1 ‘Ua lagona ia mea e Iapino le tupu o Hasora; ‘ona alu ai lea o lana fe‘au ‘iā Iopapa le tupu o Matona, ma le tupu o Semarona, ma le tupu o Akasafa;
2 o tupu fo‘i i le itū i matū o le atu mauga, ma le ‘ele‘ele laugatasi i le itū i saute o Kinereta, ma le nu‘u maulalo, ma mea maualuluga o Toro i sisifo.
3 O sa Kanana i sasa‘e ma sisifo, ma sa Amorī, ma sa Hetī, ma sa Perisē, ma sa Iepusē i le atu mauga, ma sa Hivī i lalo o Heremone i le nu‘u o Mesepa.
4 ‘Ona ō atu lea o i latou, ma a latou ‘au uma fa‘atasi ma i latou, o tagata e to‘atele, e pei o le oneone i le matāfaga ‘ona tele ma solofanua ma kariota e matuā tele.
5 ‘Ua fa‘apotopotoina ia tupu uma; ‘ona latou ō ai lea, ma tolauapi fa‘atasi i le vai o Meroma, e tau ai le tau‘a ma Isaraelu.
6 ‘Ona fetalai mai lea o le ALI‘I ‘iā Iosua, “‘Aua ‘e te fefe ‘iā te i latou, auā a taeao, i le itū la nei, ‘ou te tu‘uina atu ai i latou uma i luma o Isaraelu ‘ua fasiotia, ‘e te vāea ua o vae o a latou solofanua, ma susunu o latou kariota i le afi.”
7 ‘Ona o‘o fa‘afuase‘i mai lea ‘iā te i latou o Iosua, ma ‘au uma o le tau‘a fa‘atasi ma ia, i le vai o Meroma; ‘ona latou osofa‘i lea ‘iā te i latou.
8 ‘Ua tu‘uina mai fo‘i i latou e le ALI‘I i lima o Isaraelu, ‘ona latou fasia lea o i latou, ma tuliloa atu ‘iā te i latou i Saitonu le sili, ma Meserefomaima, ma le vanu o Mesepa i sasa‘e; ma latou fasi ‘iā te i latou, ‘ua lē fa‘atoeina e i latou se tasi o i latou.
9 ‘Ua faia fo‘i e Iosua ‘iā te i latou, e pei ‘ona fetalai mai ai o le ALI‘I ‘iā te ia; ‘ua ia vaea ua o vae o a latou solofanua, ma susunu o latou kariota i le afi.
10 O ona po ia na toe fo‘i mai ai Iosua, ma na ā‘ea Hasora, ‘ua fasia fo‘i e ia lona tupu i le pelu; auā o Hasora sa sili ia anamua i ia mālō uma.
11 ‘Ua latou fasia i le pelu o tagata uma sa i ai, ‘ua fa‘aumatia, ‘ua lē fa‘atoeina se tasi e ola; ‘ua fa‘amūina fo‘i e ia o Hasora i le afi.
12 ‘Ua maua e Iosua o ‘a‘ai uma o ia tupu, ma o latou tupu uma; ‘ua fasia fo‘i e ia o i latou i le pelu, ‘ua fa‘aumatia i latou, e pei ‘ona poloa‘i mai ai o Mose le ‘au‘auna a le ALI‘I.
13 Na o ‘a‘ai uma e tu ‘iā latou mea maupu‘epu‘e, ‘ua lē susunuina e Isaraelu; na o Hasora lava ‘ua susunuina e Iosua.
14 O vete uma mai ia ‘a‘ai, ma manu, ‘ua vetea e le fānauga a Isaraelu; a o tagata uma ‘ua fasia i latou i le pelu, ‘ua fa‘aumatia i latou, ‘ua lē fa‘atoeina e i latou se tasi e ola.
15 E pei ‘ona fetalai mai o le ALI‘I ‘iā Mose lana ‘au‘auna, sa fa‘apea fo‘i ‘ona fai mai ai Mose ‘iā Iosua, sa fa‘apea fo‘i ‘ona faia e Iosua, ‘ua lē tu‘ua, e ia se mea o mea uma na fetalai mai ai le ALI‘I ‘iā Mose.
16 ‘Ua maua e Iosua lenā nu‘u lima, o le atu mauga, ma le itū i saute uma; o le nu‘u uma fo‘i o Kosena, ma le nu‘u maulalo, ma le ‘ele‘ele laugatasi, ma le mauga o Isaraelu, ma lona nu‘u maulalo;
17 e āfua i le mauga o Kalaka, e alu a‘e i Seira, e o‘o atu i Paalakato o i le vanu o Lepanona i lalo o le mauga o Heremone; ‘ua maua fo‘i e ia o latou tupu uma, na taia fo‘i i latou e ia, ma fasioti ‘iā te i latou.
18 ‘Ua tau le tau‘a e Iosua i aso e tele ma ia tupu uma.
19 ‘Ua leai se ‘a‘ai na fa‘alelei ma le fānauga a Isaraelu, na o sa Hivī o ē nonofo i Kipeona; ‘ua maua uma isi nu‘u i le tau‘a.
20 Auā mai le ALI‘I ‘ona fa‘ama‘a‘aina o latou loto e ō mai ‘ia tau le tau‘a ma Isaraelu, ‘ina ‘ia matuā fa‘aumatia i latou, ‘ia lē alofagia i latou, a ‘ia fa‘aumatia i latou e ia, e pei ‘ona fetalai mai ai o le ALI‘I ‘iā Mose.
21 O ona po ia na alu atu ai Iosua, ma fa‘aumatia sa Anakī nai le atu mauga, nai Heperona fo‘i, ma Tiperi, ma Anapi, ma mauga uma o Iuta, ma mauga uma o Isaraelu; ‘ua matuā fa‘aumatia e Iosua o i latou ma a latou ‘a‘ai.
22 ‘Ua lē totoe nisi o sa Anakī i le nu‘u o le fānauga a Isaraelu; na o Kasa, ma Kata, ma Asetota, na totoe ai.
23 ‘Ua maua e Iosua le nu‘u uma, pei o mea uma na fetalai mai ai le ALI‘I ‘iā Mose; ‘ua avatu ai fo‘i e Iosua e fai ma tofi mo Isaraelu, e pei o le vaevaeina o i latou i o latou itū‘āiga.‘Ona mapu ai lea o le nu‘u i le tau‘a.#