1 ‘Ua lagona e tupu uma sa i le itū mai o Ioritana, i mauga, ma nu‘u maulalo, ma itū uma o le sami tele e feagai ma Lepanona, o sa Hetī, ma sa Amorī, o sa Kanana, o sa Perisē, o sa Hivī, ma sa Iepusē;
2 ‘ona fa‘apotopoto fa‘atasi ai lea o i latou e tau ai le tau‘a ma Iosua ma Isaraelu; ‘ua loto gatasi.
3 ‘Ua fa‘alogo e na nonofo i Kipeona i mea ‘ua faia e Iosua i Ieriko ma Ai;
4 ‘ona latou fai togafiti fa‘a‘ole‘ole lea, ‘ua latou ō ma fa‘atagā tausavali; ‘ua latou fa‘ae‘e taga pala i luga o a latou asini, ma fagu uaina ‘ua pala, ma māsaesae, ma fusifusi;
5 o se‘evae pala fo‘i ‘ua fonofono i o latou vae, ma ‘ofu pala na latou ‘o‘ofu ai; o le areto uma fo‘i o lo latou oso ‘ua magumagu, ma momomo.
6 ‘Ona latou ō atu lea ‘iā Iosua i le toagalauapi i Kilikala, ma latou fai atu ‘iā te ia ma tagata o Isaraelu, “‘Ua matou ō mai nei mai le nu‘u mamao; o lenei, ‘ia tatou faia se feagaiga ma ‘outou.”
7 ‘Ona fai mai ai lea o tagata o Isaraelu i sa Hivī, “Atonu ‘ua ‘outou nonofo fa‘atasi ma i matou; pe fa‘apefea ‘ea ‘ona tatou faia se feagaiga ma ‘outou?”
8 ‘Ona latou fai atu ai lea ‘iā Iosua, “O au ‘au‘auna i matou.”‘Ona fai mai ai lea o Iosua ‘iā te i latou, “O ai ‘ea ‘outou? Pe na ‘outou ō mai i fea?”
9 ‘Ona latou fai atu ai lea ‘iā te ia, “O le nu‘u matuā mamao lava ‘ua ō mai ai au ‘au‘auna, ‘ona o le suafa o le ALI‘I lou Atua; auā ‘ua matou fa‘alogo i le tala ‘iā te ia, ma mea uma ‘ua faia e ia i Aikupito;
10 o mea uma fo‘i ‘ua faia e ia i tupu e to‘alua o sa Amorī, o ē na i le la itū o Ioritana; o Sekono le tupu o Hesepona, ma Oko le tupu o Vasana sa i Aserotā.
11 O le mea lea na fai mai ai ‘iā te i matou o matou toeaina, ma ē o nonofo uma i lo matou nu‘u, ‘ua fa‘apea mai, ‘‘Inā ‘ave ia o oso mo ‘outou i le ala, ma ‘ia ‘outou ō e fa‘afetaia‘i ‘iā te latou, ma fai atu ‘iā te i latou. “O a ‘outou ‘au‘auna i matou; o lenei, ‘ia tatou faia se feagaiga ma i matou.’”
12 O a matou areto nei na sauni mo matou oso, sa vevela i le aso na matou ō mai ai i o matou fale e ō mai ‘iā te ‘outou; o lenei fo‘i, fa‘auta, ‘ua magumagu ma momomo.
13 O nei fagu uaina fo‘i na matou utufia sa fou, fa‘auta fo‘i, ‘ua māsaesae; o matou nei ‘ofu fo‘i ma o matou se‘evae ‘ua pala, ‘ina ‘ua matuā mamao lava le ala.”
14 ‘Ona tago lea o ia tagata ‘iā latou mea e ‘ai, a ‘ua latou lē fesili atu i le afioga a le ALI‘I.
15 ‘Ona faia lea e Iosua le mavaega ma i latou, na faia fo‘i e ia le feagaiga ma i latou e ola ai i latou; ‘ua tautō fo‘i ali‘i sili o le fa‘apotopotoga ‘iā te i latou.
16 ‘Ua mavae atu aso e tolu talu ‘ona latou faia le feagaiga ma i latou, ‘ona latou fa‘alogo ai lea ‘ua latou felāta‘i ma i latou, ma nofo tuā‘oi ma i latou.
17 ‘Ona ō atu lea o le fānauga a Isaraelu, ma o‘o atu ‘iā latou ‘a‘ai i le aso tolu; o a latou ‘a‘ai ia Po Kipeona, ma Kafira, ma Perota, ma Kiriataiarima.
18 ‘Ua lē fasia i latou e le fānauga a Isaraelu, auā na tautō ‘iā te i latou o ali‘i sili o le fa‘apotopotoga a le ALI‘I le Atua o Isaraelu. ‘Ona muimui lea o le fa‘apotopotoga uma i ali‘i sili.
19 A ‘ua fai atu ali‘i sili uma i le fa‘apotopotoga uma, “‘Ua matou tautō ‘iā te i latou i le ALI‘I le Atua o Isaraelu; o le mea lea e lē mafai ai ‘ona tatou tagofia i latou.
20 O le mea lenei tatou te faia ‘iā te i latou; tatou te fa‘aola ‘iā te i latou, ne‘i i luga ‘iā te i tatou le to‘asā, ‘ona o le tautoga na tatou tautō ai ‘iā te i latou.”
21 ‘Ua fai atu fo‘i ali‘i sili ‘iā te i latou, “‘Ia ola i latou,” e pei ‘ona fai atu o ali‘i sili ‘iā te i latou; a ‘ia fai latou ma ē fai fafie, ma ē utu vai mo le fa‘apotopotoga uma.
22 ‘Ona vala‘au lea o Iosua ‘iā te i latou, ma na fai atu ‘iā te i latou, ‘ua fa‘apea atu, “Se a ‘ea le mea ‘ua ‘outou fa‘a‘ole‘ole mai ai ‘iā te i matou, ‘ua fa‘apea mai, ‘E matuā mamao lava i matou ma ‘outou;’ a ‘ua ‘outou nonofo felāta‘i ma i matou.
23 O le mea lea e malaia ai ‘outou; e lē toe te‘a ‘ese ‘outou ma le nofo pologa, ma e fai fafie, ma e utu vai mo le fale o lo‘u Atua.”
24 ‘Ona latou tali mai ai lea ‘iā Iosua, ‘ua fa‘apea mai, “Auā sa matuā ta‘utino mai i au ‘au‘auna na poloa‘i mai le ALI‘I lou Atua i lana ‘au‘auna o Mose, e foa‘iina le lau‘ele‘ele uma ‘iā te ‘outou, ma fa‘aumatia i latou o ē nonofo uma i le nu‘u ai o ‘outou luma; o le mea lea sa matuā fefefe ai i matou ‘ina ne‘i matou oti ‘iā te ‘outou, ‘ua matou fai ai fo‘i lenei mea.
25 O lenei, fa‘auta mai, o i matou nei o i lau pule; o le mea lelei ma le tonu i ou luma e fai ‘iā te i matou ‘ia e faia.”
26 ‘Ua fa‘apea fo‘i ‘ona faia e ia ‘iā te i latou, ‘ua lavea‘iina e ia o i latou a‘i lima o le fānauga a Isaraelu, ma ‘ua lē fasiotia i latou.
27 ‘Ua tu‘uina i latou e Iosua i lea aso e fai fafie, ma utu vai mo le fa‘apotopotoga, ma le fatafaitaulaga o le ALI‘I ‘ua o‘o mai i le aso nei, i le mea e filifilia e ia.#