15 Pe ‘āfai fo‘i e leaga ‘iā te ‘outou ‘ona ‘au‘auna i le ALI‘I, ‘inā filifili ia o ‘outou i le aso nei, po o ai tou te ‘au‘auna i ai; po o atua na ‘au‘auna i ai o ‘outou tamā, o ē sa i le la itū o le vaitafe, po o atua o sa Amorī, e o latou le nu‘u ‘ua ‘outou nonofo ai; a o a‘u nei ma lo‘u ‘āiga, matou te ‘au‘auna i le ALI‘I.”
16 ‘Ona tali mai ai lea o le nu‘u ‘ua fa‘apea mai, “‘Ia mamao lava ‘iā te i matou ‘ona matou tu‘ua o le ALI‘I, ‘ina ‘ia ‘au‘auna i atua ‘ese;
17 auā o le ALI‘I lo tatou Atua, o ia lava na ‘aveina a‘e i tatou ma o tatou tamā, a‘i le nu‘u o Aikupito, o le mea sa nofo pologa, ai o ia fo‘i na faia i o tatou luma o ia fa‘ailoga tetele, ma na leoleo mai ‘iā te i tatou i le ala uma na tatou ō mai ai, ma nu‘u uma na tatou ui mai ai.
18 ‘Ua tulia fo‘i e le ALI‘I i o tatou luma o nu‘u uma, o sa Amorī lava o ē na nonofo i le lau‘ele‘ele; o i matou fo‘i matou te ‘au‘auna i le ALI‘I, auā o ia lava o lo tatou Atua.”
19 ‘Ona fai atu ai lea o Iosua i le nu‘u, “Tou te lē mafaia ‘ona ‘au‘auna i le ALI‘I, auā o le Atua pa‘ia o ia; o le Atua fuā o ia; na te lē fa‘amāgaloina o ‘outou solitulafono ma a ‘outou agasala.
20 ‘Āfai e tu‘ua e ‘outou o le ALI‘I, ma ‘au‘auna i atua ‘ese, ‘ona liliu mai ai lea o ia, ma fa‘atigā ‘iā te ‘outou, ma fa‘aumatia ‘outou, a o ia na mua‘i agalelei mai ‘iā te ‘outou.”
21 ‘Ona fai mai ai lea o le nu‘u ‘iā Iosua, “E leai; matou te ‘au‘auna lava i le ALI‘I.”