1 ‘Ona pepese ai lea o Tepora ma Parako le atali‘i o Apinoamo i lea lava aso, ‘ua fa‘apea atu,
2 “Auā o le ta‘ita‘iina o Isaraelu e ali‘i ta‘i ‘au,ma le ofo fua mai o le nu‘u,‘ia ‘outou fa‘amanū i le ALI‘I.
3 “‘Inā fa‘afofoga mai ia ‘outou tupu;ali‘i e, ‘inā liliu mai ia o ‘outou fofoga.O a‘u, ‘ou te pese lava a‘u i le ALI‘I,‘ou te fai pesega i le ALI‘I le Atua o Isaraelu.
4 “Le ALI‘I e, na e afio atu nai Seira,na e afio atu ai le lau‘ele‘ele o Etoma,‘ona lūlūina ai lea o le lalolagi, na tautulu ifo le lagi.O ao fo‘i ‘ua tautulu ifo ai le vai.
5 Na tafe ifo mauga i luma o le ALI‘I,o lea lava Sinai i luma o le ALI‘I le Atua o Isaraelu.
6 “O ona po o Samekara le atali‘i o Anato;o ona po o Iaeli,na gase ai ala tele,na ui atu ai malaga i ala ‘alo.
7 ‘Ua leai ni ta‘ita‘i ‘iā Isaraelu; ‘ua leai lava;‘ua o‘o i ona po na tula‘i atu ai a‘u o Tepora;na tula‘i atu ai a‘u o le tinā i Isaraelu.
8 Na latou filifilia atua fou,‘ona o‘o ai lea o le tau‘a i faitoto‘a.Na iloa ‘ea se talitā po o se tao,i le fagafulu o afe o Isaraelu?
9 ‘Ua ua‘i atu lo‘u loto i faipule o Isaraelu,o ē na ofo fua i le nu‘u.‘Ia ‘outou fa‘amanū atu i le ALI‘I.
10 “O ‘outou o ē ti‘eti‘e i asini sisina,o ‘outou o ē nonofo i ‘ie lelei,o ‘outou fo‘i o ē sāvavali i le ala.‘ia ‘outou talatala i ai.
11 Auā o le leo o ē tufatufa vete i mea e utu ai vai,latou te ta‘u atu le amiotonu a le ALI‘I i lea mea,o le amiotonu i ona ta‘ita‘i i Isaraelu.“‘Ona ō ifo ai lea o le nu‘u o le ALI‘I i faitoto‘a.
12 “Ala mai, ala mai ia, Tepora e;ala mai, ala mai ia; ia e pese i le vi‘i.Tula‘i mai ia, Parako e, o oe na le atali‘i o Apinoamo,ia ē ta‘ita‘i i le tāfeaga ou tagata o tau‘a.
13 ‘Ona ‘ou fa‘apea ai lea, ‘inā ō ifo ia ē ‘ua totoe i ali‘i o le nu‘u;le ALI‘I e, ‘inā e afio ifo ‘iā te a‘u e tau ma ē ‘ua malolosi.
14 Mai Efaraima o ē mau i Amaleka;e mulimuli atu ‘iā te oe o Peniamina fa‘atasi ma lou nu‘u.Mai Makira na ō ifo ai faipule;mai Sepulona fo‘i o ē ‘ua u‘u le to‘oto‘o o lē ‘avea ‘au.
15 O ali‘i o Isakara sa ia Tepora;o Isakara e pei o Parako lava ia,na ‘auina i le vanu e mulimuli atu ‘iā te ia.O i vaitafe o Reupena,sa tele ai filifiliga o le loto.
16 Se a le mea na e nofo ai i lotoā mamoe,e fa‘alogologo ai i le leo o le fagufagu a le ‘au leoleo mamoe?O i vaitafe o Reupena,sa tele ai filifiliga o le loto.
17 Na nofo fo‘i Kiliata i le la itū o Ioritana,se a fo‘i le mea na nofo ai Tanu i va‘a?Na nofo fo‘i Asera i le afaga,‘ua nofo lava i ona faga.
18 O Sepulona o le nu‘u lea na tu‘ulafoa‘iina lona ola ‘ia oti,e fa‘apea fo‘i Nafatali i mea maualuluga o le nu‘u.
19 “‘Ua ō mai tupu, ‘ua latou tau;‘ona tau ai lea o le tau‘a o tupu o Kanana i Tanaka,e latalata ane i le vai i Mekito;latou te le‘i maua lava ni ‘oloa ario.
20 Na latou tau mai le lagi;‘ua tau lava ma Sesera,o fetū i o latou ala.
21 Na tafea i latou i le alia o Kisona;o le alia lea o le vavau, o le alia o Kisona.Lo‘u agaga e, ‘ua e solia lē ‘ua malosi.
22 “‘Ona nuti ai lea o atigivae o solofanua, ‘ona o taufetuliga,o taufetuliga lava o ana ‘au malosi.
23 ‘Ua fai mai le agelu a le Ali‘i,“‘Ia ‘outou fa‘afano ‘iā Merosa,‘ia ‘outou matuā fa‘afano lava i ē o nonofo ai,auā na latou lē ō mai e fesoasoani i le ALI‘I;e fesoasoani i le ALI‘I, e tau ma ē ‘ua malolosi.
24 “E sili le manuia o Iaeli i fafine uma,o le avā lea a Kaveru o le sa Kenī;e sili lona manuia i fafine uma o i fale ‘ie.
25 Na ole mai o ia i se vai, ‘ona avatu ai lea e ia o le suāsusu;na ia avane le suāsusu; to‘a i le ipu tāua.
26 Na tago atu lona lima i le fao ma lona lima taumatau i le samala,a le tufuga; ‘ona ta lea e ia ‘iā Sesera,‘ua momomo ai lona ulu;na ia tu‘i ‘ua ati i ona manifinifi.
27 ‘Ua punou, ‘ua pa‘ū,‘ua ta‘oto i ona vae.‘Ua punou, ‘ua pau i ona vae,o le mea na punou ai o ia, na pa‘ū oti ai lava.
28 “Na va‘ava‘ai atu i le fa‘amalama le tinā o Sesera,na ia ‘alaga atu i le mea fa‘amata‘upega o le fa‘amalama.‘Se a le mea ‘ua tuai mai ai lona kariota?Se a le mea ‘ua tuai ai ‘ona o‘o mai o ona kariota?’
29 ‘Ona tali mai ai lea ‘iā te ia o tama‘ita‘i popoto na ‘iā te ia,o ia lava ‘ua toe fai atu o ia ‘iā te ia,
30 ‘Latou te le‘i maua ‘ea? Latou te le‘i tufatufaina ‘ea o vete?e ta‘ito‘atasi ma se teine e to‘atasi pe to‘alua;o le vete o ‘ofu lanu ‘ese‘ese a Sesera,o le vete o ‘ofu lanu ‘ese‘ese ‘ua matagofie.o le ‘ofu lanu ‘ese‘ese ‘ua fa‘amatagofie i itū e lua,mo ua o ē ‘ua i ai vete.’
31 “Le ALI‘I e, ‘ia fa‘apea ‘ona fanoia ‘atoa uma o ē ita ‘iā te oe;a o ē ‘ua alolofa atu ‘iā te ia, ‘ia pei o le lā i latou ‘ina o mū toto‘a.”‘Ona filemū lea o le nu‘u i tausaga e fagafulu.