1 Sa i le tasi mea o Iesu, ‘ua tatalo, ‘ua uma, ‘ona fai mai lea ‘iā te ia o le tasi o lona ‘au so‘o, “Le Ali‘i e, ‘ia e a‘oa‘o mai ‘iā te i matou i tatalo; e fa‘apei o Ioane fo‘i ‘ona a‘oa‘o i ona so‘o.”
2 ‘Ua fetalai atu o ia ‘iā te i latou, “Pe a ‘outou tatalo, ‘ia ‘outou fai atu:Lo matou Tamā e,‘Ia pa‘ia lou suafa.‘Ia o‘o mai lou mālō.
3 ‘Ia e foa‘i mai ‘iā te i matoui lea aso ma lea aso a matou mea e ‘ai e tatau ma le aso.
4 ‘Ia e fa‘amāgalo ‘iā te i matou‘iā matou agasala.Auā fo‘i, matou te fa‘amāgaloina atu‘iā i latou uma o ē agaleaga mai ‘iā te i matou.‘Aua fo‘i ‘e te ta‘ita‘iina i matou i le fa‘aosoosoga.”
5 ‘Ua fetalai atu fo‘i o ia ‘iā te i latou, “O ai so ‘outou e ana le uō, e alu atu ‘iā te ia i le tulua o po ma fai atu ‘iā te ia, ‘Sole, se‘i ‘aumai ni areto se tolu gafua, ‘ae taui atu;
6 auā ‘ua sau la‘u uō ‘iā te a‘u i lana malaga, ‘ae leai ni a‘u mea e laulau atu i ai.’
7 E tali mai o ia mai totonu o le fale, ‘‘Aua ‘e te fa‘asoesā mai ‘iā te a‘u; ‘ua uma ‘ona pupuni le faitoto‘a, ‘ua matou ta‘o‘oto ma la‘u fānau; ‘ou te lē mafai ‘ona tula‘i e avatu mā oe.’
8 ‘Ou te fai atu ‘iā te ‘outou, E ui lava ‘ina lē tula‘i o ia, ma avatu ‘iā te ia, ‘ona o ia o lana uō, ‘ae tula‘i ma avatu mea uma e mana‘o ai o ia, ‘ona o lana fa‘atauānau ane.
9 “‘Ou te fai atu fo‘i a‘u ‘iā te ‘outou: ‘Ia ‘outou ole atu, ‘ona foa‘iina mai ai lea ‘iā te ‘outou; ‘ia ‘outou sā‘ili, ‘ona ‘outou maua ai lea; ‘ia ‘outou tu‘itu‘i atu, ‘ona tōina mai ai lea ‘iā te ‘outou.
10 Auā ‘ai sē ole atu, e maua e ia; o lē sā‘ili, e iloa e ia; o lē tu‘itu‘i, e tōina mai ‘iā te ia.
11 O ai se tamā ‘iā te ‘outou e avatu ‘ea e ia i lona atali‘i se ma‘a, pe a ole mai se areto? Pe a ole mai se i‘a, e avatu ‘ea ‘iā te ia se gata ‘ae lē o se i‘a?
12 Pe a ole mai se fuāmoa, e avatu ‘ea ‘iā te ia se akarava?
13 O lenei, o ‘outou e leaga, ‘āfai ‘ua iloa e ‘outou ‘ona avatu o mea lelei mā a ‘outou fānau; e lē sili ‘ea ‘ona foa‘iina mai e lo ‘outou Tamā o i le lagi le Agaga Pa‘ia i ē ole atu ai ‘iā te ia?”
14 Sa tuli e Iesu le temoni, ‘ua gūgū fo‘i o ia; ‘ua alu i fafo le temoni, ‘ona gagana ai lea o le gūgū, ‘ua ofo ai lava le motu o tagata.
15 Peita‘i o isi o i latou ‘ua fai ane, “O Pelesepulo le ali‘i o temoni, ‘ua tulia ai e ia o temoni.”
16 O isi fo‘i ‘ua tofotofo ‘ua sā‘ili mai ‘iā te ia se fa‘ailoga mai le lagi.
17 A ‘ua silafia e ia o latou manatu, ‘ona fetalai atu lea ‘iā te i latou, “O mālō uma e fevaevaea‘i e fa‘aumatia ia, e palasi fale i luga o fale.
18 ‘Āfai fo‘i e fevaevaea‘i Satani, pe fa‘apefea ‘ea ‘ona tumau o lona mālō? Auā ‘ua ‘outou fai mai, o Pelesepulo e tulia ai e a‘u o temoni.
19 ‘Āfai o Pelesepulo e tulia ai e a‘u o temoni, ‘ia po ai e tulia ai temoni e a ‘outou fānau? O lea, e fai ai i latou ma fa‘amasino ‘iā te ‘outou.
20 ‘Ae ‘āfai o le ‘a‘ao o le Atua ‘ou te tulia ai temoni, ‘ua o‘o mai lava ‘iā te ‘outou le mālō o le Atua.
21 “A leoleoina e le tagata malosi ma lana ‘au‘upega lona fale, ‘ona saogalemū ai lea o ana mea.
22 ‘Ae ‘āfai e oso atu ‘iā te ia le tasi e sili lona malosi ‘iā te ia, ‘ua manumālō i ai, ‘ona fao ai lea o lana ‘au‘upega uma na ia fa‘atuatua i ai, ma tufatufa i ana mea na fao.
23 “O sē lē ‘au ‘iā te a‘u, e ‘au ‘ese lea ‘iā te a‘u, o sē lē fa‘aputu fa‘atasi ma a‘u, e fa‘ata‘ape‘ape lea.
24 “Pe a alu le agaga leaga i fafo o le tagata, ‘ua fealualua‘i o ia i mea matūtū, ‘ua sā‘ili se mapusaga, ‘ae lē maua; ‘ona fai ane lea, ‘‘Ou te toe fo‘i i lo‘u fale na ‘ou sau ai.’
25 ‘Ua o‘o i ai, ‘ona iloa ai lea, ‘ua uma ‘ona tafitafi ma teuteu.
26 ‘Ona alu ai lea o ia, ‘ua na ‘aumaia isi agaga e to‘afitu, e sili lo latou leaga ‘iā te ia; ‘ona latou ulufale ai lea, ‘ua nonofo ai; ‘ona sili ai lea o le leaga le tulaga o lea tagata i lo le tulaga muamua.”
27 O lo‘o fetalai ane o ia i nei mea, a ‘ua ‘alaga tele mai ai le tasi fafine mai le motu o tagata, ‘ua fa‘apea mai ‘iā te ia, “‘Amu‘ia le manava na fānau mai ai oe ma susu na e susu ai.”
28 A ‘ua fetalai atu o ia, “E moni, ‘ae sili ‘ona manuia o ē fa‘alogo i le afioga a le Atua ma tausi i ai.”
29 ‘Ua lolofi mai le motu o tagata, ‘ona fetalai atu ai lea o ia, “O le tupulaga leaga lenei, ‘ua sā‘ili mai se fa‘ailoga, ‘ae lē avatu i ai se fa‘ailoga, tau lava o le fa‘ailoga o Iona le perofeta.
30 Auā pei ‘ona fai Iona ma fa‘ailoga ‘iā Nineva, e fa‘apea fo‘i le Atali‘i o le tagata i le tupulaga nei.
31 O le tupu fafine o le itū i saute e tula‘i o ia i le fa‘amasinoga ma tagata o le tupulaga nei, e fa‘asala fo‘i e ia ‘iā te i latou; auā na sau o ia mai le tulu‘iga o le lalolagi e fa‘alogo i le poto o Solomona; fa‘auta fo‘i, o ‘i‘inei lava lē sili ‘iā Solomona.
32 E tutū tagata o Nineva i le fa‘amasinoga fa‘atasi ma le tupulaga nei, e fa‘asala i ai; auā na latou salamō i le tala‘iga a Iona; fa‘auta fo‘i, o ‘i‘inei lava lē sili ‘iā Iona.
33 “E leai sē tutu i le molī ma tu‘u i le mea lilo, po o i lalo o le mea e fua a‘i saito, ‘ae tu‘u i luga lava o le tu‘ugāmolī, ‘ina ‘ia iloa mai ai le malamalama i ē ulufale mai.
34 O mata o le molī lea o le tino; o lenei, pe ‘āfai ‘ua lelei ou mata, e malamalama uma ai lou tino; ‘ae ‘āfai ‘ua leaga, e pouliuli ai lou tino.
35 O lenei, ‘ia oe ne‘i pogisā le malamalama ‘ua i totonu ‘iā te oe.
36 ‘Āfai fo‘i ‘ua malamalama lou tino uma, e leai sona pouliuli, e malamalama uma ai, pei ‘ona fa‘amalamalama mai ‘iā te oe o le molī i lona pupula mai.”
37 ‘Ua fetalai o ia, ‘ae fai mai le tasi faresaio ‘iā te ia, la te ‘a‘ai ma ia; ‘ona ulufale lea o ia, ‘ua ta‘oto o taumafa.
38 ‘Ua iloa e le faresaio, ‘ona ofo lava lea ‘ina ‘ua lē mua‘i mulumulu o ia, i le ‘ai ai.
39 ‘Ua fetalai atu le Ali‘i ‘iā te ia, “‘Outou faresaio, ‘ua fa‘amamāina lava e ‘outou le tua o le ipu ma le tanoa, ‘ae peita‘i o totonu o ‘outou ‘ua tūtūmu i mea ‘ua faoa ma le amio leaga.
40 ‘Outou na o valea! o lē na faia le tua, e le‘i faia ‘ea fo‘i e ia o totonu?
41 A ‘ia ‘outou avatu a ‘outou mea e fai ma mea alofa; fa‘auta fo‘i, e mamā ai mea uma ‘iā te ‘outou.
42 “‘Oi talofa fo‘i ‘iā te ‘outou faresaio! auā tou te avatu mea e sefulua‘i le mili, ma le pekano, ma la‘au totō uma e ‘aina, a ‘ua tu‘ua e ‘outou le fa‘amasinoga ma le alofa i le Atua; e tatau pe ana faia nei mea, ‘ae ‘aua fo‘i le tu‘u na mea.
43 ‘Oi talofa ‘iā te ‘outou faresaio! Auā ‘ua manana‘o ‘outou i nofoa sili i sunako ma ‘ia alofaina i malae,
44 ‘Oi talofa ‘iā te ‘outou auā ‘ua tutusa ‘outou ma tu‘ugamau e lilo; o tagata fo‘i o ē ‘ua sāvavali i o latou luga, ‘ua lē iloa e i latou.”
45 ‘Ona fai mai lea o le tasi o le a‘u a‘oa‘o tulafono, ‘ua fa‘apea mai ‘iā te ia, “Le a‘oa‘o e, o lau fetalaiga lenei, ‘ua e fa‘aleaga mai ai ‘iā te i matou.”
46 ‘Ua fetalai atu o ia, “‘Oi talofa ‘iā te ‘outou le ‘au a‘oa‘o tulafono! Auā ‘ua fa‘ae‘e atu e ‘outou avega mamafa i tagata, a o ‘outou, tou te lē tago atu lava i nā avega i so ‘outou tamatama‘i lima.
47 ‘Oi talofa ‘iā te ‘outou. Auā ‘ua ‘outou ati a‘e tu‘ugamau o perofeta; o ‘outou tamā fo‘i, na latou fasioti ‘iā te i latou.
48 O lea, o ‘outou lava o molimau i le amio a o ‘outou tamā ma ‘outou loto i ai, auā na latou fasioti ‘iā te i latou, ‘ae tou te ati a‘e o latou tu‘ugamau.
49 O lea fo‘i ‘ua fetalai mai ai le Poto a le Atua, ‘‘Ou te ‘a‘auina atu ‘iā te i latou perofeta ma ‘aposetolo; latou te fasioti fo‘i nisi ma fa‘asauā i ai,’
50 ‘ina ‘ia su‘ea i le tupulaga nei le toto o perofeta uma ‘ua fa‘amaligiina talu ona fa‘avaeina o le lalolagi.
51 E āfua mai i le toto o Apelu, e o‘o atu i le toto o Sakaria, na fasiotia i le vā o le fatafaitaulaga ma le malumalu; e moni, ‘ou te fai atu ‘iā te ‘outou, e su‘ea lava ia i lenei tupulaga.
52 ‘Oi talofa ‘iā te ‘outou le ‘au a‘oa‘o tulafono! Auā ‘ua ‘avea e ‘outou le ki o le malamalama; tou te lē ulu atu ai, sa ‘outou fa‘alavelave fo‘i i ē a ulu atu.”
53 A o maliu ‘ese o ia i lea mea, na amata loa e le ‘au tusi‘upu ma le ‘au faresaio ‘ona u‘una‘i malosi ‘iā te ia ma fesili fa‘aosooso ‘iā te ia i mea e tele,
54 o lamalama ‘iā te ia ma sā‘ili e tāofi i se ‘upu mai lona fofoga.