12 ‘Ua lagona e le fānauga a Isaraelu, ‘ona fa‘apotopoto ai lea o le fa‘apotopotoga uma o le fānauga a Isaraelu i Sailo, e ō a‘e e tau ai le tau‘a ma i latou.
13 ‘Ona ‘auina atu lea e le fānauga a Isaraelu, i le fānauga a Reupena, ma le fānauga a Kato, ma le tasi vaega o le itū‘āiga o Manase, i le nu‘u o Kiliata, o Fineaso le atali‘i o Eleasaro le ositaulaga;
14 ma matai sili e to‘asefulu fa‘atasi ma ia, ta‘itasi ‘āiga sili ma le matai sili i itū‘āiga uma o Isaraelu; o i latou ta‘ito‘atasi o matai sili i ‘āiga o latou tamā, i afe o Isaraelu.
15 ‘Ua o‘o atu fo‘i i latou i le fānauga a Reupena, ma le fānauga a Kato, ma le tasi vaega o le itū‘āiga o Manase, i le nu‘u o Kiliata, ma latou fai atu ‘iā te i latou, ‘ua fa‘apea atu,
16 “O lo‘o fai mai le fa‘apotopotoga uma a le ALI‘I, ‘ua fa‘apea mai, ‘Se a lenei mea leaga ‘ua ‘outou agaleaga ai i le Atua o Isaraelu e liliu ‘ese i le aso nei, ne‘i ‘outou mulimuli atu i le ALI‘I, ‘ina ‘ua ‘outou faia mo ‘outou le fatafaitaulaga ‘ina ‘ia ‘outou fouvale i le aso nei i le ALI‘I.
17 Pe itiiti ‘ea ‘iā te i tatou le agasala na faia ma Peora, e le‘i fa‘amāgaloina ai i tatou ‘ua o‘o mai i le aso nei, na o‘o ai le mala i le fa‘apotopotoga a le ALI‘I?
18 A ‘ua liliu ‘ese ‘outou i le aso nei ne‘i mulimuli atu i le ALI‘I. A ‘outou fouvale i le aso nei i le ALI‘I, ‘ona to‘asā mai ai lea o ia i le fa‘apotopotoga uma o Isaraelu a taeao.