1 E! ‘ua matuā matagofie le fānauga loto mamā, ‘ua matuā mamalu lava!auā e lē āumavae atu le manatu ‘iā te i latou,auā ‘ua lauiloa i latou e le Atua ‘atoa ma tagata.
2 A ola i latou, ‘ua fa‘ata‘ita‘i i ai e tagata;a fa‘amavae i latou ma le olaga, ‘ua manatua pea i latou;‘ua fa‘apaleina i latou i le fa‘avavau ma ‘ua manumālō i latou,‘ua maua le taui ‘ona ‘ua latou tau le tau‘a lelei.
3 A o le fānauga e to‘atele a tagata amio leaga e fa‘alēaogāina i latou;o tātupu o le pogati agasala e lē fai ni o latou a‘a malolosi,e lē maua se tulaga e mautū ai i latou.
4 E o‘o lava ‘ina tutupu ai i se aso o ni lālā, ‘ae vaivai lava,e lūlūina e le matagi, e lia‘iina i latou i le malosi o le afā.
5 E fatia o lālā a o le‘i matutua, e fa‘alēaogāina o latou fua,‘ua ‘a‘ava i le gutu, ‘ua lē aogā i se mea e tasi.
6 Auā o le fānauga e tutupu i le moega ‘ua fa‘aleagaina,e molimau lava i le agasala a o latou mātua, pe a fesiligia ai i latou.
7 A o le tagata amiotonu, e tusa fo‘i pe vave o‘otia o ia i le oti,‘ae maua lava e ia le mapusaga;
8 auā o le mamalu o le toeaina e le fa‘atatauina i le tele o aso,pe fuatia i le tele o tausaga; a o le mafaufau o le tagata,o lona ulusinā lea;
9 o le fa‘alevaleva fo‘i o tausaga, o le olaga lea ‘ua aunoa ma le agasala.
10 Sa fiafia le Atua ‘iā te ia, sa alofa ‘iā te ia,o lea na ‘avea ai o ia nai totonu o tagata agasala sa latou fa‘atasi ma ia.
11 ‘Ua ‘avea o ia, ‘ina ne‘i liliuina lona mafaufau i le leaga,pe ‘ole‘olegia lona agaga i mea sesē.
12 Auā o le ‘i‘ila o le agasala e fa‘apogisāina ai le amio lelei,o le niniva fo‘i o le tu‘inanau e fa‘asesēina ai le agaga o lē ‘ua lē sala.
13 ‘Ua vave ‘ona maua lona lelei a‘ia‘i,‘ua tusa lea ma le galuega o tausaga e tele;
14 auā sa fiafia le Atua i lona agaga.O le mea lea ‘ua fa‘ata‘alise ai ‘ona ‘ave‘esea o ia nai totonu o le amio leaga.‘Ua iloa atu lea mea e nu‘u ‘ese, ‘ae latou te lē lagona ma ‘ua latou lē mānatunatu,
15 o lo‘o i ai le alofa tunoa o le Atua ma lona agaalofafa‘atasi mōna tagata pa‘ia ma ‘ua silasila mai o ia i ona tagata filifilia.
16 A ‘ua ‘avea le oti o le tagata amiotonu ma fa‘amasinoga o tagata amio leaga ‘ua ola,‘ua ‘avea fo‘i le taule‘ale‘a ‘ua vave taunu‘u i le amiotonuma fa‘amasinoga o le tagata amio leaga ‘ua leva lava ona tausaga.
17 Auā latou te iloa atu le i‘uga o le tagata poto,‘ae latou te lē lagona le finagalo o le Atua e uiga ‘iā te ia,pe se ā fo‘i le mea na fa‘asaogalemūina ai o ia e le Atua.
18 Latou te iloa atu, ‘ae latou te tauemu ‘iā te ia;a o le Atua e tauemu fo‘i o ia ‘iā te i latou.
19 ‘Ona latou pa‘u‘ū ai lea e aunoa ma se mamalu,e ta‘uleagaina fo‘i i latou i tagata oti e o‘o i le fa‘avavau;auā e gaugauina i latou e le Atua, e lē ‘upua o ia tagata fa‘amaualuga;e fa‘agae‘etia i latou nai o latou tulaga, e lafotūina i latou i le malaia sili.Latou te mapuitigā, e fano fo‘i le fa‘amanatuina o i latou.
20 Latou te ō mai ma le fefe e fai se tala ‘iā latou agasala,e molimau fo‘i ‘iā te i latou, i o latou luma, o a latou lava amio leaga.