1 ‘Ona fa‘apotopoto lea o tagata o Efaraima, ‘ua latou ō ane i le itū i matū, ‘ua latou fai mai ‘iā Iefata, “Se a le mea na e alu atu ai e tau ma le fānauga a Amoni, a ‘ua lē ‘a‘ami ‘iā i matou, se‘i tatou ō ma oe? Matou te susunu lou fale i luga o oe i le afi.”
2 ‘Ua fai atu Iefata ‘iā i latou, “Sa tele lo matou fefinaua‘iga, o a‘u, ma lo‘u nu‘u, i le ma le fānauga a Amoni; ‘ona ‘ou ‘a‘ami lea ‘iā te ‘outou, a ‘ua ‘outou lē fa‘aola mai ‘iā te a‘u a‘i o latou lima;
3 na ‘ou iloa tou te le‘i fa‘aola mai, ‘ona ‘ou tu‘u atu lea o lo‘u ola i lo‘u lima, ma ‘ou alu atu i le fānauga a Amoni; ‘ua tu‘uina mai fo‘i i latou i lo‘u lima e le ALI‘I. O le a fo‘i le mea ‘ua ‘outou ō mai ai ‘iā te a‘u i lenei aso e si‘i mai le tau‘a ‘iā te au?”
4 ‘Ona fa‘apotopoto lea e Iefata tagata uma o Kiliata, ‘ua tau ma Efaraima. ‘Ua fafasi e tagata o Kiliata ‘iā Efaraima, auā na latou fai ane, “O ē na sōsōla mai Efaraima, ‘outou na i Kiliata, o i Efaraima ma Manase.”
5 Na maua fo‘i e Kiliata asaga o Ioritana, na muamua i Efaraima; i le, a fai mai e na sōsōla o Efaraima, “Se‘i ‘ou asa atu;” ‘ona fai ane lea o tagata o Kiliata ‘iā te ia, “O oe ‘ea o se Efaraima?” ‘Ua fai mai o ia, “E leai.”
6 ‘Ona latou fai atu lea ‘iā te ia, “Fai mai, o Seepoleta;” ‘ona fai mai lea o ia, “O Sepoleta,” auā na te lē mafai ‘ona tautala fa‘apea ‘ona latou pu‘e lea ‘iā te ia ma fasi ‘iā te ia i asaga o Ioritana. O ona po ia na fasiotia e Efaraima e fagafulu o afe ma afe e lua.
7 Na fa‘amasino Iefata ‘iā Isaraelu i tausaga e ono; ‘ona oti lea o Iefata le Kiliata, ‘ua latou tanu ‘iā te ia i le tasi ‘a‘ai o Kiliata.
8 ‘Ua mavae atu o ia, ‘ona fa‘amasinoina lea o Isaraelu e Ivisona le Peteleema.
9 Sa ‘iā te ia o atali‘i e to‘atolugafulu ma afafine e to‘atolugafulu; ‘ua ia ‘au‘eseina ona afafine e to‘atolugafulu; ‘ua ‘aumai fo‘i mai tuā avā e to‘atolugafulu ma ona atali‘i; ‘ua ia fa‘amasino ‘iā Isaraelu i tausaga e fitu.
10 ‘Ona oti lea o Ivisona ‘ua tanumia o ia i Peteleema.
11 ‘Ua mavae atu o ia, ‘ona fa‘amasino lea ‘iā Isaraelu o Aluna le Sepulona; ‘ua ia fa‘amasino ‘iā Isaraelu i tausaga e sefulu.
12 ‘Ona oti lea o Aluna le Sepulona; ‘ua tanumia o ia i Ailona, i le nu‘u o Sepulona.
13 ‘Ua mavae atu o ia, ‘ona fa‘amasino lea ‘iā Isaraelu o Apetonu le atali‘i o Ileli le Piratonu.
14 Sa ‘iā te ia atali‘i e to‘afagafulu, ma atali‘i o ona atali‘i e to‘atolugafulu, ē na ti‘eti‘e i asini e fitugafulu; ‘ua ia fa‘amasino ‘iā Isaraelu i tausaga e valu.
15 ‘Ona oti lea o Apetonu le atali‘i o Ileli le Piratonu; ‘ua tanumia, o ia i Piratonu i le nu‘u o Efaraima i le mauga o sa Amalekā.