1 ‘Ona vala‘auina lea e Iosua o sa Reupena, ma sa Katō, ma le tasi vaega o le itū‘āiga o Manase,
2 ma ‘ua fa‘apea atu ‘iā te i latou, “‘Ua ‘outou ‘ana‘ana i mea uma na fai atu ai Mose le ‘au‘auna a le ALI‘I ‘iā te ‘outou; ‘ua ‘outou fa‘alogo fo‘i i lo‘u leo i mea uma na ‘ou fai atu ai ‘iā te ‘outou.
3 ‘Ua lē tu‘ua e ‘outou o ‘outou uso i aso e tele, ‘ua o‘o i le aso nei; a ‘ua ‘outou ‘ana‘ana i le tausiga o le poloa‘iga a le ALI‘I lo ‘outou Atua.
4 O lenei, ‘ua avatua e le ALI‘I lo ‘outou Atua le mapusaga i o ‘outou uso, e pei ‘ona fetalai mai ai o ia ‘iā te i latou o le mea lea ‘ia ‘outou toe fo‘i atu ai, ma ‘ia ‘outou ō i o ‘outou fale ‘ie i le nu‘u o lo ‘outou tofi, na avatu ‘iā te ‘outou e Mose le ‘au‘auna a le ALI‘I, i le la itū o Ioritana.
5 A ‘ia ‘outou matuā ‘ana‘ana e fai le poloa‘iga ma le tulafono, na fai atu ai Mose le ‘au‘auna a le ALI‘I ‘iā te ‘outou; tou te alofa atu i le ALI‘I lo ‘outou Atua, ma sāvavali i ona ala uma, ma ‘ana‘ana i ana poloa‘iga, ma pipi‘i lava ‘iā te ia, ma ‘au‘auna ‘iā te ia ma o ‘outou loto ‘atoa ma o ‘outou agaga ‘atoa.”
6 ‘Ona fa‘amanuia atu lea o Iosua ‘iā te i latou, ma tu‘uina atu i latou e ō; ‘ona latou ō ai lea i o latou fale ‘ie.
7 Na avatu e Mose i le tasi vaega o le itū‘āiga o Manase le tofi i Vasana; a ‘ua avatu e Iosua i le isi vaeluaga le tofi fa‘atasi ma o latou uso i le itū o Ioritana i sisifo. ‘Ua fa‘amanuia i latou e Iosua, ma ‘ua tu‘uina atu i latou e ō i ō latou fale ‘ie.
8 ‘Ua ia fai atu fo‘i ‘iā te i latou, ‘ua fa‘apea atu, “‘Inā fo‘i atu ia i o ‘outou fale ‘ie ma ‘oloa e tele, ma manu e matuā tele, ma ario, ma auro, ma ‘apamemea, ma u‘amea, ma ‘ofu e matuā tele lava; ‘ia ‘outou tufatufaina i o ‘outou uso o vete o ē na ita ‘iā te ‘outou.”
9 O le fānauga a Reupena ma le fānauga a Kato, ma le tasi vaega o le itū‘āiga o Manase, ‘ua toe fo‘i atu i latou, ma ō ‘ese i le fānauga a Isaraelu nai Sailo, o i le nu‘u o Kanana, e ō atu i le nu‘u o Kiliata, o le nu‘u o latou tofi ‘ua latou maua, e pei o le afioga a le ALI‘I ‘iā Mose.
10 ‘Ua o‘o atu i latou i le itū o Ioritana, o i le nu‘u o Kanana, ‘ona faia lea i lea mea e le fānauga a Reupena, ma le fānauga a Kato, ma le tasi vaega o le itū‘āiga o Manase, o le fatafaitaulaga e lata ane i Ioritana, o le fatafaitaulaga tele e iloagofie.
11 ‘Ua lagona e le fānauga a Isaraelu le tala, ‘ua fa‘apea mai: Fa‘auta, ‘ua faia e le fānauga a Reupena, ma le fānauga a Kato, ma le tasi vaega o le itū‘āiga o Manase, le fatafaitaulaga, e feagai ma le nu‘u o Kanana, i le itū o Ioritana, i le mea na sopo‘ia e le fānauga a Isaraelu.
12 ‘Ua lagona e le fānauga a Isaraelu, ‘ona fa‘apotopoto ai lea o le fa‘apotopotoga uma o le fānauga a Isaraelu i Sailo, e ō a‘e e tau ai le tau‘a ma i latou.
13 ‘Ona ‘auina atu lea e le fānauga a Isaraelu, i le fānauga a Reupena, ma le fānauga a Kato, ma le tasi vaega o le itū‘āiga o Manase, i le nu‘u o Kiliata, o Fineaso le atali‘i o Eleasaro le ositaulaga;
14 ma matai sili e to‘asefulu fa‘atasi ma ia, ta‘itasi ‘āiga sili ma le matai sili i itū‘āiga uma o Isaraelu; o i latou ta‘ito‘atasi o matai sili i ‘āiga o latou tamā, i afe o Isaraelu.
15 ‘Ua o‘o atu fo‘i i latou i le fānauga a Reupena, ma le fānauga a Kato, ma le tasi vaega o le itū‘āiga o Manase, i le nu‘u o Kiliata, ma latou fai atu ‘iā te i latou, ‘ua fa‘apea atu,
16 “O lo‘o fai mai le fa‘apotopotoga uma a le ALI‘I, ‘ua fa‘apea mai, ‘Se a lenei mea leaga ‘ua ‘outou agaleaga ai i le Atua o Isaraelu e liliu ‘ese i le aso nei, ne‘i ‘outou mulimuli atu i le ALI‘I, ‘ina ‘ua ‘outou faia mo ‘outou le fatafaitaulaga ‘ina ‘ia ‘outou fouvale i le aso nei i le ALI‘I.
17 Pe itiiti ‘ea ‘iā te i tatou le agasala na faia ma Peora, e le‘i fa‘amāgaloina ai i tatou ‘ua o‘o mai i le aso nei, na o‘o ai le mala i le fa‘apotopotoga a le ALI‘I?
18 A ‘ua liliu ‘ese ‘outou i le aso nei ne‘i mulimuli atu i le ALI‘I. A ‘outou fouvale i le aso nei i le ALI‘I, ‘ona to‘asā mai ai lea o ia i le fa‘apotopotoga uma o Isaraelu a taeao.
19 ‘Ae ‘āfai e leaga le nu‘u o lo ‘outou tofi, ‘ia ‘outou sopo‘ia atu i le nu‘u o le tofi o le ALI‘I, o le mea e tu‘u ai le malumalu o le ALI‘I, ma fai ‘outou tofi fa‘atasi ma i matou; ‘ae ‘aua tou te fouvale i le ALI‘I, ‘aua fo‘i tou te fouvale ‘iā te i matou, i lo ‘outou faia mo ‘outou le fatafaitaulaga, e fa‘aopoopo i le fatafaitaulaga, o le ALI‘I lo tatou Atua.
20 E le‘i agasala ‘ea Akana le atali‘i o Sera i le mea na fa‘atoina, ‘ona o‘o ai lea o le to‘asā i luga o le fa‘apotopotoga uma o Isaraelu? E lē na o lenā tagata e to‘atasi na oti ‘ona o lana agasala.’”
21 ‘Ona tali mai ai lea o le fānauga a Reupena, ma le fānauga a Kato, ma le tasi vaega o le itū‘āiga o Manase, ‘ua latou fa‘apea mai i ali‘i o afe o Isaraelu.
22 “O le ALI‘I, o le Atua o atua; o le ALI‘I, o le Atua o atua, o lo‘o silafia lava e ia, e iloa fo‘i e Isaraelu; pe ‘āfai o le fouvale, po o le agasala i le ALI‘I, ‘aua ne‘i fa‘aolaina i matou i le aso nei,
23 na fai ai mo i matou le fatafaitaulaga e liliu ‘ese ai, ne‘i mulimuli atu i le ALI‘I; ‘āfai fo‘i e fai ai i ona luga o taulaga mū ma taulaga i mea e ‘ai; ‘āfai fo‘i e fai ai i ona luga o taulaga fa‘afetai, ‘ia tauia mai e le ALI‘I lava;
24 ‘ae lē o lo matou atuatuvale ‘ea i lenā mea ‘ua matou fai ai le mea nei, ‘ua fa‘apea ane, Pe a fai mai i se aso a ‘outou fānau ‘iā matou fānau, e fa‘apea mai, ‘Se a ‘ea la ‘outou na i le ALI‘I le Atua o Isaraelu?
25 Auā ‘ua tu‘uina, mai e le ALI‘I o Ioritana e fai ma tuā‘oi ‘iā te i matou ma ‘outou le fānauga a Reupena ma le fānauga a Kato; tou te lē ‘aiā i le ALI‘I;’ ‘ona fa‘ate‘aina ai lea e a ‘outou fānau a matou fānau ‘ina ‘ia latou lē matata‘u i le ALI‘I.
26 O le mea lea na matou fa‘apea ai, ‘Se‘i tatou sauni ai mo i tatou ‘ia fai le fatafaitaulaga, e lē ‘ona ‘ia fai ai se taulaga mū, po o se isi taulaga;
27 a ‘ia fai ma molimau ‘iā te i matou ma ‘outou, ma tupulaga e mulimuli mai ‘iā te i tatou, ‘ia ‘au‘auna i galuega a le ALI‘I i ona luma ‘iā tatou taulaga mū, ma a tatou taulaga, ma a tatou taulaga fa‘afetai; ‘ina ‘ia lē fai mai fo‘i a ‘outou fānau ‘iā matou fānau i se aso, “Tou te lē ‘aiā i le ALI‘I.’”
28 ‘Ona matou fa‘apea ane lea, Pe a latou fai mai i se aso ‘iā te i tatou, po o tupulaga amulī, ‘ona tatou fai atu ai lea, ‘Fa‘auta i le fa‘atusa o le fatafaitaulaga o le ALI‘I na faia e o matou tamā, e le ‘ona ‘ia fai ai taulaga mū, po o isi taulaga; a o le molimau lava ‘iā te i matou ma ‘outou.’
29 ‘Ia mamao ‘iā te i matou ‘ona fouvale i le ALI‘I, ma liliu ‘ese ai i le aso nei, ne‘i mulimuli atu i le ALI‘I, ‘ia fai se fatafaitaulaga e fai ai taulaga mū, po o taulaga i mea e ‘ai, po o isi taulaga, e fa‘aopoopo i le fatafaitaulaga o le ALI‘I lo tatou Atua o i luma o lona malumalu.”
30 ‘Ua fa‘alogo Fineaso le ositaulaga, ma ali‘i sili o le fa‘apotopotoga, ma ali‘i o afe o Isaraelu sa fa‘atasi ma ia, i ‘upu ‘ua fai mai e le fānauga a Reupena, ma le fānauga a Kato, ma le fānauga a Manase, ‘ua lelei ‘iā te i latou.
31 ‘Ua fai atu fo‘i Fineaso le atali‘i o Eleasaro le ositaulaga, i le fānauga a Reupena, ma le fānauga a Kato, ma le fānauga a Manase, ‘ua fa‘apea atu, “‘Ua tatou iloa i le aso nei o lo‘o ‘iā te i tatou le ALI‘I, auā ‘ua ‘outou le agasala i le ALI‘I i lenei agasala; o lenei, ‘ua lavea‘iina e ‘outou le fānauga a Isaraelu a‘i le ‘a‘ao o le ALI‘I.”
32 ‘Ona fo‘i mai ai lea o Fineaso le atali‘i o Eleasaro le ositaulaga, ma ali‘i sili nai le fānauga a Reupena, ma le fānauga a Kato, ai le nu‘u o Kiliata, ‘ua ō mai i le nu‘u o Kanana i le fānauga a Isaraelu, ma latou ‘aumai ‘iā te i latou le tala.
33 ‘Ua lelei le tala i le fānauga a Isaraelu; ‘ua fa‘afetai atu fo‘i le fānauga a Isaraelu i le Atua, ma latou le toe tautalatala i se tau‘a e si‘i atu ‘iā te i latou, e fa‘aumatia le nu‘u e nonofo ai le fānauga a Reupena, ma le fānauga a Kato.
34 ‘Ua fa‘aigoaina e le fānauga a Reupena, ma le fānauga a Kato o le fatafaitaulaga, “O le Molimau,” “Auā o le molimau lea ‘iā te i latou, o le ALI‘I o ia o le Atua.”#