ona fāliu lea o ia, ma fetalai atu ‘iā te i latou,
26 “‘Āfai e sau se tasi ‘iā te a‘u, ‘ae lē ‘ino‘ino i lona tamā ma le tinā ma le avā ma le fānau ma uso ma tuafafine e o‘o lava i lona ola, e lē mafai ‘ona fai o ia mo o‘u so‘o.
27 O sē lē ‘ave lona satauro, ma ‘ua lē mulimuli mai ‘iā te a‘u, e lē mafai ‘ona fai o ia mo o‘u so‘o.
28 “O ai fo‘i so ‘outou ‘ua fia fai se ‘olo, e lē mua‘i nofo i lalo e faitau tupe e totogi ai, po ‘ua lava ana mea e fa‘auma ai?
29 ‘ina ne‘i tauemu mai ‘iā te ia o tagata uma e maimoa, ‘ina ‘ua tu‘u le fa‘avae, ‘ae lē mafai ‘ona fa‘auma ai,
30 e fa‘apea mai, ‘O le tagata lenei, na amata ‘ona fai, ‘ae le‘i mafai ‘ona fa‘auma.’
31 “Po o ai le tupu, o le a alu atu e tau ma le tasi tupu, e lē mua‘i nofo i lalo e filifili, pe mafai ‘iā te ia ma ona tagata e sefulu afe, ‘ona tau ma lē ‘ua sau e tau ma ia, ‘ua ‘iā te ia tagata e lua sefulu afe?
32 pe ‘āfai e leai, e tu‘u atu e ia le sāvali manū o mamao o ia, e fa‘atoga atu le filemū.
33 E fa‘apea fo‘i so ‘outou a lē lafoa‘i ana mea uma, e lē mafai ‘ona fai o ia mo o‘u so‘o.
34 “O le mea lelei le masima; ‘ae ‘āfai e māgalo le masima, pe se a se mea e fa‘amāi a‘i?
35 E lē aogā ia i le fanua, e lē aogā fo‘i e fai ma otaota e nasu a‘i; a ‘ia lafoa‘iina i fafo. O lē ‘ua i ai taliga e fa‘alogo ai, ‘inā fa‘alogo mai ia o ia.”