1 O ona po ia sa leai se tupu ‘iā Isaraelu; o ona po fo‘i ia na sā‘ili ai e le itū‘āiga o Tanu se mea e nonofo ai i latou; auā ‘ua o‘o i lea aso e le‘i te‘a atu ‘iā te i latou o latou fanua na tofia i itū‘āiga o Isaraelu.
2 ‘Ua ‘a‘auina e le fānauga a Tanu ai lo latou ‘āiga tagata e to‘alima mai lo latou nu‘u. O tagata totoa, mai Soraa ma Esetaola, e asiasi le nu‘u ma va‘ava‘ai i ai; ‘ua latou fai atu ‘iā te i latou, “O ia, ‘inā ‘outou va‘ava‘ai i le nu‘u.” ‘Ona latou ō lea i le mauga o Efaraima i le fale o Mika, ‘ua latou momoe ai.
3 Sa latalata ane i latou i le fale o Mika, ‘ona latou iloa lea o le leo o le taule‘ale‘a o sa Levī, ‘ua latou afe ai; ‘ona latou fai atu lea ‘iā te ia, “O ai ‘ea na ‘aumaia oe ‘i‘inei? Se a fo‘i sau mea e fai ‘i‘inei? O a ‘ea ni mea ‘ua ‘iā te oe i le mea nei?”
4 ‘Ua ia fai mai ‘iā te i latou, “O lo‘o fa‘apea ‘ona fai e Mika ‘iā te a‘u; na te totogi ‘iā te a‘u, ‘ae fai a‘u ma ositaulaga ‘iā te ia.”
5 ‘Ona latou fai atu lea ‘iā te ia, “‘Ia e fesili i le Atua, ‘ina ‘ia matou iloa, pe manuia la matou malaga matou te ō atu ai?”
6 ‘Ua fai mai le ositaulaga ‘iā te i latou, “O ia ma le manuia; o lo‘o ‘ua silafia e le ALI‘I lo ‘outou ala tou te ui ai.”
7 ‘Ona sāvavali lea o ia tagata e to‘alima, ‘ua o‘o i Laisa, ‘ua latou va‘ava‘ai i le nu‘u sa i ai, ‘ua latou nonofo fa‘atalanoa, e pei o le masani o Saitonu; o lo‘o fīfīlemū, ‘ua fa‘atalanoa lava; ‘ua leai fo‘i se na te fa‘amā ‘iā te i latou i se mea i le nu‘u, se na te pule ai; sa mamao fo‘i latou ma Saitonu, sa latou le fe‘avea‘i mea ma nisi tagata.
8 ‘Ona o‘o lea i o latou uso i Soraa ma Esetaola. ‘Ua fai mai o latou uso ‘iā te i latou, “Se a sa ‘outou tala?”
9 ‘Ua fai atu i latou, “Tula‘i ia, ‘inā tatou ō a‘e ‘iā te i latou, auā ‘ua matou va‘ava‘ai i le nu‘u, fa‘auta, e matuā lelei lava; tou te nofonofo ‘ea? ‘aua ne‘i mumusu e ō atu ‘ia o‘o e fai mo ‘outou le nu‘u.
10 A ‘outou ō atu, ‘ona ‘outou o‘o lea i le nu‘u ‘ua nonofo fa‘atalanoa, ma le fanua lautele; auā ‘ua foa‘i mai ai e le Atua ‘iā te ‘outou le nu‘u e le oge i se mea e tasi i le lalolagi.”
11 ‘Ona ō ai lea a‘i lea mea nisi o le ‘āiga o sa Tanū mai Soraa ma Esetaola, o tagata e to‘aono galau, ‘ua saunia ma ‘au‘upega o le tau‘a.
12 ‘Ua ō a‘e i latou, ma tolauapi i Kiriata-iarima i Iuta; o le mea lea na igoa ai lea mea o Maanetanu, ‘ua o‘o mai i nei ona aso; fa‘auta, o lo‘o i tua o Kiriata-iarima
13 ‘Ona latou ō atu lea a‘i lea mea i le mauga o Efaraima, ‘ua o‘o atu i le fale o Mika.
14 ‘Ona fai mai lea o tagata e to‘alima ē na ō e asiasi i le nu‘u o Laisa, ‘ua fa‘apea mai i o latou uso, “‘Ua ‘outou iloa ‘ea, o i ai i nei fale le efota, ma tupua, ma le tupua ‘ua ta, ma le tupua ario; o lenei, ‘ia filifili se mea e fai.”
15 ‘Ona latou afe ai lea, ‘ua o‘o i le fale o le taule‘ale‘a o le sa Levī, o le fale o Mika, ‘ua latou fealofani ma ia.
16 O tagata e to‘aono galau ‘ua saunia ma ‘au‘upega o le tau‘a, o le fānauga a Tanu, sa tutū i latou i le puipui o le faitoto‘a.
17 A ‘ua ō a‘e tagata e to‘alima, ē na o e asiasi i le nu‘u, ‘ua latou ulu atu ai, ‘ua ‘ave le tupua ‘ua ta, ma le efota, ma tupua, ma le tupua ario; a o le ositaulaga ‘ua tu o ia i le puipui o le faitoto‘a ma tagata e to‘aono galau, e ‘ua saunia ma ‘au‘upega o le tau‘a.
18 ‘Ua latou ulu atu i le fale o Mika, ma latou ‘ave le tupua ‘ua ta, ma le efota, ma tupua, ma le tupua ario; ‘ona fai mai lea o le ositaulaga ‘iā i latou, “Se a le mea tou te faia?”
19 A ‘ua latou fai mai ‘iā te ia, “Fa‘alologo ia, tu‘u lou lima i lou gutu, ma ‘ia tatou ō ma i matou, ‘ia fai oe mo matou tamā ma ositaulaga; pe lelei ‘ea ‘ona fai oe ma ositaulaga i le ‘āiga o le tagata e to‘atasi, pe fai ma ositaulaga i le itū‘āiga ma le ‘āiga o Isaraelu?”
20 ‘Ua fiafia ai le loto o le ositaulaga, ‘ona ‘ave ai lea e ia o le efota, ma tupua, ma le tupua ‘ua ta, ‘ua alu atu fa‘atasi ma le nu‘u.
21 ‘Ona toe o ai lea o i latou, ma latou sāvavali; ‘ua latou tu‘u atu i o latou luma, o tamaiti ma manu ma avegāmea.
22 ‘Ua mamao i latou ma le fale o Mika, ‘ona fa‘apotopoto lea o tagata sa i fale e tuā‘oi ma le fale o Mika, ‘ua latou tulituliloa i le fānauga a Tanu.
23 ‘Ona latou vala‘au lea i le fānauga a Tanu, ‘ona latou fa‘asaga mai ai lea, ‘ua latou fai mai ‘iā Mika, “Se a ‘ea le mea ‘ua tigā ai, ‘ina ‘ua e fa‘apotopotoina mai ai na tagata ‘iā te oe?”
24 ‘Ua fai mai o ia, “‘Ua ‘outou ‘ave‘esea o‘u atua na ‘ou faia, ma le ositaulaga ‘ua ‘outou ō, se a sa‘u toe mea? a o le a lenā ‘ua ‘outou fai mai ai, ‘Se a le mea ‘ou te tigā ai?’”
25 ‘Ua fai mai le fānauga a Tanu ‘iā te ia, “‘Aua ne‘i lagona lou leo e matou, ne‘i oso atu ‘iā te ‘outou tagata lotoa, ‘ona oti ai lea o oe ma lou ‘āiga.”
26 ‘Ona sāvavali lea o le fānauga a Tanu i la latou malaga. ‘Ua iloa e Mika ‘ua sili ‘ona malosi i latou ‘iā te ia, ‘ona liliu lea o ia, ‘ua fo‘i atu i lona ‘āiga.
27 A o i latou, ‘ua latou ‘ave mea na faia e Mika, ma le ositaulaga sa ‘iā te ia, ‘ua latou o‘o atu i Laisa i le nu‘u filemū, ‘ua nonofo fa‘atalanoa lava; ‘ua latou fasia i latou i le pelu, ma susunu le ‘a‘ai i le afi.
28 Sa leai se na te lavea‘i, auā e vāvā mamao lea ma Saitonu, sa latou lē fe‘avea‘i fo‘i mea ma nisi tagata; sa i le vanu lea nu‘u e lata ane i Petereopo. ‘Ua latou faia le fai‘a‘ai ma latou mau ai.
29 ‘Ua latou fa‘aigoa le igoa o le ‘a‘ai o Tanu, i le igoa o Tanu lo latou tamā, na fānau ai ‘iā Isaraelu; ‘ae peita‘i o Laisa le igoa o le ‘a‘ai anamua.
30 ‘Ua fa‘atūina mo i latou e le fānauga a Tanu le tupua ‘ua ta, o Ionatana fo‘i le atali‘i o Keresema, le atali‘i lea o Manase, o ia ma ona atali‘i sa fai ma ositaulaga i latou i le itū‘āiga o sa Tanū, ‘ua o‘o i le aso o le tāfeaga o le nu‘u.
31 ‘Ua latou fa‘atūina mo i latou le tupua ‘ua ta a Mika, na ia faia, i aso uma sa i ai le malumalu o le Atua i Sailo.