1 ‘Ona fa‘apea mai ai lea o tagata o Efaraima ‘iā te ia, “Se a lenei mea ‘ua e faia ‘iā te i matou, ‘ina ‘ua e lē ‘amia mai i matou ‘ina ‘ua e alu atu e tau ma Mitiana?” ‘Ua latou matuā finau tele mai ‘iā te ia.
2 ‘Ona fa‘apea atu ai lea o ia ‘iā te i latou, “Se a se mea ‘ua ‘ou faia nei e tusa ma la ‘outou? E le‘i sili ‘ona lelei ‘ea nai toe fuifui vine o Efaraima i le taugāvine o Apieseru?
3 ‘Ua tu‘uina atu e le Atua i o ‘outou lima o tamaali‘i o Mitiana o Oreva ma Seeva; se a fo‘i se mea ‘ou te mafaia ‘ona fai e tusa ma ‘outou?” ‘Ona fa‘alauleleiina ai lea o i latou ‘iā te ia, ‘ina ‘ua fai atu e ia lenā ‘upu.
4 ‘Ua o‘o atu Kitiona i Ioritana, ‘ua sopo‘ia atu e ia ‘atoa ma le tolu selau o tagata ‘ua ‘iā te ia, ‘ua lailoa i latou, ‘ae tuliloa lava.
5 ‘Ona fai atu ai lea o ia i tagata o Sukota, “‘Ia ‘outou avane ni pōtoi areto i le nu‘u ‘ua mulimuli mai ‘iā te a‘u, auā ‘ua lailoa i latou, a o a‘u, ‘ou te tuliloa atu lava ‘iā Seva ma Salemuna o tupu o Mitiana.”
6 ‘Ona fa‘apea mai ai lea o ali‘i o Sukota, “Po ‘ua e maua nei ‘ea o Seva ma Salemuna matou te avatu ai mea e ‘ai ma au ‘au.”
7 ‘Ona fa‘apea atu ai lea o Kitiona, “A tu‘uina mai e le ALI‘I o Seva ma Salemuna i lo‘u lima, ‘ona ‘ou solia ai lea o ‘outou tino i la‘au tuitui mai le vao ma mea talatala.”