1 ‘Ua ō mai ‘iā Iesu tagata ao lafoga uma ma ē agasala, e fa‘alogologo ‘iā te ia.
2 ‘Ona muimui ai lea o le ‘au faresaio ma le a‘u tusi‘upu, ‘ua fa‘apea ane, “‘Ua talia e lenei tagata o ē agasala, ‘ua ‘a‘ai fa‘atasi fo‘i o ia ma i latou.”
3 ‘Ona fetalai atu ai lea o ia lenei fa‘ata‘oto, ‘iā te i latou,
4 “O ai ‘ea so ‘outou e ana mamoe e selau, ‘āfai e leiloa le tasi, e lē tu‘ua e ia le ivasefulu ma le iva i le vao, ‘ae alu ma sā‘ili i lē na leiloa, se‘ia maua?
5 A maua, ‘ua fa‘afuata ma le ‘oli‘oli.
6 A o‘o atu fo‘i i lona ‘āiga, ‘ua fa‘apotopoto ai ana uō ma ē tuā‘oi ma ia, ‘ua fai atu ‘iā te i latou, ‘‘Ia tatou ‘oli‘oli ia, auā ‘ua ‘ou maua la‘u mamoe na lē iloa.’
7 ‘Ou te fai atu ‘iā te ‘outou, e fa‘apea fo‘i ‘ona tele o le ‘oli‘oli i le lagi i le tagata agasala e to‘atasi e salamō, ‘ae itiiti i ē amiotonu e to‘aivasefulu ma le to‘aiva e lē tusa i ai le salamō.
8 “O ai ‘ea fo‘i le fafine e ana tupe e sefulu, ‘āfai e leiloa ‘iā te ia le tasi tupe, e le tutu ‘ea se molī, ma tafitafi le fale ma matuā sā‘ili i ai, se‘ia maua?
9 A maua, ‘ua fa‘apotopoto ai ana uō ma ē tuā‘oi ma ia, ‘ua fai atu, ‘‘Ia tatou ‘oli‘oli ia, auā ‘ua ‘ou maua le tupe na leiloa ‘iā te a‘u.’
10 ‘Ou te fai atu ‘iā te ‘outou, ‘ua fa‘apea le ‘oli‘oli i luma o agelu a le Atua, ‘ona o le tagata agasala e to‘atasi ‘ua salamō.”
11 ‘Ua fetalai atu o Iesu, “O le tasi tagata e to‘alua ona atali‘i.
12 ‘Ua fai atu le ui‘i i lona tamā, ‘Tamā e, ‘ia e ‘aumai ‘iā te a‘u lo‘u tofi o le ‘oa.’ ‘Ona vaelua lea e ia o ana mea ‘iā te i lā‘ua.
13 ‘Ua mavae nai aso, ‘ona fa‘apotopoto ai lea e le ui‘i mea uma, ‘ua alu malaga i le nu‘u mamao, ‘ua fa‘ata‘ape‘ape ai ana mea i lea nu‘u, ‘ua so‘ona ulavale.
14 ‘Ua uma atu ana mea, ‘ona oge tele ai lea o lea nu‘u, ‘ona fa‘ato‘ā mativa ai lea o ia.
15 ‘Ua alu ia ‘ua nofo i le tasi tagata o lea nu‘u, ‘ua ia ‘auina fo‘i o ia i ona fanua e fafaga ai pua‘a.
16 ‘Ua tupu lona mana‘o i atigi mea e ‘aina e pua‘a ‘ia mā‘ona ai o ia; e leai lava se tasi ‘ua avane sina mea ‘ai ‘iā te ia.
17 ‘Ona atamai ai lea o ia, ‘ua fa‘apea ane, ‘E lē to‘atele ‘ea o ‘au‘auna a lo‘u tamā ‘ua faula‘i a latou areto ‘ua totoe; a o a‘u, ‘ou te matelaina.
18 O le a a‘u tula‘i ma alu i lo‘u tamā, ‘ou te fai atu ‘iā te ia, “Lo‘u tamā e, ‘ua ‘ou agasala i Lē o i le lagi, ‘atoa ma ou luma;
19 ‘ua ‘ou lē toe aogā ‘ona ta‘ua o lo‘u atali‘i; ‘ia e ‘avea a‘u ‘ia pei o se tasi o au ‘au‘auna.”’
20 ‘Ona tula‘i lea o ia, ‘ua alu i lona tamā. ‘Ua iloa mamao atu fo‘i o ia e lona tamā, ‘ona mutimutivale lea o lona alofa, ‘ua momo‘e atu o ia, ‘ua fusi ‘iā te ia ma sogi atu ‘iā te ia.
21 A ‘ua fai mai le atali‘i ‘iā te ia, ‘Lo‘u tamā e, ‘ua ‘ou agasala i Lē o i le lagi, ‘atoa ma ou luma, ‘ua ‘ou lē toe aogā ‘ona ta‘ua o lou atali‘i.’
22 A ‘ua fai atu le tamā i ana ‘au‘auna, ‘‘Aumai ia le ‘ofu tātapuvae e aupito lelei ma fa‘a‘ofu ‘iā te ia ma ‘ia tu‘u se mama i lona lima, ma fa‘ase‘e i ona vae;
23 ‘aumai fo‘i ma le tama‘i povi peti ma fasi, tatou te ‘a‘ai ma ‘oli‘oli;
24 auā o lo‘u atali‘i lenei na oti, ‘ua toe ola mai; na leiloa fo‘i o ia, a ‘ua maua.’ ‘Ona latou ‘oli‘oli ai lea.
25 “Sa i le vao lona atali‘i ulumatua, ‘ua sau o ia, ‘ua latalata mai i le fale, ‘ona fa‘alogo ai lea o ia i la‘aupese ‘ua tā ma le siva.
26 ‘Ua vala‘au atu o ia i le tasi ‘au‘auna, ‘ua fesili atu, po o le a le uiga o nei mea.
27 ‘Ua fai mai le ‘au‘auna ‘iā te ia, ‘‘Ua sau lou uso; ‘ua fasi ai fo‘i e lou tamā le tama‘i povi peti, ‘ina ‘ua toe o‘o mai o ia o ola.’
28 “‘Ona ita tele ai lea o ia, ‘ua lē mafai ‘ona ulufale atu i le fale; ‘ona alu atu ai lea o lona tamā i fafo, ‘ua fa‘aoleole ‘iā te ia.
29 ‘Ona tali mai ai lea o ia, ‘ua fa‘apea mai i lona tamā, ‘Fa‘auta, o tausaga e tele, sa ‘ou ‘au‘auna ai ‘iā te oe, sa leai lava sau poloa‘iga ‘ua ‘ou solia; a ‘e te le‘i ‘aumai lava se tama‘i ‘oti ma a‘u, matou te ‘oli‘oli ai ma a‘u uō.
30 Peita‘i o lou atali‘i lenā, sa na fa‘aumatia au mea fa‘atasi ma fafine talitane, ‘ua sau o ia, ‘ona e fasi lea le tama‘i povi peti ma ia.’
31 ‘Ua fai atu le tamā ‘iā te ia, ‘Lo‘u atali‘i e, tā te nonofo pea ma oe, o a‘u mea uma lava, o au mea fo‘i ia.
32 ‘Ua tatau fo‘i ‘ona tatou fiafia ma ‘oli‘oli, auā o lou uso lenā na oti, a ‘ua toe ola mai; na leiloa fo‘i, a ‘ua maua.’”