1 O a le poto lava ‘ua na tausia le ulua‘i tagata,na faia na o ia e to‘atasi lava e le Atua,‘ina ‘ia ‘avea ma tamā o tagata uma o le lalolagi;
2 ‘ua na lavea‘iina o ia nai lana agasala,ma ‘ua tu‘u mai ‘iā te ia le pule na te pulea ai mea uma na faia.
3 ‘Ua tu‘ulafoa‘iina le poto e le tagata amio leaga i lona ita,‘ona fano ai lea i lona loto tigā na ia fasia ai lona uso.
4 ‘Ua fa‘aumatia le lalolagi i le vai ‘ona o le tagata amio leaga,‘ona toe maua fo‘i lea le olataga mai le poto,‘ua na ta‘ita‘iina le tagata amiotonu i luga o se la‘au fa‘atauva‘a.
5 Sa tafatasi uma o nu‘u o le lalolagi i lo latou loto i le amio leaga,‘ona iloa fo‘i lea e ia le tagata amiotonu ma ‘ua na tausia o ia,e lē mata‘uleagaina i luma o le Atua, ma ‘ua na fa‘amalosia o ia,e le‘i faia‘ina lava e lona alofa i lona atali‘i.
6 ‘Ua fa‘aumatia o tagata amio leaga,‘ona fa‘aolaina lea e le poto le tagata amiotonu,‘ua lavea‘i ‘iā te ia ‘ina o tō ifo le afi i ‘a‘ai e lima;
7 o lo‘o alu a‘e pea le asu i lea lau‘ele‘ele tu‘ufua,o le molimau lea o la latou amio leaga;e fua ai fo‘i o fua o la‘au i vaitausaga ‘ese;e tu ai fo‘i ma le fa‘atagata masima e fai ma fa‘amanatu o le lē fa‘atuatua o se tasi.
8 ‘Ua latou tu‘ulafoa‘iina le poto,e lē na ‘ona leaga ai i latou ma ‘ua lē iloa o mea lelei,‘ae ‘ua latou tu‘u mai fo‘i i tagata le fa‘amanatu i lo latou vālea,‘ina ‘ia lē mafai ai ‘ona lilo i latou ‘iā latou lava amio leaga.
9 A o le poto ‘ua na lavea‘iina ai mea fa‘atigā o i latou ‘ua to‘aga ‘iā te ia.
10 O ia lava ‘ua na ta‘ita‘iina i ala tonu le tagata amiotonu,‘ina o ‘alo ‘ese o ia i le ita o lona uso;‘ua na fa‘aali mai ‘iā te ia le mālō o le Atua ma foa‘i mai ‘iā te ia le poto i mea pa‘ia,‘ua na fa‘a‘oloaina o ia i ana tautigā, ma fa‘ateleina o fua o ana galuega.
11 ‘Ua tu mai ‘iā te ia, ‘ina ‘ua taumaileia o ia e tagata fa‘a‘ole‘olema ‘ua na fa‘atamao‘āigaina o ia.
12 ‘Ua na lavea‘i ‘iā te ia a‘i ona fili ma fa‘asao ‘iā te ia a‘i tagata fa‘asesē,ma ‘ua tu‘u mai ‘iā te ia le manumālō i se tau‘a faigatā,‘ina ‘ia iloa ai e ia e sili i mea uma le malosi o le poto.
13 E le‘i tu‘ulafoa‘i e le poto le tagata amiotonu ‘ua fa‘atauina,a ‘ua lavea‘i ‘iā te ia a‘i tagata amio leaga ma ‘ua alu ifo fa‘atasi ma ia i le lua.
14 ‘Ua na lē tu‘ulafoa‘i fo‘i ‘iā te ia i ona filifili,se‘ia o‘o ‘ina ‘ia tu‘u atu ‘iā te ia le to‘oto‘o o le mālō ma le pule i luga o i latou sa fa‘asauā ‘iā te ia;‘ua na fa‘aali fo‘i le pepelo o ē na latou ta‘uleagaina ia ma ‘ua na fa‘amamaluina o ia e o‘o i le fa‘avavau.
15 O le poto ‘ua na lavea‘i le nu‘u amiotonuma le fānauga e lē mata‘uleagaina ai nu‘u sa fa‘asauā ‘iā te i latou.
16 ‘Ua ulu atu o ia i le agaga o le ‘au‘auna a le Atua;i le ‘ua tete‘e atu i tupu mata‘utia i ni vāvega ma ni fa‘ailoga.
17 ‘Ua na tu‘u atu i tagata amiotonu le taui o la latou galuega,‘ua na ta‘ita‘i i latou i ala ofoofogia,ma ‘ua ‘avea ma paolo ‘iā te i latou i le ao, ‘ua pei fo‘i o le pupula o fetū i le po;
18 ‘ua na fa‘asopo‘ia le Sami Ulaula e i latou,‘ua na ta‘ita‘i i latou i totonu o vai tetele.
19 A ‘ua na fa‘amalemo o latou fili i le sami,‘ae si‘i a‘e i latou a‘i le loloto o le tai.O le mea lea na ‘avea ai e tagata amiotonu le vete o ē amio leaga;
20 ma ‘ua latou pepese, le Ali‘i e,i lou suafa pa‘ia ma vivi‘i fa‘atasi atu i lou ‘a‘ao na manumālō ai i latou.
21 Auā na tatalaina e le poto le gutu o ē gūgū,‘ua na fa‘amau‘upua o laulaufaiva o tama meamea. #