1 ‘Ua alu atu Samasoni i Kasa, ‘ona iloa ai lea e ia o le fafine talitane; ‘ua ia alu ane ‘iā te ia.
2 ‘Ona ta‘uatua lea ‘iā Kasa, ‘ua fa‘apea, “‘Ua sau Samasoni ‘i‘inei,” ‘Ona latou si‘osi‘o ai lea ma lamalama ‘iā te ia ‘ua aoina le po, i le faitoto‘a o le ‘a‘ai; ‘ua ‘atoa le po o fa‘alologo i latou, o lo‘o fa‘apea, “Tatou te fasia o ia pe a malama a‘e le taeao.”
3 ‘Ua ta‘oto Samasoni, ‘ua o‘o i le tulua o po ma ao; ‘ona tula‘i lea o ia i le tulua o po ma ao, ‘ua tago atu i puipui o le faitoto‘a o le ‘a‘ai ma pou e lua, ‘ua na fā‘ia ‘atoa ma le fa‘amau, ‘ua fa‘ae‘e i lona ‘ua, ma ‘ava‘e i le tumutumu o le mauga sa feagai ma Heperona.
4 E mulimuli ane ‘ua ia mana‘o i le fafine i le vanu o Soreka, o Talila lona igoa.
5 ‘Ona ō a‘e lea ‘iā te ia o ali‘i o Filisitia, ‘ua latou fai atu ‘iā te ia, “‘Ia e fa‘aoleole ‘iā te ia, ‘ina ‘ia iloa po o le a lona malosi tele, pe se a fo‘i se mea matou te mālō ai ‘iā te ia, ma fusifusi ‘iā te ia ‘ina ‘ia fa‘atigāina o ia; o i matou fo‘i, matou te ta‘itasi ma avatu ai ‘iā te oe o tupe e tasi le afe ma le selau e tasi.”
6 ‘Ua fai mai Talila ‘iā Samasoni, “Se‘i e ta‘u mai ‘iā te a‘u, po o le a ‘e te malosi tele ai? pe se a fo‘i se mea e fusifusia ai oe ‘ina ‘ia fa‘atigāina oe?”
7 ‘Ua fai atu Samasoni ‘iā te ia, “‘Āfai latou te fusifusia a‘u i maea mata e fitu e le‘i fa‘apopoina, ‘ona vaivai ai lea o a‘u, e ‘avea fo‘i e pei o se tasi tagata.”
8 ‘Ona ‘ava‘e lea ‘iā te ia e ali‘i o Filisitia o maea mata e fitu, e le‘i fa‘apopoina, ‘ua ia fusifusia a‘i o ia.
9 Sa nonofo ma ia i le afeafe o ē lamalama; ‘ua ia fai mai ‘iā te ia, “Samasoni e, ‘ua ō mai ‘iā te oe o Filisitia.” ‘Ona motusi lea e ia o maea e pei ‘ona motusi le manoa lino ‘ua mū i le afi; ‘ua lē iloa po o le a lona malosi.
10 ‘Ua fai mai Talila ‘iā Samasoni, “Fa‘auta, ‘ua e pelogia a‘u, ‘ua e fai mai fo‘i mea pepelo; o lenei, se‘i e ta‘u mai lava ‘iā te a‘u, po o le a e fusifusi a‘i oe.”
11 ‘Ona fai atu lea o ia ‘iā te ia, “‘Āfai e matuā fusifusia a‘u i maea fou, e le‘i fai a‘i se galuega, ‘ona ‘ou vaivai ai lea, e ‘avea fo‘i a‘u e pei o se tasi tagata.”
12 ‘Ona ‘ave lea e Talila o maea fou, ‘ua na fusifusia a‘i o ia, ‘ona fai mai lea o ia ‘iā te ia, “Samasoni e, ‘ua ō mai Filisitia ‘iā te oe.” Sa nonofo i le afeafe o ē lamalama; ‘ona ia motusi ai lea o maea a‘i ona lima e pei o se manoa.
13 ‘Ona fai mai lea o Talila ‘iā Samasoni, “‘Ua o‘o mai i lenei aso ‘ua e pelogia a‘u ma ē fai mai mea pepelo ‘iā te a‘u ‘inā ta‘u mai ia ‘iā te a‘u, pe se a se mea e fusifusia a‘i oe.”‘Ona fai atu lea o ia ‘iā te ia, “‘Āfai ‘e te laga fuafuati e fitu o lo‘u lauulu fa‘atasi ma le ala o le ‘ie.”
14 ‘Ua ia fa‘amauina i le fa‘amau, ‘ona fai mai lea o ia ‘iā te ia, “Samasoni e, ‘ua ō mai ‘iā te oe o Filisitia.” ‘Ona ala lea o ia na moe, ‘ua na lia‘iina le fa‘amau o le mea ‘ua lalagaina, ‘atoa ma le ala o le ‘ie.
15 ‘Ona fai mai lea o ia ‘iā te ia, “Pe fa‘apefea ‘ona e fai mai, ‘‘ua e alofa mai ‘iā te a‘u,’ ‘ae lē ‘iā te a‘u lou loto? ‘ua e pelogia a‘u. O le atu tolu lenei ‘e te le‘i ta‘u mai ‘iā te a‘u, po o le a lou malosi tele.”
16 ‘Ua o‘o ‘ina fa‘atigā ‘iā te ia i lona fai mai i aso uma, ‘ua na fa‘atauānauina o ia; ‘ona fa‘avaivai ai lea o lona loto, a oti.
17 ‘Ona ta‘u atu ai lea ‘iā te ia o lona loto uma, ‘ua fai atu ‘iā te ia, “E le‘i o‘o se tafi i lo‘u ulu; auā o a‘u o le naseri i le Atua, talu ‘ina fānau mai; ‘āfai e tafi lo‘u lauulu, ‘ona mavae ai lea o lo‘u malosi, ‘ou te vaivai, e ‘avea fo‘i a‘u e pei o se tasi tagata.”
18 ‘Ua iloa e Talila ‘ua na ta‘u atu ‘iā te ia lona loto uma, ‘ona ia fe‘au atu lea, ma ‘a‘ami i ali‘i o Filisitia, o lo‘o fa‘apea, “‘Inā maliu mai ia, o le toe siliga lenei, auā ‘ua na ta‘u mai ‘iā te a‘u lona loto uma lava.” ‘Ona ō a‘e lea ‘iā te ia o ali‘i o Filisitia, ‘ua latou ‘ava‘e fo‘i tupe i o latou lima.
19 ‘Ua na fa‘amoe ‘iā te ia i ona vae; ‘ona vala‘au lea i le tagata e tafi i fuafuati e fitu o lona lauulu, ‘ona āfua ai lea e ia ‘ona fa‘atigā ‘iā te ia; ‘ua mavae lona malosi ai ‘iā te ia.
20 ‘Ua fai mai o ia, “Samasoni e, ‘ua ō mai Filisitia ‘iā te oe.” ‘Ua ala ia na moe, ‘ona fai ane lea, “‘Ou te alu atu e pei ‘ona mua‘i fai ma ou lūlū ‘iā te a‘u.” A o ia na te le‘i iloa, ‘ua afio ‘ese le ALI‘I ‘iā te ia.
21 ‘Ona pu‘e lea e Filisitia ‘iā te ia, ‘ua sasali ona mata; ‘ua ‘ave ifo ‘iā te ia i Kasa, ma nonoa ‘iā te ia i fusi ‘apamemea e lua; ‘ua ia olo saito fo‘i i le fale puipui.
22 A ‘ua amata ‘ona toe tupu o le lauulu i lona ulu, e pei o ona po na lē tafia.
23 ‘Ua potopoto ali‘i o Filisitia e fai le taulaga tele ‘iā Takono lo latou atua, ma fiafia ai; ‘ua latou fa‘apea, “‘Ua tu‘uina mai Samasoni lo tatou fili i o tatou lima e lo tatou atua.”
24 ‘Ua iloa o ia e le nu‘u, ‘ona latou vivi‘i lea i lo latou atua, auā ‘ua fa‘apea i latou, “‘Ua tu‘uina mai i o tatou lima e lo tatou atua o lo tatou fili, o lē na moana ai lo tatou fanua, ma na fasia o tatou e to‘atele.”
25 ‘Ua o‘o ‘ina fiafia o latou loto, ‘ona latou fai ane lea, “Vala‘au ia Samasoni, se‘i tatou tapisa a‘i ai.” ‘Ona latou ‘amia lea o Samasoni a‘i le fale puipui, ‘ua tapisa ai i latou; ‘ua latou fa‘atūina o ia i le vā o poutū.
26 ‘Ua fai atu Samasoni i le taule‘ale‘a, lē na tāofi i lona lima, “Tu‘u mai ia o a‘u, se‘i ‘ou tagotago atu i pou e mau ai le fale, ‘ou te fa‘alagolago atu i ai.”
27 Sa tumu le fale i tane ma fafine; sa i ai o ali‘i uma o Filisitia; sa i luga o le fale, pe ‘atoa se tolu gaafe o tane ma fafine, o lo‘o maimoa ‘iā Samasoni, o lo‘o fa‘aataina.
28 ‘Ona vala‘au lea o Samasoni i le ALI‘I ‘ua fai atu, “Le ALI‘I e, le Atua ‘ia e manatu mai ma ē fa‘amalosi mai tau lava i lenei toe mea, le Atua e, ‘ina ‘ia ‘ou taui ma sui fa‘atasi ‘iā Filisitia i o‘u mata e lua.”
29 ‘Ona lolo‘u ai lea e Samasoni i pou e lua i totonu na mau ai le fale, ma lagolago ai, o le tasi i lona lima taumatau ma le tasi i lona lima tauagavale.
30 ‘Ua fai atu Samasoni, “‘Ia ‘ou oti fa‘atasi ma Filisitia.” ‘Ona punou fa‘amalosi lea, ‘ua pa‘ū le fale i luga o ali‘i, ma luga o le nu‘u uma sa i ai; sa to‘atele ē na fasiotia e ia i lona oti i ē na fasiotia a o ola ia.
31 ‘Ona ō ifo lea o ona uso ma le ‘āiga uma o lona tamā, ‘ua latou si‘itia o ia, ma ‘ava‘e, ‘ua tanu ‘iā te ia i le vā o Soraa ma Esetaola i le tu‘ugamau o Manoa lona tamā. ‘Ua ia fa‘amasino ‘iā Isaraelu i tausaga e luafulu.#