1 O nu‘u fo‘i ia na tu‘ua e le ALI‘I e tofotofoina e i latou o Isaraelu, o i latou uma o ē na lē iloa tau‘a uma o Kanana.
2 Tau ‘ina ‘ia iloa e tupulaga o le fānauga a Isaraelu e a‘oa‘o ‘iā te i latou i le tau‘a, o i latou fo‘i lava na lē iloa anamua;
3 o ali‘i e to‘alima o Filisitia, ma sa Kanana uma, ma sa, Saitonū, ma sa Hevī o ē nonofo i le mauga o Lepanona, e pau atu i le mauga o Paala-heremone e o‘o i le ala o Amato.
4 Na i ai i latou ‘ina ‘ia tofotofoina Isaraelu e i latou, ‘ina ‘ia iloa pe latou te fa‘alogo i poloa‘iga a le ALI‘I na ia poloa‘i atu ai i o latou tamā na o‘o mai ‘iā Mose.
5 ‘Ua nonofo le fānauga a Isaraelu fa‘atasi ma sa Kananā, o sa Hetī, ma sa Amorī, ma sa Perisē ma sa Hevī, ma sa Iepusē.
6 ‘Ona latou fai avā lea i o latou afafine; ‘ua latou avatu fo‘i o latou afafine i o latou atali‘i, ma latou ‘au‘auna atu i o latou atua.
7 ‘Ua amio leaga le fānauga a Isaraelu i luma o le ALI‘I; ‘ua latou fa‘agalogalo fo‘i i le ALI‘I lo latou Atua, a ‘ua latou ‘au‘auna atu ‘iā Paala ma Asaira.
8 O le mea lea na tupu tele ai le to‘asā o le ALI‘I ‘iā Isaraelu, na ia tu‘uina atu i latou i le lima o Kusarisatima, o le tupu lea o Mesopotamia; ‘ona ‘au‘auna lea o le fānauga a Isaraelu ‘iā Kusa-risatima i tausaga e valu.
9 ‘Ua ‘alalaga atu le fānauga a Isaraelu i le ALI‘I, ‘ona fa‘atūina ai lea e le ALI‘I o le fa‘aola mo le fānauga a Isaraelu, na ia fa‘aolaina i latou, o Otinielu lea, o le atali‘i o Kinasa, o le uso itiiti o Kalepo.
10 ‘Ua o‘o ‘iā te ia le Agaga o le ALI‘I, ‘ona fa‘amasino lea e ia o Isaraelu, ‘ua alu atu fo‘i o ia i le tau‘a, ‘ona tu‘uina mai lea e le ALI‘I i lona lima o Kusarisatima le tupu o Mesopotamia; ‘ua manumālō fo‘i o ia ‘iā Kusarisatima.
11 ‘Ona filemū ai lea o le nu‘u i tausaga e fagafulu. ‘Ona oti lea o Otinielu le atali‘i o Kinasa.
12 ‘Ua toe amio leaga le fānauga a Isaraelu i luma o le ALI‘I, ‘ona fa‘amalosi ai lea e le ALI‘I ‘iā Ekelona le tupu o Moapi e tau ma Isaraelu, ‘ina ‘ua latou amio leaga i luma o le ALI‘I.
13 ‘Ua ia fa‘apotopoto ane ‘iā te ia le fānauga, a Amoni ma Amaleka; ‘ona alu atu lea o ia, māna fasia Isaraelu, ‘ua latou maua fo‘i le ‘a‘ai o pama.
14 ‘Ona ‘au‘auna ai lea o le fānauga a Isaraelu ‘iā Ekelona le tupu o Moapi i tausaga e sefulu ma le valu.
15 A ‘ua ‘alalaga atu le fānauga a Isaraelu i le ALI‘I, ‘ona fa‘atūina ai lea e le ALI‘I o le fa‘aola mo i latou, o Euta lea le atali‘i o Kira o le sa Peniaminā, o le tagata tauagavale ia; ‘ua ‘auina o ia e le fānauga a Isaraelu e momoli le taulaga ‘iā Ekelona le tupu o Moapi.
16 ‘Ua gaosia e Euta māna se pelu e fa‘atauma‘ai itū, o lona umi o le kupita e tasi; ‘ua ia fusia ai fo‘i i lalo i ona ‘ofu i lona vae taumatau.
17 ‘Ua ia avatua le taulaga ‘iā Ekelona le tupu o Moapi; o le tagata ‘ua matuā puta lava Ekelona.
18 ‘Ua uma ‘ona avatua le taulaga, ‘ona ‘a‘auina atu ai lea e ia o le nu‘u na ‘aumai le taulaga,
19 a ‘ua fo‘i mai o ia i le mea o i ai tupua ‘ua ta ‘ua i Kilikala. ‘Ona fai atu ai lea o ia, “Le tupu e, ‘ua ‘iā te a‘u le fe‘au fa‘alilolilo ‘iā te oe.”‘Ona fai mai ai lea o ia, “‘Inā fa‘alologo ia.” ‘Ona o uma atu ai lea nai ‘iā te ia o ē na tutū atu ‘iā te ia.
20 ‘Ua alu atu fo‘i Euta ‘iā te ia, sa nofo o ia i lona afeafe fa‘asavili, e gata ‘iā te ia lava; ‘ona fai atu ai lea o Euta, “‘Ua ‘iā te a‘u le fe‘au mai le Atua ‘iā te oe;” ‘ona tula‘i ai lea o ia nai le nofoa.
21 ‘Ua tu‘u ane e Euta lona lima tauagavale, ma tago i le pelu na i lona vae taumatau, ‘ona tutu‘i atu ai lea e ia i lona manava.
22 ‘Ua galo ‘atoa ma le ‘au o le pelu, ‘ua lilo fo‘i le pelu i le tino ‘ua puta, ‘ua ia lē ma toso ai le pelu nai lona manava, ‘ua ati loa i nofoaga.
23 ‘Ua alu atu Euta i le fa‘apaologa, ‘ua ia pupuni fo‘i i ona tua o puipui o le afeafe, ma fa‘amau ai:
24 ‘Ua alu atu o ia, ‘ona ō mai ai lea o ana ‘au‘auna; ‘ua latou iloa atu, fa‘auta, ‘ua fa‘amauina o puipui o le afeafe; ‘ona latou fai ane ai lea, “Ai lava o lo‘o ufiufi e ia ona ‘a‘ao i le afeafe fa‘asavili.”
25 ‘Ua latou fa‘atali fa‘atali ‘ua mamā i latou; fa‘auta fo‘i, e le‘i tatalaina lava e ia o puipui o le afeafe; ‘ona latou ‘ave ai lea o se ki, ma tatala a‘i; fa‘auta fo‘i, ‘ua pa‘ū i le ‘ele‘ele lo latou ali‘i, ‘ua oti.
26 ‘Ua sola Euta a o fa‘atali i latou, na tuana‘i atu o ia o tupua ‘ua ta, ‘ua sao atu fo‘i i Seirata.
27 ‘Ua o‘o atu ia, ‘ona ili ai lea e ia o le pū i le mauga o Efaraima; ‘ua ō ifo fo‘i ma ia o le fānauga a Isaraelu mai le mauga, na muamua o ia ‘iā te i latou.
28 ‘Ua ia fai atu fo‘i ‘iā te i latou, “‘Ia ‘outou mulimuli mai ‘iā te au; auā ‘ua tu‘uina mai e le ALI‘I o ‘outou fili o Moapi i o ‘outou lima.” ‘Ua latou mulimuli ifo ‘iā te ia, ‘ona latou maua ai lea o asaga o Ioritana e ui atu ai i Moapi; ‘ua lē mafafai i latou ‘ona ui atu ai o se tasi.
29 Na fasia e i latou o Moapi i lea aso pe sefulu ni afe o tagata, ‘ua malolosi ma totoa i latou uma lava, e leai fo‘i se tasi na sao.
30 ‘Ua to‘ilalo Moapi i lea aso i le lima o Isaraelu. ‘Ona filemū ai lea o le nu‘u i tausaga e valugafulu.
31 ‘Ua mavae o ia, ‘ona nofo mai lea o Samekara o le atali‘i o Anato, na fasia e ia o Filisitia e to‘aono selau i le tui povi; o ia fo‘i na ia fa‘aolaina Isaraelu.#