1 A ‘ua agasala le fānauga a Isaraelu i le mea na fa‘atoina; auā o Akana, le atali‘i o Karame, le atali‘i lea o Sapata, le atali‘i lea o Sera, o le itū‘āiga o Iuta, na ‘ave e ia ni mea ‘ai mea na fa‘atoina; ‘ona tupu ai lea o le to‘asā, o le ALI‘I i le fānauga a Isaraelu.
2 ‘Ua ‘a‘auina atu e Iosua ni tagata a‘i Ieriko e o i Ai, e lata ane i Petavene, o i le itū i sasa‘e o Peteli; ‘ua ia fai atu fo‘i ‘iā te i latou, ‘ua fa‘apea atu, “‘Ia ‘outou ō a‘e e asiasi i le nu‘u.” ‘Ona ō a‘e ai lea o ia tagata, ma asiasi i Ai.
3 ‘Ua latou fo‘i mai ‘iā Iosua, ‘ona latou fa‘apea mai lea ‘iā te ia, “‘Aua le ō a‘e le nu‘u uma; a ‘ia ō a‘e ni tagata pe lua afe, pe tolu afe e fasia Ai; ‘aua ne‘i lailoa le nu‘u uma e ō atu ai i lea mea; auā e to‘aitiiti i latou.”
4 ‘Ona ō a‘e ai lea i lea mea o tagata pe tolu afe; a ‘ua latou sōsōla i luma o tagata o Ai.
5 O i latou na fasia e tagata o Ai, pe to‘atolugafulu ma le to‘aono; auā ‘ua latou tuliloa ‘iā te i latou, e āfua i le faitoto‘a o le ‘a‘ai, e o‘o i Separema, ma fasi ‘iā te i latou i le ifo a‘i; ‘ona liu suāvai lea o loto o le nu‘u, e pei o le suāvai lava.
6 ‘Ona saei lea e Iosua ona ‘ofu, ma fa‘apa‘ū faō i le ‘ele‘ele i luma o le ‘atola‘au a le ALI‘I, ‘ua o‘o i le afiafi, o ia, ma toeaina o Isaraelu; ‘ua latou asu a‘e le efuefu i o latou ulu.
7 ‘Ua fai ane fo‘i Iosua, “Auē! le Ali‘i e, le ATUA, se a ‘ea le mea ‘ua e fa‘ao‘o mai ai lenei nu‘u i lenei itū o Ioritana e tu‘uina atu i matou i le lima o sa Amorī, ‘ia fa‘aumatia ai i matou? E, ana matou fia nonofo i le la itū o Ioritana!
8 Le ALI‘I e, se a ‘ea la‘u e fai atu ai pe a liutuaina Isaraelu i luma o ē ita mai?
9 Auā a fa‘alogo i ai sa Kananā, ‘atoa ma i latou uma ‘ua nonofo i le nu‘u, ‘ona latou si‘osi‘o mai lea ‘iā te i matou, ma latou fa‘aumatia o matou igoa a‘i le lalolagi; pe fa‘apefea fo‘i lou suafa mamalu?”
10 ‘Ona fetalai mai ai lea o le ALI‘I ‘iā Iosua, “‘Inā tula‘i ia oe; se a ‘ea le mea ‘ua e faō ai fa‘apea?
11 ‘Ua agasala Isaraelu, ‘ua tu‘umavaega fo‘i i latou i la‘u feagaiga na ‘ou fai atu ai ‘iā te i latou, auā ‘ua ‘ave e i latou ni mea ‘ai mea ‘ua fa‘atoina, ‘ua latou gaoi, ma fa‘a‘ole‘ole fo‘i, ma tu‘u ai lava ‘iā latou mea.
12 ‘Ua lē mafai fo‘i ‘ona tutū o le fānauga a Isaraelu i luma o ē ita ‘iā i latou, ‘ua liutuaina i latou i luma o ē ita ‘iā i latou, auā ‘ua fa‘atoina i latou; ‘ou te lē toe i ai ‘iā te ‘outou, pe ‘āfai tou te lē matuā fa‘aumatia le ‘ua fa‘atoina nai ‘iā te ‘outou.
13 ‘Inā tula‘i ia, ma fa‘apa‘iaina le nu‘u, ma e fa‘apea atu, ‘‘Ia fa‘apa‘iaina ‘outou e ‘outou a taeao; auā o lo‘o fa‘apea ‘ona fetalai mai o le ALI‘I le Atua o Isaraelu, “Isaraelu e, ‘ua ‘iā te oe le mea ‘ua fa‘atoina; ‘e te lē mafaia ‘ona tu i luma o ē ita ‘iā te oe se‘ia ‘outou ‘ave‘esea ‘iā te ‘outou le mea ‘ua fa‘atoina.”
14 E fa‘alatalataina mai fo‘i ‘outou a itū‘āiga a taeao; o le itū‘āiga e maua e le ALI‘I, ia sau a ‘āiga; o le ‘āiga fo‘i e maua e le ALI‘I, ‘ia fa‘alatalata mai a pui‘āiga; o le pui‘āiga e maua o le ALI‘I ia fa‘alatalataina mai ai ona tagata ta‘itasi.
15 E susunuina i le afi o lē e maua ‘ua i ai le mea ‘ua fa‘atoina, o ia lava, ‘atoa ma ana mea uma; auā ‘ua solia e ia le feagaiga a le ALI‘I, auā fo‘i ‘ua faia e ia le mea leaga i Isaraelu.’”
16 ‘Ona tula‘i lea o Iosua i le taeao lava, ma na fa‘alatalataina mai o Isaraelu a itū‘āiga, ‘ua maua le itū‘āiga o Iuta.
17 ‘Ua fa‘alatalataina mai fo‘i e ia o ‘āiga o Iuta, ‘ua maua e ia le ‘āiga o sa Sera, ‘ua fa‘alatalataina mai e ia o le, ‘āiga o sa Serā ona tagata ta‘itasi; ‘ua maua Sapata.
18 ‘Ona fa‘alatalataina mai lea e ia i pui‘āiga ona tagata ta‘itasi; ‘ua maua Akana, o le atali‘i o Karame, o le atali‘i lea o Sapata, o le atali‘i lea o Sera, o le itū‘āiga o Iuta.
19 ‘Ona fai atu ai lea o Iosua ‘iā Akana, “Lo‘u atali‘i e, se‘i e avatu le vi‘iga i le ALI‘I, le Atua o Isaraelu ma fa‘aali atu ‘iā te ia; se‘i e ta‘u mai ‘iā te a‘u le mea ‘ua e faia; ‘aua le natia ‘iā te a‘u.”
20 ‘Ona tali mai ai lea o Akana ‘iā Iosua, ‘ua fa‘apea mai, “E moni ‘ua ‘ou agasala lava o le ALI‘I le Atua o Isaraelu, ‘ua fa‘apea ma fa‘apea ‘ona ‘ou faia;
21 na ‘ou iloa i le vete o le tasi ‘ofu Senara e lelei, ma sekeli ario e lua selau, ma le potopotoga auro e lima sefulu o sekeli o lona mamafa lea, na ‘ou mana‘o i ai, ‘ona ‘ou ‘ave ai lea fa‘auta fo‘i ‘ua tanumia i le ‘ele‘ele i totonu o lo‘u fale ‘ie, o le ario fo‘i ‘ua laulalo ai.”
22 ‘Ona ‘a‘auina atu lea o Iosua ni ‘au‘auna, ‘ua latou taufetuli fo‘i i le fale ‘ie; fa‘auta, ‘ua tanumia ia mea i lona fale ‘ie, o le ario fo‘i ‘ua laulalo ai.
23 ‘Ona latou ‘ave lea o ia mea a‘i totonu o le fale ‘ie, ma ‘aumai ‘iā Iosua, ‘atoa ma le fānauga uma a Isaraelu, ma latou sasa‘aina atu ai i luma o le ALI‘I.
24 O Iosua, ma Isaraelu uma na o fa‘atasi ma ‘ia e ‘ave ‘iā Akana le atali‘i o Sera, ma le ario, ma le ‘ofu, ma le potopotoga auro, ma ona atali‘i, ma ona afafine, ma ana povi, ma ana asini, ma ana mamoe, ma lona fale ‘ie, ma mea uma na ‘iā te ia, ma latou ō a‘e ma i latou i le vanu o Akori.
25 ‘Ona fai atu ai lea o Iosua, “Se a ‘ea le mea ‘ua e fa‘atigāina ai i matou e fa‘atigāina oe e le ALI‘I i le aso nei.” ‘Ona fetogi ai lea o Isaraelu uma ‘iā te ia i ma‘a; ‘ua latou susunu fo‘i ‘iā te i latou i le afi, ‘ina ‘ua uma ‘ona fetogi ‘iā te i latou i ma‘a.
26 ‘Ona fa‘aputuina lea e i latou i ona luga le faupu‘egama‘a tele, ‘ua o‘o mai i le aso nei. ‘Ona liliu ‘ese ai lea o le ALI‘I i lona to‘asā tele; o le mea lea ‘ua fa‘aigoaina ai le igoa o lea mea, o le vanu o Akori, ‘ua o‘o i le aso nei.#