1 ‘Ua mavae Apimeleko ‘ona tu mai ai lea e fa‘aola ‘iā Isaraelu o Tulaga le atali‘i o Pua, le atali‘i lea o Toto, o le tagata o Isakara, sa mau o ia i Samira i le mauga o Efaraima,
2 Na ia fa‘amasino ‘iā Isaraelu i tausaga e luafulu ma le tolu, ‘ona oti ai lea o ia, ‘ua tanumia i Samira.
3 ‘Ua mavae o ia ‘ona tu mai ai lea o Iairo le Kiliata; na ia fa‘amasino ‘iā Isaraelu i tausaga e luafulu ma le lua.
4 Sa ‘iā te ia atali‘i e to‘atolugafulu, ē na ti‘eti‘e i asini e tolu sefulu; sa ‘iā i latou o ‘a‘ai e tolu sefulu, ‘ua igoa ai o Havota-iairo ‘ua o‘o mai i le aso nei, o lo‘o i le nu‘u o Kiliata.
5 ‘Ua oti Iairo, ‘ua tanumia i Kamoni.
6 ‘Ona toe amio leaga lea o le fānauga a Isaraelu i luma o le ALI‘I, ‘ua latou ‘au‘auna ‘iā Paala, ma Asaira, ma atua o Suria, ma atua o Saitonu, ma atua o Moapi, ma atua o le fānauga a Amoni, ma atua o Filisitia; a ‘ua, latou tu‘ulafoa‘i i le ALI‘I, ‘ua latou le ‘au‘auna ‘iā te ia.
7 ‘Ona to‘asā tele ai lea o le ALI‘I ‘iā Isaraelu, ‘ua na tu‘uina atu ai i latou i lima o Filisitia, ma lima o le fānauga a Amoni;
8 Sa latou fa‘atigā, ma fa‘asauā i le fānauga a Isaraelu i ia ona po i tausaga e sefulu ma le valu, o le fānauga uma a Isaraelu ē na i le la itū o Ioritana i le nu‘u o sa Amorī i Kiliata.
9 ‘Ona sopo‘ia atu lea o le fānauga a Amoni i Ioritana, latou te tau ma Iuta, ma Peniamina, ma le ‘āiga o Efaraima; ‘ua matuā puapuagāina Isaraelu.
10 ‘Ona ‘alalaga lea o le fānauga a Isaraelu i le ALI‘I, o lo‘o fa‘apea, “‘Ua matou agasala atu ‘iā te oe, ‘ina ‘ua matou tu‘ulafoa‘i i lo matou Atua, a ‘ua matou ‘au‘auna ‘iā Paala.”
11 ‘Ona fetalai mai lea o le ALI‘I i le fānauga a Isaraelu, “E lē o Aikupito ‘ea, ma sa Amorī, ma le fānauga a Amoni, ma Filisitia;
12 ma sa Saitonū, ma Amaleka, ma Meona, sa latou fa‘asauāina ‘outou, ‘ona ‘outou vala‘au mai lea ‘iā te a‘u, ma ‘ou fa‘aolaina ‘outou a‘i o latou lima.
13 A o ‘outou, ‘ua ‘outou tu‘ulafoa‘iina a‘u, ma ‘ua ‘outou ‘au‘auna i atua ‘ese; o le mea lea ‘ou te lē toe fa‘aola ai ‘iā te ‘outou.
14 Ō ia, ‘inā vala‘au i atua ‘ua ‘outou loto i ai, se‘i latou fa‘aola ‘iā te ‘outou i ona po o le ‘outou puapuagā.”
15 ‘Ona fai atu lea o le fānauga a Isaraelu i le ALI‘I, “‘Ua matou agasala, ‘ia e faia ‘iā te i matou mea uma ‘ua e finagalo i ai; tau lava ‘ina e lavea‘i mai ‘iā te i matou i lenei aso.”
16 ‘Ona latou tu‘u ‘ese lea o atua ‘ese sa ‘iā te i latou, ma latou ‘au‘auna i le ALI‘I; na tigāina lona finagalo ‘ona o le puapuagā o Isaraelu.
17 ‘Ua fa‘apotopotoina le fānauga a Amoni, ma latou tō lauapi i Kiliata; ‘ona fa‘apotopoto lea o le fānauga a Isaraelu, ‘ua tolauapi i latou i Mesepa.
18 ‘Ona fai ane lea o le nu‘u ma ali‘i o Kiliata o le tasi i le tasi, “O ai se tasi na te amata ‘ona tau ma le fānauga a Amoni? e fai o ia ma ali‘i sili i ē nonofo uma lava i Kiliata.”#