1 ‘Ua fetalai atu fo‘i Iesu i ona so‘o, “O le tasi tagata mau‘oa sa i ai le ‘au‘auna e pule; na molia le ‘au‘auna pule i le tagata mau‘oa, ‘ua ia fa‘amaumau ana mea.
2 ‘Ua na vala‘au atu ‘iā te ia, ‘ua fai atu i ai, ‘O le a lenei mea ‘ua ‘ou fa‘alogo ai ‘iā te oe? Tala mai ia le tala i mea na e pule i ai, auā e lē toe mafai ‘ona fai oe ma ‘au‘auna e pule.’
3 ‘Ona fai ifo ai lea o le ‘au‘auna i lona loto, ‘Se a se mea ‘ou te faia? Auā o le a fa‘ate‘aina a‘u e lo‘u ali‘i i le faiva o ‘au‘auna e pule, ‘ou te lē mafai ‘ona ‘eli; ‘ou te mā fo‘i e ‘aisi.
4 ‘Ua ‘ou iloa le mea ‘ou te faia, ‘ina ‘ia talia a‘u i o latou ‘āiga, pe a tu‘u‘eseina a‘u i le faiva o ‘au‘auna e pule.’
5 ‘Ona ‘ami‘ami lea e ia o tagata ta‘itasi uma o ē na ‘aitalafu i lona ali‘i, ‘ua fai atu o ia i le tasi, ‘Pe fia lau ‘aitalafu i lo‘u ali‘i?’
6 ‘Ona fai mai ai lea o ia, ‘O kalone suāu‘u e afe.’ ‘Ua fai atu le ‘au‘auna pule ‘iā te ia, ‘‘Inā tago ia i lau tusi, ‘ia vave nofo i lalo ma tusi e lima selau.’
7 ‘Ona fai atu lea o ia i le tasi, ‘Pe fia lau ‘aitalafu?’ ‘Ua fai mai o ia, ‘O taga o saito e selau.’ ‘Ona fai atu lea o le ‘au‘auna pule ‘iā te ia, ‘‘Inā tago ia i lau tusi, ma tusi e valu sefulu.’
8 ‘Ua vivi‘i atu le ali‘i i le ‘au‘auna amioletonu, auā ‘ua na togafiti poto auā e sili le poto o tagata o le olaga nei, i lo latou tupulaga, i lo tagata o le malamalama.
9 ‘Ou te fai atu fo‘i ‘iā te ‘outou, o le ‘oa o le amioletonu ‘ia ‘outou fai ai uō mā ‘outou, ‘ina ‘ia latou talia mai ‘outou i fale e fa‘avavau, pe a o‘o ‘ina le toe aogā ia mea.
10 “O lē fa‘amaoni i le mea itiiti, e fa‘amaoni fo‘i o ia i mea e tele; o lē amioletonu i le mea itiiti, e amioletonu fo‘i o ia i mea e tele.
11 ‘Āfai fo‘i tou te lē fa‘amaoni i le fa‘aaogāina tatau o le ‘oa fa‘alelalolagi, o ai sē na te tu‘u atu ‘iā te ‘outou le ‘oa moni e tausi?
12 ‘Āfai fo‘i ‘ua ‘outou lē fa‘amaoni i mea a le tagata ‘ese, o ai sē na te tu‘u atu ‘iā te ‘outou a ‘outou lava mea?
13 E lē mafai se ‘au‘auna ‘ona ‘au‘auna i ali‘i e to‘alua; auā e ‘ino‘ino o ia i le tasi, ‘ae alofa atu i le tasi; a lē o lea, e fa‘apipi‘i atu o ia i le tasi, ‘ae fa‘alēaogā i le tasi. Tou te lē mafaia ‘ona ‘au‘auna i le Atua ‘atoa ma le ‘oa.”
14 ‘Ua fa‘alogo le ‘au faresaio i ia mea uma, o i latou fo‘i ‘ua matape‘ape‘a; ‘ona latou tauemu ai lea ‘iā Iesu.
15 ‘Ona fetalai atu lea o Iesu ‘iā te i latou, “O ‘outou ‘ua fa‘afiaamiotonu ‘outou i luma o tagata; a ‘ua silafia e le Atua o ‘outou loto; auā o le mea e sili ‘ona lelei i tagata, e ‘inosia lea i luma o le Atua.
16 “O le tulafono ma le ‘au perofeta na o‘o lava ia ‘iā Ioane; talu ai ia ona po ‘ua folafolaina le tala lelei o le mālō o le Atua, ‘ua taufaoa fo‘i e tagata uma.
17 E mavaegofie atu le lagi ma le lalolagi, ‘ae lē i‘uvale sina fāsi mata‘itusi e tasi o le tulafono.
18 “O sē fa‘ate‘a i lana avā, ‘ae fai avā i se tasi, o le mulilua lea; o sē fai avā i lē ‘ua fa‘ate‘aina e lana tane, o le mulilua fo‘i lea.
19 “O le tasi tagata mau‘oa, na ‘ofu i le ‘ofu pāuli ma le ‘ie vavae, ‘ua talileleia lava ia i aso uma.
20 O le tasi tagata mativa fo‘i e igoa ‘iā Lasalo, ‘ua ta‘atia i lona faitoto‘a, ‘ua lilo i le papala.
21 ‘Ua mana‘o tele o ia e ‘ai momoi mea ‘ai na pa‘u‘ū ifo i le la‘o‘ai a le mau‘oa; a ‘ua ō mai ta‘ifau ‘ua etoeto ona papala.
22 “‘Ua o‘o fo‘i ‘ina oti o le tagata mativa, ‘ona ‘avea lea o ia e agelu i tafatafa o Aperaamo. ‘Ua oti fo‘i le mau‘oa ma ‘ua tanu;
23 ‘ua i seoli ‘ua fa‘ataugāina, ‘ona tepa a‘e ai lea o ia, ‘ua na iloa mamao atu ‘iā Aperaamo ma Lasalo i ona tafatafa;
24 ‘ua ‘alaga atu fo‘i o ia, ‘ua fai atu, ‘Lo‘u tamā e, Aperaamo, ‘ia e alofa mai ‘iā te a‘u, ma ‘ia e ‘auina mai Lasalo, na te fufui i le tumutumu o lona tamatama‘ilima i se vai, e fa‘amalūlū ai lo‘u nei laulaufaiva; auā ‘ua ‘ou puapuagā i le mumū o le afi nei.’
25 “‘Ona fai ane lea o Aperaamo, ‘Lo‘u atali‘i e, ‘ia e manatu, na e maua au mea lelei i lou olaga, na maua fo‘i e Lasalo o mea leaga; a o lenei, ‘ua fa‘a‘oli‘oliina o ia, a ‘ua puapuagāina oe.
26 E lē gata i nei mea uma, a ‘ua tumau le vanu tele i lo tatou vā; o le mea lea e lē masao ai o ē ‘ua ‘i‘inei ‘ua fia ō atu ‘iā te ‘outou; e lē masao mai fo‘i o ē ‘ua ‘i‘inā ‘iā te i matou nei.’
27 ‘Ona fai atu lea o ia, ‘Lo‘u tamā e, ‘ou te fa‘atoga atu ‘iā te oe, ‘ina ‘ia e ‘auina atu o ia i le ‘āiga o lo‘u tamā;
28 auā e to‘alima o‘u uso; ‘ina ‘ia molitino atu ia ‘iā te i latou, ne‘i latou ō mai fo‘i i lenei mea puapuagā.’
29 “‘Ua fai ane Aperaamo ‘iā te ia, ‘O ‘iā te i latou Mose ma le ‘au perofeta, ‘ia latou fa‘alogo i ai.’
30 A ‘ua fa‘apea atu o ia, ‘Lo‘u tamā e, Aperaamo, auā ‘āfai e alu atu se tasi ‘iā te i latou nai ē ‘ua oti, e salamō ai i latou.’
31 ‘Ua fai ane Aperaamo ‘iā te ia, ‘Pe ‘āfai latou te lē fa‘alogo ‘iā Mose ma le ‘au perofeta, e ui lava ‘ina tu mai sē tasi nai ē ‘ua oti, latou te lē talitonu lava.’”#