1 ‘Ona ō atu lea o le fānauga uma a Isaraelu, ma ‘ua fa‘apotopotoina le fa‘apotopotoga i le ALI‘I, i Mesepa, e pei se tagata e to‘atasi, e pau mai i Tanu, e pau mai i Peresepa, ‘atoa ma le nu‘u o Kiliata.
2 ‘Ua tutū ai ali‘i o le nu‘u uma, o itū‘āiga uma o Isaraelu i le fa‘apotopotoga o le nu‘u o le Atua, e fa selau o afe o tagata, o ‘au e sāvavali ē ‘ua fai pelu.
3 (‘Ua fa‘alogo le fānauga a Peniamina, ‘ua ō a‘e le fānauga a Isaraelu i Mesepa.)‘Ona fai atu lea o le fānauga a Isaraelu, “Fai mai ia, pe na fa‘apefea ‘ona faia o lenei mea leaga?”
4 ‘Ua tali mai le tagata sa Levī, le tane a le fafine na fasia, ‘ua fa‘apea mai, “Na alu atu i mā‘ua ma la‘u palake i Kipea o Peniamina e moe ai.
5 ‘Ona tula‘i mai lea ‘iā te a‘u o tagata o Kipea, ma latou si‘osi‘o mai ‘iā te a‘u i le fale i le po; na latou manatu e fasioti ‘iā te a‘u, a o la‘u palake ‘ua latou fa‘aleaga ‘iā te ia, ‘ua oti ai.
6 ‘Ona ‘ou tago atu lea i la‘u palake, ma ‘ou pena ‘iā te ia, ma avatu i nu‘u uma o le tofi o Isaraelu; auā ‘ua latou faia le mea leaga ma faivale i Isaraelu.
7 Fa‘auta, o ‘outou uma o le fānauga a Isaraelu, ‘inā filifili ia ‘outou ‘i‘inei so ‘outou manatu.”
8 ‘Ona tula‘i lea o le nu‘u uma pei se tagata e to‘atasi, o lo‘o fa‘apea, “E lē alu so tatou i lona fale ‘ie, e lē fo‘i atu so tatou i lona fale;
9 a o lenei, tatou te faia le mea nei i Kipea; tatou te fai le vili i nisi e ō a‘e ai;
10 tatou te fa‘ifa‘i tagata e to‘asefulu a‘i le to‘aselau i itū‘āiga uma o Isaraelu, ma le to‘aselau i le afe, ma le afe a‘i le sefulu o afe, e fai mea e ‘ai mā le nu‘u; ‘ina ‘ia faia pe a o‘o i latou i Kipea o Peniamina e tusa ma le faivale uma ‘ua latou faia i Isaraelu.”
11 Sa fa‘apotopoto tagata uma o Isaraelu e tau ma le ‘a‘ai; o lo‘o loto gatasi i latou pei se tagata e to‘atasi.
12 ‘Ona ‘a‘auina atu lea e itū‘āiga o Isaraelu nisi tagata i ‘āiga uma o Peniamina, o lo‘o fa‘apea, “O le a lenei mea leaga ‘ua faia e ‘outou?
13 O lenei, ‘inā tu‘u mai ia o na tagata, o tagata ulavavale o lo‘o i Kipea, ‘ina ‘ia matou fasioti ‘iā i latou ma tu‘u ‘ese ai le leaga ‘iā Isaraelu.” ‘Ae lē mafafai le fānauga a Peniamina ‘ona fa‘alogo i le ‘upu a o latou uso le fānauga a Isaraelu.
14 A ‘ua fa‘apotopoto le fānauga a Peniamina i Kipea mai o latou ‘a‘ai, ‘ina ‘ia latou ō atu e tau ma le fānauga a Isaraelu.
15 ‘Ona faitauina lea o le fānauga a Peniamina i lea aso a‘i o latou ‘a‘ai, o afe e luafulu ma le ono gaafe o tagata na fai pelu, ‘atoa ma tagata o Kipea e to‘afitu selau o tagata sili.
16 Sa i ai i nei tagata uma o tagata tauagavale ‘ua sili, e to‘afitu selau; o i latou uma nei e sasau le ma‘a i le ma‘atā i le lauulu, ‘ae lē sesē.
17 ‘Ua latou faitauina fo‘i tagata o Isaraelu, e aunoa ma Peniamina, e fa selau afe o tagata e ‘ua fai pelu; o i latou uma nei o le ‘au tau.
18 ‘Ona latou tula‘i lea, ma ō a‘e i Peteli e fesili atu i le Atua; ‘ua fai atu ai le fānauga a Isaraelu, “O ai ‘ea e muamua ‘ona alu a‘e mo i matou e tau ma le fānauga a Peniamina?”‘Ona fetalai mai lea o le ALI‘I, “E muamua atu Iuta.”
19 ‘Ona tula‘i atu lea o le fānauga a Isaraelu i le taeao, ‘ua tolauapi e feagai ma Kipea.
20 ‘Ona ō atu lea o tagata o Isaraelu e tau ma Peniamina; ‘ona pae tau atu ai lea e tagata o Isaraelu e tau ma Kipea.
21 ‘Ona ō atu ai lea o le fānauga a Peniamina mai Kipea; ‘ua latou fasiotia Isaraelu i lea aso, o tagata e luafulu o afe ma afe e lua.
22 ‘Ua fa‘amalosi le nu‘u, o tagata o Isaraelu, ‘ua latou toe pae tau le tau‘a i le mea na latou pae tau ai i le lua‘i aso.
23 ‘Ona ō a‘e lea o le fānauga a Isaraelu, ma latou fētāgisi i luma o le ALI‘I, ‘ua o‘o i le afiafi, ma latou fesili i le ALI‘I, o lo‘o fa‘apea, “‘Ou te toe fa‘alatalata ‘ea e tau ma le fānauga a Peniamina lo‘u uso?”‘Ua fetalai mai le ALI‘I, “Tou te ō a‘e ‘iā te ia.”
24 ‘Ona fa‘alatalata lea o le fānauga a Isaraelu i le fānauga a Peniamina i le aso e lua.
25 ‘Ona alu atu lea o Peniamina mai Kipea e fa‘afetaia‘i ‘iā te i latou i le aso lua; ‘ona toe fasiotia lea o le fānauga a Isaraelu, e sefulu afe ma afe e valu; o i latou uma nei na fai pelu.
26 ‘Ona ō a‘e lea o le fānauga uma a Isaraelu ma le nu‘u uma, ‘ua latou o‘o atu i Peteli, ma latou fētāgisi, ma nonofo ai i luma o le ALI‘I, ma latou anapopogi i lea aso e o‘o i le afiafi; ‘ua latou faia fo‘i o taulaga mū ‘atoa ma taulaga fa‘afetai i luma o le ALI‘I.
27 ‘Ona fesili lea o le fānauga a Isaraelu i le ALI‘I; (auā sa i ai i le ‘atola‘au o le feagaiga a le Atua i ia ona aso;
28 o Fineaso le atali‘i o Eleasaro, le atali‘i ia o Arona, o ia na tu i ona luma i ia ona aso;) o lo‘o fa‘apea i latou, “‘Ou te toe alu atu ‘ea e tau ma le fānauga a Peniamina lo‘u uso, pe sōia?”‘Ua fetalai mai le ALI‘I, “Ō a‘e ia ‘outou, auā a taeao ‘ou te tu‘uina atu ai i latou i lou lima.”
29 ‘Ona tanu lea o ‘au a Isaraelu e si‘osi‘o ai i Kipea.
30 ‘Ona ō a‘e lea o le fānauga a Isaraelu i le fānauga a Peniamina i le aso tolu, ‘ua pae tau atu le tau‘a ‘iā Kipea, e pei ‘ona ulua‘i faia.
31 ‘Ona ō atu lea o le fānauga a Peniamina e fa‘afetaia‘i i le nu‘u, na tōsina i latou nai le ‘a‘ai; ‘ua amata ‘ona latou taia le nu‘u, ‘ua manunu‘a e pei o isi aso, pe ‘atoa le to‘atolugafulu o tagata o Isaraelu i ala tele, (e alu a‘e ai le tasi i Peteli, a o le tasi e alu atu ai i Kipea i le vao.)
32 ‘Ona fai ane lea o le fānauga a Peniamina, “‘Ua fasia i latou i o tatou luma e pei o le amataga;” a ‘ua fai ane le fānauga a Isaraelu, “Tatou sōsōla ia, ‘ia tōsina ai i latou nai le ‘a‘ai i ala tele.”
33 ‘Ona tula‘i lea o tagata uma o Isaraelu a‘i le mea sa i ai, na latou pae tau le tau‘a i Paalatamara, ma ‘au a Isaraelu sa tanu ‘ua feosofi mai i latou a‘i le mea sa i ai i le fanua o Kipea.
34 ‘Ona ō ane lea e tau ma Kipea o tagata sili mai Isaraelu uma e sefulu afe, na tele lava le tau‘a; a ‘ua latou lē iloa ‘ua o‘o mai le malaia ‘iā te i latou.
35 ‘Ua fasia Peniamina e le ALI‘I i luma o Isaraelu; ‘ua fa‘aumatia Peniamina e le fānauga a Isaraelu i lea aso, o tagata e luafulu o afe ma afe e lima ma le to‘aselau; o i latou uma ia na fai pelu.
36 ‘Ona iloa lea e le fānauga a Peniamina ‘ua fasia i latou; a ‘ua tu‘umuli tagata o Isaraelu ‘iā Peniamina, auā sa latou fa‘alagolago i ‘au na tanu i tala ane o Kipea.
37 ‘Ona fa‘ata‘alise lea o ‘au na tanu, ‘ua feosofi atu i Kipea; ‘ua fa‘asalalau ‘au na tanu, ma latou fasia le ‘a‘ai uma i le pelu.
38 Sa fai lē fa‘ailoga i tagata o Isaraelu ma ē na lalafi; latou te fa‘amū a‘e le mū tele ma le asu nai le ‘a‘ai.
39 ‘Ua liu tua mai tagata o Isaraelu i le tau‘a; ‘ona amata mai lea o Peniamina ‘ona fafasi; ‘ua manunu‘a tagata o Isaraelu, pe ‘atoa le to‘atolugafulu o tagata; auā na fa‘apea ane i latou, “E moni lava ‘ua matuā fasia i latou i o tatou luma, e pei o le lua‘i tau‘a.”
40 A ‘ua amata ‘ona alu a‘e le mumū o le afi nai le ‘a‘ai, o le asu fa‘aniutū, e ona fāliu atu lea i tua o Peniamina, fa‘auta, ‘ua alu a‘e i le lagi le mū o le ‘a‘ai uma.
41 ‘Ua toe liliu mai tagata o Isaraelu, ‘ona fa‘aatuatuvaleina lea o tagata o Peniamina; auā ‘ua latou iloa, ‘ua o‘o ‘iā i latou le malaia.
42 ‘Ona liliu lea o i latou i luma o tagata o Isaraelu i le ala i le vao; a ‘ua pipi‘i atu le tuli ‘iā te i latou; o ē sa i ‘a‘ai ‘ua latou fafasi ‘iā te i latou i o latou vā.
43 ‘Ua si‘omia Peniamina, ma latou tulituliloa ‘iā te i latou, ma soli ‘iā i latou ma le faigofie, e o‘o lava i Kipea i le itū e alu a‘e ai le la.
44 ‘Ua fasia Peniamina e sefulu afe o tagata ma afe e valu; o i latou nei o tagata totoa uma.
45 ‘Ona liliu lea ma sōsōla i latou i le vao i le papa o Rimoni; ‘ua aoao i latou i ala tele e lima gaafe o tagata; ‘ua tulituliloa ‘iā i latou i Kitoma, ma fafasi ai tagata e lua afe.
46 O i latou uma o Peniamina na fasia i lea lava aso, e luafulu o afe ma afe e lima, o tagata na fai pelu; o i latou nei o tagata totoa uma.
47 A o tagata e to‘aono galau na liliu i latou, ma sōsōla i le vao i le papa o Rimoni; ‘ua latou nonofo i le papa o Rimoni i masina e fa.
48 ‘Ua toe fo‘i atu tagata o Isaraelu i le fānauga a Peniamina, ma latou fasia i le pelu o tagata i ‘a‘ai, ‘atoa ma manu, ma mea uma na latou maua; o ‘a‘ai uma fo‘i ‘ua latou o‘o i ai, ‘ua latou fa‘amūina i le afi.