1 ‘Ua fetalai mai fo‘i le ALI‘I ‘iā Iosua, ‘ua fa‘apea mai,
2 “‘Ia e fai atu i le fānauga a Isaraelu, ‘ia fa‘apea atu, ‘‘Ia ‘outou tofia mo ‘outou o ‘a‘ai e fai ma sulufa‘iga, e pei ‘ona ‘ou fai atu ai ‘iā te ‘outou na ‘aumaia e Mose,
3 ‘ina ‘ia sola i ai o le fasioti tagata, o lē ‘ua pa‘ivalea ai se tasi ‘iā te ia ma le lē iloa; e faia ma sulufa‘iga mo ‘outou ai le na te tauia ma sui le toto.
4 O lē na te sola atu fo‘i i le tasi o ia ‘a‘ai, ma tu atu o ia i le puipui o le faitoto‘a o le ‘a‘ai, ma ta‘u atu ana ‘upu i toeaina o lea ‘a‘ai; ‘ona latou talia ai lea o ia i le ‘a‘ai, ma tu‘u atu ‘iā te ia se mea e nofo ai o ia fa‘atasi ma i latou.
5 ‘Āfai fo‘i e tuliloa atu ‘iā te ia o le taui ma sui le toto, latou te lē tu‘uina atu o le fasioti tagata i lona lima; auā na ia fasioti lē la te tuā‘oi ma le lē iloa; ‘ae le‘i mua‘i ita i ai.
6 E nofo fo‘i o ia i lenā ‘a‘ai se‘ia tu mai o ia i luma o le fa‘apotopotoga e fa‘amasinoina ai, se‘ia oti le ositaulaga sili e i ai i ia ona po; ‘ona toe fo‘i atu ai lea o le fasioti tagata, ma alu atu i lona ‘a‘ai, ma lona fale, o le ‘a‘ai lava na ia sola mai ai.’”
7 ‘Ona fa‘asāina lea e i latou o Katesa, o lo‘o i Kalilaia i le mauga o Nafatali, ma Sekema o i le mauga o Efaraima, ma Kiriata-arapa, o Heperona lea, o i le mauga o Iuta.
8 O le la itū o Ioritana fo‘i, i sasa‘e o Ieriko, ‘ua latou tofia ai o Peseri i le vao, i le ‘ele‘ele laugatasi o le itū‘āiga o Reupena; ma Ramota i Kiliata, o le itū‘āiga o Kato; ma Koleni i Vasana, o le itū‘āiga o Manase.
9 O ‘a‘ai ia na tofia mo le fānauga uma a Isaraelu, ma le tagata ‘ese e āumau ‘iā te i latou, ‘ina ‘ia sola atu i ai o lē ‘ua pa‘ivalea se tasi ‘iā te ia, ‘ia lē oti o ia i le lima o le taui ma sui le toto, se‘ia tu mai o ia i luma o le fa‘apotopotoga.#