1 Na toe fa‘apea fo‘i ma le tasi ‘ua fia folau, ‘ua sauni se folauga i le vasa sousou,‘ona talosaga atu ai lea i se la‘au e sili ‘ona vaivai i lo le la‘au ‘ua ia ti‘eti‘e ai.
2 Auā o le la‘au lea na mafaufau i ai le tagata o lona fia fai ‘oloa ma ‘ua gaosia e le tufuga poto,
3 ‘ae o lau lava tausiga, le Tamā e, ‘ua ta‘ita‘iina ai;auā fo‘i na e tu‘u mai lava se ala i le sami, o se auala tonu i totonu o peau;
4 ‘ua e fa‘aali mai ai ‘ua mafai ‘iā te oe ‘ona lavea‘i ai mea faigatā uma,‘ina ‘ia folau ai i le sami o tagata e lē o ‘iā te i latou le poto o tautai.
5 ‘Ina ne‘i fa‘aleagaina o galuega a lou lava poto,o lea na tu‘u ai e tagata lo latou ola i luga o se la‘au fa‘atauva‘a,‘ua latou sopo‘ia le vasa i se paopao ma ‘ua latou saogalemū ai.
6 E fa‘apea fo‘i anamua, i aso sa fano ai o tagata malolosi ma le fa‘amaualuga,a ‘ua sulu i se va‘a le fa‘amoemoe o le lalolagi, ‘ua ta‘ita‘iina e lou lava ‘a‘ao,ma ‘ua tu‘ua ai i le lalolagi le tupuga o fānau a tagata.
7 Auā ‘ua pa‘ia le la‘au ‘ua fa‘aaogāina mea lelei;
8 a o le tupua ‘ua gaosia e lima, ‘ua malaia lava ia ‘atoa ma lē ‘ua na faia;o ia lea ‘ona ‘ua faia sana tupua, a o le tupua, auā le mea ‘augavale,a ‘ua ta‘ua o ia o se atua.
9 Auā e fa‘atau‘ino‘ino le Atua i le tagata leaga ma lana galuega.
10 E fa‘ataufa‘asalaina lava le galuega ma le tagata faigaluega.
11 O le mea fo‘i lea e lē fa‘asaoina ai o tupua a nu‘u ‘ese,auā o mea na faia e le Atua, a ‘ua ‘avea ma mea ‘inosia,ma fa‘aosoosoga mo agaga o tagata, ma mailei i vae o tagata vālelea.
12 Auā o le to‘aga i tupua na tupu mai ai le faita‘aga;o le gaosiga o tupua na maumau ai le ola.
13 E lē ni mea mai i le amataga i latou, e lē tumau fo‘i e fa‘avavau.
14 O le valea o tagata na ulu mai ai tupua i le lalolagi,o le mea fo‘i lea ‘ua tino mai ai ‘ua lata lo latou i‘uga.
15 O le tamā ‘ua momomo lona loto,‘ua na faia le fa‘atusa o lona atali‘i ‘ua ‘ave‘esea fa‘afuase‘i ‘iā te ia;o lē na oti lava e pei o se tagata, ‘ua amata ‘ona ia fa‘aaloalo i ai e pei lava o se atua,ma ‘ua fa‘atūina i lona ‘au‘āiga o ni sauniga ma ni taulaga.
16 O augātausaga na fa‘amausalīina ai lenā masani leaga,‘ua tausia lea mea sesē e pei o se tulafono ma ‘ua ifo tagata i fa‘atusa ‘ona o le poloa‘iga a tupu.
17 O i latou sa lē mafai e tagata ‘ona fa‘aaloalo i ai i o latou luma,‘ona ‘ua nonofo mamao i latou, ‘ua ‘aumaia o latou fa‘atusa mai le mea mamao,‘ua gaosia ai le fa‘atagata va‘aia o le tupu ‘ua fia fa‘aaloalo i ai,‘ina ‘ia fa‘aaloaloina ai ma le filigā o lē sa nofo mamao atu, e peiseaī lava o lo‘o tu mai.
18 ‘Ua tōsina fo‘i i le fa‘aaloalo i ai e o‘o ‘iā i latou sa lē iloa o ia,‘ona o le matuā filigā o le tufuga.
19 Auā o ia lea ‘ua fialelei i luma o lē ‘ua na tofia o ia,ma ‘ua fa‘aaogā lona poto ‘atoa ‘ina ‘ia fa‘amanaia atili ai le fa‘atagata.
20 A o le motu o tagata ‘ua o‘otia i latou i le matagofie o le galuega,‘ua latou tāofi ifo ai o se atua lava lenā o lē sa muamua ‘ona fa‘aaloalo i ai e pei ‘ona fa‘aaloalo i se tagata.
21 O le fa‘asesēina lea o tupulaga ‘ona o tagata ‘ua o‘otia i le alofa,po ‘ua fialelei i tupu, a ‘ua latou tu‘uina atu i le ma‘a po o le la‘au le suafa e lē mafai ‘ona tu‘uina i se tasi.
22 ‘Ua lē lava fo‘i ‘iā te i latou ‘ona sesē i manatu tau le Atua,a ‘ua ola i latou i se tau‘a tumau, ‘ona o lo latou valea ma ‘ua latou fa‘aigoa ‘ia filemū o puapuagā ‘ua fa‘apea ‘ona tele ma le tetele!
23 Po ‘ua latou ‘ave ma taulaga a latou lava fānau, po ‘ua faia ni faigālotu fa‘alilolilo,po ‘ua latou alaala i ni sauniga valea anoanoa‘i.
24 O lea ‘ua latou lē toe tausi mamāina lo latou ola po o a latou fa‘aipoipoga,a ‘ua fasioti le tasi i le tasi ‘ona o le matau‘a, po ‘ua fa‘aleaga ‘iā te ia i le mulilua;
25 ma ‘ua filo ai fa‘atasi uma le toto ma le fasioti tagata, le gaoi ma le fa‘a‘ole‘ole,le loto leaga ma le fa‘asesē, le fouvale ma le tautō pepelo, o le fa‘atigā i tagata amiotonu,
26 o le fa‘agalogalo i le Atua, o le fa‘a‘ele‘elea o agaga, o le fasiga o tamaiti a o le‘i fānanau mai,o le mālepelepe o fa‘aipoipoga, o le sosolo o le mulilua ma le faita‘aga.
27 Auā o le ifo i tupua ‘ele‘elea, o le pogai lea ma le amataga ma le i‘uga o mea leaga uma.
28 O a latou mea fa‘afiafia o amio valea anoanoa‘i, o a latou valo‘aga fo‘i o ‘upu pepelo lava;‘ua latou ola i totonu o le agasala ma ‘ua latou so‘ona tautō pepelo.
29 Auā ‘ua latou fa‘atuatua i tupua ‘ua lē o i ai se ola,o le mea lea ‘ua latou lē matata‘u ai i se sala o la latou tautoga pepelo.
30 ‘Ae fa‘asalaina lava i latou e pei ‘ona tatau ai ‘ona o lenā agasala sautualua,auā ‘ua latou manatu leaga i le Atua i la latou ifo i tupua ma ‘ua latou tautō leaga ma soli ai le amiotonu i la latou pepelo.
31 Auā e lē o le mana o ē na latou tautō ai, a o le sala lava ‘ua tatau i le agasala,‘ua fa‘asalaina ai pea togafiti pepelo a tagata amio leaga.