Le Poto 1 RSCB

O le Amiotonu e maua ai le Poto

1 ‘Ia ‘outou naunau i le amiotonu, o ‘outou o ē fa‘amasino i le lalolagi.‘Ia tonu lelei o ‘outou manatu i le Atuama ‘ia ‘outou sā‘ili‘ili ‘iā te ia ma le loto fa‘amaoni;

2 auā e maua lava ia e i latou ‘ua latou lē tofotofo ‘iā te ia,‘ua ia fa‘aali fo‘i o ia ‘iā te i latou e fa‘atuatua ‘iā te ia.

3 Auā o manatu leaga e vavae‘eseina ai le tagata mai le Atua,a o le mana o le Atua e mautinoa ai le valea o ē fia tofotofo i ai.

4 Auā e lē ulu atu le poto i se tagata ‘ua loto leaga,e lē nofo fo‘i i se tino ‘ua pologa i le agasala.

5 Auā e ‘inosia le fa‘a‘ole‘ole e le agaga pa‘ia o fa‘atonuga lelei,na te ‘alo ‘ese fo‘i i mānatuga fa‘avaleama ‘ua tuli‘esea o ia pe a faia le agasala.

E Silafia e le Atua Manatu Lilo

6 Auā e agaalofa le agaga o le poto,‘ae na te lē lavea‘iina le tagata fāifai ai le sala e tatau i ona laugutu;auā o le Atua o le molimau o ona manatu,o le fa‘amasino tonu o lona loto, ‘ua fa‘afofoga fo‘i o ia i ana ‘upu.

7 Auā ‘ua fa‘atumuina le lalolagi uma e le agaga o le Ali‘i;o lo‘o aofia ‘iā te ia o mea uma, e fa‘afofoga fo‘i o ia i ‘upu uma lava.

8 O le mea lea e lē mafai ai ‘ona lilo le tagata e tautala i ‘upu leaga,e lē ‘alo ‘ese fo‘i o ia i le fa‘amasinoga ma le sala.

9 Auā e su‘esu‘eina o manatu o le tagata amio leaga;e fa‘afofoga fo‘i le Atua i le leo o ana ‘upu,‘ina ‘ia fa‘asalaina ai ana soligātulafono.

10 Auā e logo mea uma i taliga o le tagata losilosi,e lē lilo fo‘i ‘iā te ia le leo o le muimui.

11 O lea, ‘ia ‘outou ‘alo ‘ese i muimuiga e lē aogā,ma ‘ia sao o ‘outou laulaufaiva i tala leaga;auā e lē faia fua le tala e lē leoa,a o le gutu talapepelo fo‘i e fasiotia ai le agaga.

E Le‘i Faia e le Atua le Oti

12 ‘Aua ne‘i ola ‘outou i le agasala,auā o la ‘outou taufetuli lea i le oti;‘aua fo‘i le fa‘aaogāina ‘outou i le malaia ‘ona o amioga a ‘outou lava lima.

13 Auā e le‘i faia le oti e le Atua,e lē fiafia fo‘i o ia pe a fano o ē ‘ua ola.

14 Auā ‘ua na faia mea uma ‘ina ‘ia maua ai le ola;sa lelei mea uma lava na ia faia,sa lē o i ai se mea ‘o‘ona e oti ai, sa lē pule fo‘i le oti i le lalolagi.

15 Auā e tumau le amiotonu, e lē pule i ai le oti.

16 A o tagata amio leaga ‘ua latou vala‘au i le oti ma tālo lava i ai;‘ua latou tāofi ifo o la latou uō lea, ma ‘ua latou lailoa ai;‘ua latou osi feagaiga ma ia, auā ‘ua aogā lava i latou ‘ia fa‘atasia ma ia. #

Le mataupu

1 2 3 4 5 6 7 8 9 10 11 12 13 14 15 16 17 18 19