1 ‘Ua tula‘i Iosua i le taeao lava; ‘ua tu‘ua e i latou o Setima, ma ō atu i Ioritana, o ia ‘atoa ma le fānauga uma a Isaraelu, ‘ua latou nonofo ai i lea mea a o le‘i sopo‘ia atu e i latou o Ioritana.
2 ‘Ua mavae aso e tolu, ‘ona feoa‘i lea o le ‘au faipule i le toagalauapi;
3 ‘ua latou fai atu fo‘i i le nu‘u, ‘ua fa‘apea atu, “A ‘outou iloa atu le ‘atola‘au o le feagaiga a le ALI‘I lo ‘outou Atua, o ‘ave e ositaulaga o sa Levī, ‘ona tu‘ua lea e ‘outou o le mea tou te i ai, ma ‘outou mulimuli atu i ai.
4 A ‘ia fai se vā e vā a‘i ‘outou ma le ‘atola‘au, pe lua ni afe o kupita pe a fuatia; ‘aua tou te fa‘alatalata atu i ai, ma ‘ia ‘outou iloa le ala tou te ui ai; auā e le‘i ui e ‘outou, lenei ala anamua.”
5 ‘Ua fai atu fo‘i Iosua i le nu‘u, “‘Inā fa‘apa‘iaina ia ‘outou e ‘outou; auā e a taeao e faia e le ALI‘I o vāvega i o ‘outou luma.”
6 ‘Ona fai atu lea o Iosua i ositaulaga, ‘ua fa‘apea atu, “‘Ia ‘outou si‘i le ‘atola‘au o le feagaiga, ma sopo‘ia atu i luma o le nu‘u.” ‘Ona latou si‘itia ai lea o le ‘atola‘au o le feagaiga, ma latou ō atu i luma o le nu‘u.
7 ‘Ua fetalai mai fo‘i le ALI‘I ‘iā Iosua, “O le aso nei ‘ou te amata ai ‘ona fa‘atupuina lou mamalu i luma o Isaraelu uma, ‘ina ‘ia latou iloa, e pei ‘ona ‘ou i ai ‘iā Mose, e fa‘apea ‘ona ‘ou i ai ‘iā te oe.
8 ‘Ia e fai atu fo‘i i ositaulaga e ‘ave le ‘atola‘au o le feagaiga, ‘ia fa‘apea atu, ‘A ‘outou o‘o i le ‘auvai o Ioritana, ‘ona ‘outou tutū ai lea i Ioritana.’”
9 ‘Ona fai atu ai lea o Iosua i le fānauga a Isaraelu, “‘Inā fa‘alatalata mai ia ‘i‘inei, ma fa‘alogo mai i afioga a le ALI‘I lo ‘outou Atua.”
10 ‘Ua fai atu fo‘i Iosua, “O le mea lenei tou te iloa ai ‘ua ‘iā te ‘outou le Atua soifua, e matuā tulia fo‘i o ia i o ‘outou luma o sa Kananā, ma sa Hetī, ma sa Hivī, ma sa Perisē, ma sa Kirekasē, ma sa Amorī, ma sa Iepusē;
11 fa‘auta mai, o le ‘atola‘au o le feagaiga, o le ‘ato a le Ali‘i o le lalolagi uma o lo‘o ui atu ai i o ‘outou luma i Ioritana.
12 O lenei, ‘inā fa‘ifa‘i mai ia ni o ‘outou tagata e to‘atinoagafulu ma le to‘alua ai itū‘āiga o Isaraelu, ta‘itasi le itū‘āiga ma le tagata e to‘atasi.
13 A tutū i le vai o Ioritana o alofivae o ositaulaga o ē ‘ave le ‘atola‘au a le ALI‘I, le Ali‘i o le lalolagi uma, ‘ona vavaeina ai lea o le vai o Ioritana, o le vai e tafe ifo mai luga; e tu fo‘i le vai e pei o se mea maupu‘epu‘e.”
14 ‘Ona ō atu lea o le nu‘u ai o latou fale ‘ie ‘ia sopo‘ia atu Ioritana; ‘ua ‘ave fo‘i e ositaulaga le ‘atola‘au o le feagaiga i luma o le nu‘u;
15 ‘ua o‘o atu i Ioritana o ē na ‘ave le ‘atola‘au, ma ‘ua fufui i le ‘auvai o vae o ositaulaga ē na ‘ave le ‘atola‘au; (auā e lofia ‘auvai uma o Ioritana i aso uma o le seleselegāsaito;)
16 ‘ona tu ai lea o le vai e tafe ifo mai luga, ‘ua tupu a‘e e pei se mea maupu‘epu‘e, e matuā mamao lava e o‘o i le ‘a‘ai o Atama, e latalata ane i Saretana; o le vai na tafe ifo i le sami i le ‘ele‘ele laugatasi, o le sami ‘O‘ona lea, na mate, ma ‘ua vavaeina; ‘ona sopo‘ia atu ai lea o le nu‘u i le mea e feagai ma Ieriko.
17 O ositaulaga o ē na ‘ave le ‘atola‘au o le feagaiga a le ALI‘I na tūtūmau i latou i le ‘iliti vai matūtū i totonu o Ioritana; na ui atu ai o Isaraelu uma i le ‘iliti vai matūtū, se‘ia uma ‘ona sopo‘ia atu o Ioritana e le nu‘u uma.#