1 ‘Ua potopoto mai le motu o tagata e to‘atele, a o faia ia mea, ‘ua latou fesolia‘i ai, ‘ona o‘o atu lea a lana lauga i ona so‘o, “‘Ia ‘outou matuā ‘alo ‘ese i le mea fa‘afefete a le ‘au faresaio, o le fa‘afiaamiotonu lea.
2 Auā e leai se mea o lo‘o ufiufitia, e lē fa‘aalia; e leai fo‘i se mea e lilo e lē fa‘ailoaina.
3 O lea fo‘i, o mea uma ‘ua ‘outou fai atu ai i le pouliuli, e logoina lea i le malamalama; o le mea fo‘i ‘ua ‘outou tala lemū atu i afeafe, e tala‘iina lea i luga o fale.
4 “‘Ou te fai atu ‘iā te ‘outou a‘u uō e, ‘aua tou te matata‘u ‘iā te i latou o ē fasioti le tino; a mavae lea, ‘ua leai se toe mea latou te mafaia.
5 ‘Ae ‘ou te fa‘asino atu ‘iā te ‘outou i lē tou te matata‘u i ai; ‘ia ‘outou matata‘u i le Atua, a mavae ‘ona fasioti e ia, e ana le pule e lafo atu i Kēna; e moni, ‘ou te fai atu ‘iā te ‘outou, ‘ia ‘outou matata‘u ‘iā te ia.
6 E lē fa‘ataulia ‘ea manu iti e lima i asari e lua? E leai fo‘i so latou e tasi ‘ua galo i luma o le Atua.
7 A o ‘outou lauulu lava ‘ua faitaulia uma ia, ‘aua tou te matata‘u, ‘ua sili ‘outou i manu iti e tele.
8 “‘Ou te fai atu fo‘i ‘iā te ‘outou, o sē ta‘ua a‘u i luma o tagata, e ta‘ua fo‘i o ia e le Atali‘i o le tagata i luma o agelu a le Atua.
9 A o lē fa‘afiti mai ‘iā te a‘u i luma o tagata, e fa‘afitia o ia i luma o agelu a le Atua.
10 O sē lafo fo‘i se ‘upu i le Atali‘i o le tagata, e fa‘amāgaloina lea; a o lē fāifai i le Agaga Pa‘ia, e lē fa‘amāgaloina lea.
11 “Pe a ta‘ita‘iina ‘outou i sunako ma ali‘i ma faipule, ‘aua tou te popole i se mea e puipui ai ‘outou po o se ‘upu tou te tautala atu ai.
12 Auā e a‘oa‘o le Agaga Pa‘ia ‘iā te ‘outou i lea lava taimi i ‘upu e tatau ‘ona ‘outou tautala ai.”
13 ‘Ua fai mai ‘iā Iesu le tasi mai le motu o tagata, “Le a‘oa‘o e, ‘ia e fetalai ane i lo‘u uso, ‘ina ‘ia vaeluaina mai le tofi ‘iā te a‘u.”
14 A ‘ua fetalai atu Iesu ‘iā te ia, “Sole, o ai ‘ea na tu‘uina mai ‘iā te a‘u le pule ‘ou te fa‘amasino atu ai ‘iā te ‘oulua?”
15 ‘Ua fetalai atu fo‘i o ia ‘iā te i latou, “‘Ia leoleo ‘outou ‘iā te ‘outou ‘ona o le matape‘ape‘a; auā e lē ola se tasi i le tele o ana mea ‘ua ‘iā te ia.”
16 ‘Ua fetalai atu o ia ‘iā te i latou le fa‘ata‘oto, “Na fua tele mai le fanua a le tasi tagata mau‘oa;
17 ‘ona mānatunatu ifo lea o ia, ‘ua fa‘apea: ‘Se a se mea ‘ou te faia, auā e leai sa‘u mea e fa‘aputu ai fua o a‘u fa‘ato‘aga?’
18 ‘Ua fai ane fo‘i o ia, ‘O lenei le mea ‘ou te faia: ‘Ou te tu‘uina i lalo o‘u fale saito, ‘ae faia ‘ia telē; ‘ou te fa‘aputu i ai o fua o a‘u fa‘ato‘aga ma a‘u mea lelei uma.
19 ‘Ou te fai ifo fo‘i i lo‘u agaga, “‘Lo‘u agaga e, ‘ua ‘iā te oe mea lelei e tele ‘ua teuina mo tausaga e tele; ‘inā nofonofo filemū ia, ‘inā ‘ai ia ma inu ma ‘ia e ‘oli‘oli.’”
20 A ‘ua fetalai atu le Atua ‘iā te ia, ‘O oe lenā le vale, e ‘a‘amiina atu lou agaga nai ‘iā te oe i le pō nanei; ‘ae fai mā ai mea ia ‘ua e saunia?’
21 O lo‘o fa‘apea fo‘i lē fa‘aputu ‘oa ‘iā te ia, a e lē mau‘oa i le Atua.”
22 ‘Ona fetalai atu lea o ia i ona so‘o, “‘Ou te fai atu ‘iā te ‘outou, ‘aua tou te popole i lo ‘outou ola, i mea tou te ‘a‘ai ai po o le tino, i mea tou te ‘o‘ofu ai.
23 ‘Ua sili le ola i le mea e ‘ai, ‘ua sili fo‘i le tino i le ‘ofu.
24 ‘Ia ‘outou mafaufau i oreva; latou te lē lūlū saito, latou te lē selesele fo‘i; e leai lava so latou potu ‘oloa, po o se fale saito, ‘ae fagaina i latou e le Atua; e lē sili ‘ea lo ‘outou lelei, i manu?
25 O ai ‘ea so ‘outou ‘ua mafai ‘iā te ia i lona popole ‘ona fa‘asiliina lona umi i se aga e tasi?
26 ‘Āfai fo‘i tou te lē mafai i se mea itiiti lava, se a le mea tou te popole ai i nisi mea?
27 ‘Ia ‘outou mafaufau i lautalotalo pe fa‘apefea ‘ona tupu; latou te lē galue, e lē milo fo‘i; a ‘ou te fai atu ‘iā te ‘outou, e le‘i ‘ofu lava Solomona ma lona matagofie tele pei o le tasi o nā mea.
28 ‘Āfai e fa‘apea ‘ona fa‘a‘ofuina e le Atua le vao o i le fanua, o ola mai i le asō, ‘ae lafoina a taeao i le ‘ogāumu, e lē sili ‘ea ‘ona fa‘a‘ofuina ‘outou e ia, o ‘outou ē fa‘atuatua itiiti?
29 O ‘outou fo‘i, ‘aua tou te sā‘ili pe ni a tou te ‘a‘ai ai, a o ni a fo‘i tou te inu ai, ‘aua fo‘i le atuatuvale o ‘outou loto.
30 Auā o mea uma ia ‘ua sā‘ilia e nu‘u o le lalolagi; ‘ua silafia fo‘i e lo ‘outou Tamā le mea e aogā mai ‘iā te ‘outou.
31 A ‘ia ‘outou sā‘ili lona mālō; ‘ona ia foa‘iina atu lea o ia mea uma ‘iā te ‘outou.
32 “‘Aua ‘e te fefe oe le lafu mamoe itiiti e, auā ‘ua finagalo lo ‘outou Tamā e foa‘i mai le mālō ‘iā te ‘outou.
33 ‘Ia ‘outou fa‘atau atu ‘iā ‘outou mea, tou te avatu ai e fai ma mea alofa, ‘ia fai ‘outou ni a ‘outou taga e ‘anagatā, o le ‘oa i le lagi e lē uma lava, e lē tāitāi ane i ai se gaoi, e lē atia fo‘i e se mogamoga.
34 Auā o le mea o i ai lo ‘outou ‘oa, e i ai ‘atoa fo‘i ma o ‘outou loto.
35 “‘Ia fusia o ‘outou sulugātiti ma ia mumū a ‘outou molī,
36 o ‘outou fo‘i, ‘ia ‘outou fa‘apei o tagata e fa‘atali atu i lo latou ali‘i, se‘ia fo‘i mai o ia mai le tausama‘aga; pe a sau o ia ma tu‘itu‘i mai e tatalaina atu loa e latou le faitoto‘a ‘iā te ia.
37 ‘Amu‘ia ia ‘au‘auna e maua i latou e lo latou ali‘i, o mataala pe a sau. E moni, ‘ou te fai atu ‘iā te ‘outou, e fusi e ia ona ‘ofu ma fai atu ‘iā te i latou ‘ia ta‘o‘oto e ‘a‘ai ma alu ane lava ma ‘au‘auna ‘iā te i latou.
38 Pe ‘āfai e sau o ia i le leoleoga e lua o le po, pe sau i le leoleoga e tolu, a maua o i latou o fa‘apea, ‘amu‘ia ia ‘au‘auna.
39 “A ‘ia ‘outou iloa lenei mea, ana iloa e le matai o le ‘āiga le itū pō e sau ai le gaoi, po ‘ua na leoleoina, ‘ae lē tu‘ua e ia lona fale ‘ia gaoia.
40 O lenei, ‘ia ‘outou nofo sauni; auā o le itū aso tou te lē mānatunatu ai, e sau ai le Atali‘i o le tagata.”
41 ‘Ona fai mai lea o Peteru ‘iā te ia, “Le Ali‘i e, ‘ua e fetalai mai ‘ea lenā fa‘ata‘oto ‘iā te i matou po o tagata uma?”
42 ‘Ona fetalai atu lea o le Ali‘i, “O ai fo‘i le ‘au‘auna e pule, ‘ua fa‘amaoni ma le mafaufau, ‘ua tofia e lona ali‘i e pule i ana ‘au‘auna, ‘ia avatu mea e ‘ai ‘iā te i latou e tusa ai ma le taimi?
43 ‘Amu‘ia lea ‘au‘auna, pe a sau lona ali‘i e maua ia o lo‘o fa‘apea ‘ona fai.
44 E moni, ‘ou te fai atu ‘iā te ‘outou, na te tofia o ia e pule i ana mea uma.
45 ‘Ae ‘āfai e fai ifo lea ‘au‘auna i lona loto, ‘E fa‘atuai mai lo‘u ali‘i,’ ‘ona fasi ai lea o ia i ‘au‘auna tane ma ‘au‘auna fafine, e ‘ai fo‘i, ma inu, ma ‘onā.
46 E sau lava le ali‘i o lea ‘au‘auna i le aso e lē fa‘atalitali atu ai o ia, o le itū aso fo‘i e lē iloa ai e ia; ‘ona matuā fa‘asala lea ‘iā te ia ma avatu lona tofi fa‘atasi ma ē lē fa‘atuatua.
47 “O lea ‘au‘auna fo‘i ‘ua na iloa le finagalo o lona ali‘i, ‘ae le‘i sauni lava ia, e le‘i faia fo‘i mea e tatau ma lona finagalo, e tele ‘ona sasaina.
48 A o lē ‘ua lē iloa, ‘ua faia fo‘i e ia mea e tatau ‘ina sasaina ai, e māmā ‘ona sasaina o ia. Auā o lē ‘ua foa‘iina atu i ai o mea e tele, e su‘eina atu fo‘i ‘iā te ia o mea e tele; o lē fo‘i ‘ua tu‘uina atu i ai o mea e tele latou te fai atu ‘iā te ia, e ‘aumai mea e sili ‘ona tele.
49 “‘Ua ‘ou sau e lafo le afi i le lalolagi; se a se mea ‘ou te toe mana‘o i ai pe ‘ana mū nei lava?
50 O lo‘u papatisoga o le a papatisoina ai a‘u, ‘ua ‘ou matuā tigā ai lava se‘ia fa‘ai‘uina.
51 Tou te manatu ‘ea ‘ua ‘ou sau e avatu le filemū i le lalolagi? ‘Ou te fai atu ‘iā te ‘outou, e leai; a o le fevaevaea‘i.
52 Auā e amata i nei ona po e i ai i le fale e tasi, tagata e to‘alima e fevaevaea‘i i latou, o le to‘atolu e fa‘amāsesei ma le to‘alua, o le to‘alua fo‘i e fa‘amāsesei ma le to‘atolu.
53 E fevaevaea‘i le tamā ma le atali‘i,o le atali‘i fo‘i ma le tamā;o le tinā ma le tama teine,o le tama teine fo‘i ma le tinā,o le tinā o le tane ma le avā a lona tama,o le avā fo‘i ma le tinā o lana tane.”
54 ‘Ua fetalai atu fo‘i o ia i le motu o tagata, “Pe a ‘outou iloa le ao o lo‘o alu a‘e i sisifo, ‘ona ‘outou fai ane loa lea, ‘‘Anei e timu;’ ‘ona taunu‘u lea.
55 A agi mai fo‘i le matagi mai saute, ‘ua ‘outou fai ane, ‘‘Anei e lā;’ ‘ona taunu‘u fo‘i lea.
56 O ‘outou tagata fa‘afiaamiotonu, ‘ua ‘outou iloa lelei faitau le amio a le lagi ma le lalolagi; se a fo‘i le mea tou te lē maitauina ai le uiga o lenei tausaga?
57 “Se a fo‘i le mea tou te lē filifili ai e ‘outou i mea tonu?
58 Pe a lua ō i le ali‘i ma lē ‘ua molia oe, ‘ia e taumafai lava i le ala ‘ina ‘ia ‘oulua lelei ma ia; ne‘i toso o ia ‘iā te oe i le fa‘amasino, e tu‘u atu fo‘i le fa‘amasino ‘iā te oe i le ‘au‘auna, ‘ona tu‘uina atu lea o oe e le ‘au‘auna i le fale puipui.
59 ‘Ou te fai atu ‘iā te oe, ‘e te lē toe ulufafo ai, se‘ia e avatu tupe uma lava.”