1 O ia ona aso na ō mai ai isi tagata, ‘ua tala mai ‘iā Iesu i tagata Kalilaia, ‘ina ‘ua fefiloi e Pilato lo latou toto ma le toto o a latou taulaga.
2 ‘Ona tali atu lea o Iesu, ‘ua fa‘apea atu ‘iā te i latou, “Pe tou te manatu ‘ea, ‘ua sili ‘ona agasala ia Kalilaia i tagata Kalilaia uma, ‘ina ‘ua tigāina i latou i mea fa‘apenā?
3 ‘Ou te fai atu ‘iā te ‘outou, e leai; ‘ae ‘āfai tou te lē salamō, e fa‘apenā lava ‘ona oti ‘outou uma.
4 I le ma le to‘asefulu ma le to‘avalu sa pa‘ū i o latou luga le ‘olo i Seloa, na latou oti ai; Pe tou te manatu ‘ea, ‘ua sili a latou agasala i tagata uma o ē sa nonofo i Ierusalema?
5 ‘Ou te fai atu ‘iā te ‘outou, e leai; ‘ae ‘āfai tou te lē salamō, e fa‘apenā lava ‘ona oti ‘outou uma.”
6 ‘Ua fetalai atu Iesu i le fa‘ata‘oto, “Sa i le tasi tagata le mati, na totō i lana tōvine; ‘ua alu atu o ia e sā‘ili ai ni fua, ‘ae le‘i maua.
7 ‘Ona fai atu lea o ia i lē galue vine, ‘Fa‘auta, o le tolu lenei o tausaga ma la‘u sau e sā‘ili ni fua i lenei mati, ‘ae ‘ou te le‘i maua lava; ‘inā tu‘u ia i lalo; se a fo‘i le mea e fa‘alēaogā ai le fanua?’
8 ‘Ua tali mai o lē galue vine ‘iā te ia, ‘Le ali‘i e, tu‘u pea ia i lenei tausaga, se‘ia ‘ou ‘eli fa‘ata‘ali‘oli‘o i ai ma avane i ai otaota.
9 ‘Āfai fo‘i e fua mai i lea tausaga, e lelei, pe ‘āfai e leai, ‘ona e tu‘u ai lea i lalo.’”
10 Sa a‘oa‘o o Iesu i le tasi sunako i le sapati.
11 Fa‘auta fo‘i, sa i ai le fafine ‘ua ‘iā te ia le agaga e vaivai ai i ona tausaga ‘ua sefulu ma le valu, ‘ua fa‘ano‘uno‘u lava o ia, e lē mafai lava ‘ona tu sa‘o i luga.
12 ‘Ua silafia e Iesu o ia, ‘ona vala‘au atu lea o ia ‘iā te ia, ‘ua fa‘apea atu, “Funa e, ‘ua fa‘asa‘olotoina oe mai lou ma‘i.”
13 ‘Ua fa‘ae‘e atu e ia ona ‘a‘ao ‘iā te ia; ‘ona tu sa‘o lea o ia, ‘ua vivi‘i atu fo‘i o ia i le Atua.
14 ‘Ona tautala mai ai lea o lē pule i le sunako, ‘ua ita ‘ina ‘ua fa‘amālōlō Iesu i le sapati, ‘ua fai ane o ia i le motu o tagata, “O aso e ono e tatau ‘ona galulue ai; o aso ia tou te ō mai ai ‘ia fa‘amālōlōina ‘outou, ‘ae lē o le aso sapati.”
15 ‘Ua tali atu le Ali‘i ‘iā te ia, “O ‘outou na, tagata fa‘afiaamiotonu, e lē ‘ua ta‘itasi ‘ea o ‘outou i le sapati ma tatala i lana povi, po o lana asini i le fale povi ma ta‘ita‘i e fa‘ainu?
16 A o le fafine lenei, o le afafine o Aperaamo, ‘ua noanoatia e Satani i tausaga e sefulu ma le valu, e lē tatau ‘ea ‘ona tatalaina o lenei noanoaga ‘iā te ia i le aso sapati?”
17 ‘Ua fetalai ane o ia ‘inā ‘upu, ‘ona māsiasi uma ai lea o ē e ita mai ‘iā te ia; a ‘ua ‘oli‘oli lava le motu o tagata uma ‘ona o ia mea ofoofogia uma na faia e ia.
18 ‘Ua fetalai ane fo‘i o ia, “E tusa le mālō o le Atua i ni a? ‘Ou te fa‘atusaina i ni ā?
19 E tusa ia ma le fua o le sinapi, ‘ua ‘ave e le tasi tagata ma lafo i lona fanua; ‘ua tupu, ‘ua ‘avea ma la‘au, ‘ua momoe fo‘i manu felelei i ‘ona lā.”
20 ‘Ua toe fetalai atu fo‘i o ia, “‘Ou te fa‘atusaina le mālō o le Atua i ni ā?
21 E tusa ia ma le mea fa‘afefete, na ‘ave e le fafine ma tu‘u i totonu o le falaoa mata pe tusa ma le ono sefulu pauna, ‘ua o‘o ‘ina fa‘afefeteina uma ai.”
22 ‘Ua ui ane fo‘i o ia i ‘a‘ai ma faoa ‘a‘ai, ‘ua a‘oa‘o i tagata ma alu malaga atu i Ierusalema.
23 ‘Ua fai mai le tasi ‘iā te ia, “Le Ali‘i e, e to‘aitiiti ‘ea e fa‘aolaina?”‘Ona fetalai atu lea o ia ‘iā te i latou,
24 “‘Ia ‘outou finafinau ‘ina ‘ia ulu atu i le faitoto‘a vā apiapi, auā ‘ou te fai atu ‘iā te ‘outou, e to‘atele latou te sā‘ili ‘ina ‘ia ulu atu, ‘ae lē mafai lava.
25 A uma ‘ona tula‘i o le matai o le fale ma pupuni le faitoto‘a, ‘ona ‘outou tutū lea i fafo ma tu‘itu‘i i le faitoto‘a, e fa‘apea mai, ‘Le Ali‘i e, ‘ia e tatalaina mai le faitoto‘a ‘iā te i matou;’ ‘Ae tali atu o ia, ‘ua fa‘apea atu ‘iā te i latou, ‘‘Ou te lē iloa ‘outou pe maifea.’
26 ‘Ona amata lea e ‘outou ‘ona fai mai, ‘Na matou ‘a‘ai ma inu i ou luma, nā e a‘oa‘o fo‘i i o matou ala.’
27 ‘Ona fa‘apea atu lea o ia, ‘‘Ou te fai atu ‘iā te ‘outou, ‘ou te lē iloa ‘outou pe maifea; ‘ina ō ‘ese ia ‘outou ‘iā te a‘u, o ‘outou uma o ē fai amio leaga.’
28 E i ai le taufaitagiauē ma le lilivau o nifo, pe a iloa e ‘outou o Aperaamo ma Isaako ma Iakopo ma le ‘au perofeta uma i le mālō o le Atua, a o ‘outou ‘ua tulia i fafo.
29 E ō atu tagata mai sasa‘e, ma sisifo, ma le itū i matū, ‘atoa ma le itū i saute, e ta‘o‘oto e ‘a‘ai i le mālō o le Atua.
30 Fa‘auta fo‘i, o ē mulimuli e ‘avea ia ma muamua; a o ē muamua e ‘avea ia ma mulimuli.”
31 O lea lava itūlā ‘ua ō mai ai isi o le ‘au faresaio, ‘ua fai mai ‘iā te ia, “Alu ia oe, ma ‘ia e alu ‘ese atu i se isi mea, auā o Herota ‘ua fia fasioti ‘iā te oe.”
32 ‘Ona fetalai atu lea o ia ‘iā te i latou, “‘Inā ō ia ‘outou ma fai atu i lenā alope, ‘Fa‘auta, ‘ou te tuli i fafo temoni, ‘ou te fa‘amālōlō fo‘i i ē mama‘i i le asō ma taeao, ‘ae o le tolu o aso ‘ona fa‘ai‘uina ai lea o la‘u galuega.
33 Peita‘i e tatau ‘ona ‘ou fealualua‘i i le asō ma taeao, ma le aso i ona tua atu; auā e lē mafai ‘ona oti se perofeta i se tasi mea na o Ierusalema lava.’
34 “Ierusalema e, Ierusalema e, ‘ua e fasioti i perofeta ma fetogi i ma‘a latou na ‘a‘auina atu ‘iā te oe. Po o ‘ua fa‘afia ‘ona ‘ou mana‘o e fa‘apotopoto i lau fānau, e pei o le moa e fa‘atasia e ia lana toloa‘i i lalo i ona ‘apa‘au, ‘ae sa ‘outou lē manana‘o ai.
35 Fa‘auta, e fa‘atafunaina lo ‘outou fale. E moni ‘ou te fai atu ‘iā te ‘outou, tou te lē iloa mai lava a‘u, se‘ia o‘o atu i le aso tou te fai ane ai, ‘‘Ia manuia lē maliu mai i le suafa o le Ali‘i.’”#