1 ‘Ua toeaina lava o Iosua, ‘ua tele ona tausaga; ‘ona fetalai mai lea o le ALI‘I ‘iā te ia, “‘Ua e toeaina lava, ‘ua tele ou tausaga; e matuā tele fo‘i le lau‘ele‘ele o totoe e fai mo ‘outou.
2 O le lau‘ele‘ele lenei o totoe; o le itū uma o Filisitia ma Kasuri uma,
3 e āfua mai i Seora, e feagai ma Aikupito, ‘ae o‘o atu i le tuā‘oi o Ekerona i le itū i matū, ‘ua ta‘ua ia o sa Kananā; o ali‘i e to‘alima o Filisitia; o tagata o Kasa, ma tagata o Asetota, o tagata o Asekelona, o tagata o Kata, ma tagata o Ekerona, ma tagata o Gavi;
4 e āfua mai i le itū i saute, o le nu‘u uma o sa Kananā, ma Meara o i sa Saitonū, e o‘o atu i Afeka, e o‘o i le tuā‘oi o sa Amorī.
5 O le nu‘u fo‘i o tagata o Kivali, ma Lepanona uma i le itū e alu a‘e ai le la, e āfua mai i Paalakato o i lalo o le mauga o Heremone, e o‘o i le mea e ui atu ai i Amato.
6 ‘Ou te tulia i luma o le fānauga a Isaraelu o ē nonofo uma i le atu mauga e āfua mai i Lepanona, e o‘o atu i Meserefomaima, o tagata uma o Saitonu; tau ‘ina e fai ai le vili ‘iā Isaraelu e totofi ai le lau‘ele‘ele, e pei ‘ona ‘ou fai atu ai ‘iā te oe.
7 O lenei, ‘ia e vaevaeina atu lenei lau‘ele‘ele e fai ma tofi mo itū‘āiga e iva, ma le vaega o le itū‘āiga o Manase.”
8 O sa Reupenā, ma sa Katō, ‘ua maua e i latou o latou tofi fa‘atasi ma i latou, na avatu e Mose ‘iā te i latou i le la itū i sasa‘e o Ioritana, e pei ‘ona avatu ‘iā te i latou e Mose le ‘au‘auna a le ALI‘I;
9 e āfua mai i Aroeru, i le ‘auvai o le alia o Arinona, ma le ‘a‘ai o i totonu o le alia, ma le ‘ele‘ele laugatasi uma o Metepa, e o‘o atu i Tipona.
10 O ‘a‘ai uma fo‘i o Sekono le tupu o sa Amorī, o lē na fai ma tupu i Hesepona, e o‘o i le tuā‘oi o le fānauga a Amoni.
11 O Kiliata fo‘i, ma le nu‘u o tagata o Kasuri, ma tagata o Maaka, ma le mauga o Heremoni uma, ma Vasana uma e o‘o atu i Saleka.
12 O le mālō uma o Oko i Vasana, o lē na toe i sa Rafā, o lē na fai ma tupu i Aserota, ma Eterei na fasia fo‘i i latou e Mose, ma tulia i latou.
13 Na le tulia fo‘i e le fānauga a Isaraelu tagata o Kasuri, ma tagata o Maaka; a ‘ua nonofo Kasuri, ma Maaka fa‘atasi ma Isaraelu, e o‘o lava i le aso nei.
14 Na o le itū‘āiga o sa Levī, na ia le avatu ai se tofi o taulaga e fai i le afi i le ALI‘I le Atua o Isaraelu o lo latou tofi lea, e pei ‘ona fetalai mai ai o ia ‘iā te i latou.
15 Na avatu e Mose le tofi i le itū‘āiga o le fānauga a Reupena e tusa ma o latou ‘āiga;
16 e āfua mai fo‘i lo latou tuā‘oi i Aroeru, o i le ‘auvai o le alia o Arinona, ma le ‘a‘ai o i totonu o le alia, ma le ‘ele‘ele laugatasi uma o i Metepa.
17 O Hesepona, ma ona ‘a‘ai uma o i le ‘ele‘ele laugatasi; o Tipona, ma Pamotapaala, ma Petepaalameona,
18 ma Iaesa ma Katemoti, ma Mefata,
19 ma Kiriataima, ma Sepema, ma Saretasaara o i le mauga o le vanu,
20 ma Petepeoro, ma Asetota-peseka, ma Petesemota;
21 o i ai uma fo‘i i le ‘ele‘ele laugatasi, ma le mālō uma o Sekono le tupu o sa Amorī, o lē na fai ma tupu i Hesepona, na fasia o ia e Mose fa‘atasi ma ali‘i sili o Mitiana, o Evi, ma Rekema, ma Suro ma Huro, ma Repa, o ali‘i sa ia Sekono, sa nonofo i le nu‘u.
22 O Palaamo fo‘i le atali‘i o Peoro, o lē na fai togafiti fa‘ataulāitu, na fasiotia e le fānauga a Isaraelu i le pelu fa‘atasi ma ē na latou fasia.
23 O le tuā‘oi o le fānauga a Reupena o Ioritana lea, ma ona tuā‘oi o le tofi lea o le fānauga Reupena e tusa ma o latou ‘āiga, ‘a‘ai ma o latou faoa ‘a‘ai.
24 Na avatu e Mose le tofi i le itū‘āiga o Kato, o le fānauga a Kato, e tusa ma o latou ‘āiga.
25 O lo latou tuā‘oi o Iasaru, ma ‘a‘ai uma o Kiliata, ma le vaeluaga o le lau‘ele‘ele o le fānauga a Amoni, e o‘o atu i Aroeru, o feagai ma Rapa;
26 e āfua mai fo‘i i Hesepona, e o‘o atu i Ramamesepa; ma Patanima; e āfua mai fo‘i i Maanaima e o‘o atu i le tuā‘oi o Tiperi.
27 O ‘a‘ai fo‘i i le vanu, o Petearama, ma Petenimara ma Sukota, ma Sefono, o toe o le mālō o Sekono le tupu o Hesepona, o Ioritana ma ona tuā‘oi, e o‘o atu i le mea e gata mai ai le vai o Kinereta i le la itū i sasa‘e o Ioritana.
28 O le tofi lea o le fānauga a Kato e tusa ma o latou ‘āiga, o ‘a‘ai ma o latou faoa ‘a‘ai.
29 Na avatu e Mose le tofi i le tasi vaega o le itū‘āiga o Manase; o le tofi lenei o le vaega o le itū‘āiga o le fānauga a Manase e tusa ma o latou ‘āiga.
30 O latou tuā‘oi e āfua mai i Maanaima, o Vasana uma, o le mālō uma o Oko le tupu o Vasana, ma Havota-iario uma o i Vasana, o ‘a‘ai e onogafulu;
31 ma le tasi itū o Kiliata, ma Aserota, ma Eterei, o ‘a‘ai o le mālō o Oko i Vasana, na i ai i le fānauga a Makiro le atali‘i o Manase, o le vaeluaga o le fānauga a Makiro e tusa ma o latou ‘āiga.
32 O nu‘u ia na tofia e Mose mo i latou i le ‘ele‘ele laugatasi o Moapi, i le la itū o Ioritana, e feagai ma Ieriko i sasa‘e.
33 A ‘ua lē avatu e Mose se tofi i le itū‘āiga o sa Levī, o le ALI‘I le Atua o Isaraelu o ia lo latou tofi, e pei ‘ona fetalai mai ai o ia ‘iā te i latou.#