1 ‘Ua vālelea lava tagata uma ‘ua latou lē iloa le Atua;‘ua latou lē mafaia ‘ona iloa atu i mea lelei ‘ua aliali mai,lē o lo‘o soifua, ‘ua latou va‘ava‘ai atu i ana galuega,a ‘ua latou lē iloa ai le tufuga sili;
2 ‘ae peita‘i, ‘ua latou manatu ifo o le afi, po o le matagi, po o savili feagiagia‘i,po o le li‘o o fetū, po o le lolovai, po o le lā, po o le masina, o atua ia e pulea ai le lalolagi.
3 ‘Āfai ‘ua o‘otia o latou loto i le matagofie o mea ia ma ‘ua manatu ifo ai o ni atua lava ia;‘ae se‘i iloa ‘ua matuā sili ‘ese o le matagofie o lē ‘ua na faia mea ia;auā o le tupu‘aga o le matagofie, o ia lea ‘ua na faia mea uma ia.
4 ‘Āfai ‘ua latou ofo i le malosi o mea ia, po o a latou galuega,se‘i malamalama ai ‘iā te i latou ‘ua matuā sili ‘ese le mana o lē na na faia;
5 auā o le malosi ma le matagofie o mea na faia,‘ua pei o se fa‘atusa ‘ua aliali mai ai lē ‘ua na faia mea uma.
6 ‘Ae peiseaī e itiiti fo‘i ‘ona ta‘uleagaina o i latou ia;auā, ai lava na fa‘asesēina i latou ‘ona o lo latou sā‘ili i le Atua ma le fia maua lava o ia.
7 Auā ‘ua si‘omia i latou i ana galuega, o lea ‘ua latou su‘esu‘e i ai,ma ‘ua latou mautinoa ai le lelei lava o mea ‘ua latou va‘ava‘ai i ai.
8 ‘Ae ui i lea, e lē tatau fo‘i ‘ona fa‘amāgaloina ai i latou,
9 auā ‘āfai lava lo latou poto latou te iloa ai le uiga o le lalolagi,pe fa‘apefea ‘ona lē faigofie ai ‘iā te i latou ‘ona iloa fo‘i le Ali‘i o le lalolagi?
10 ‘Ae ‘ua matuā pagātia o ē a tu‘u lo latou fa‘amoemoe i ni mea ‘ua lē o i ai se ola,o ē fa‘aigoa o “atua,” o galuega a lima o tagata, o le auro ma le ario ‘ua lelei ‘ona togitogia,o fa‘atusa o manu po o se mea fa‘atauva‘a na galue ai se tagata mai anamua.
11 O lenei, ‘ua tāina i le vao e le tufuga poto se la‘au sagatonu lelei,‘ua na ‘ave‘esea uma le pa‘u, ma le fa‘aeteete,‘ona fa‘aaogā lea o lona poto ma ‘ua na faia ai se meafale e aogā i le tausiga o le ola;
12 o mea e totoe pe a uma lana galuega,na te fa‘aaogāina e tunu a‘i ana mea e ‘ai;
13 a o toe mea ‘ua lē aogā lava i se galuega,o fasila‘au pi‘opi‘o solo, tumu i pona, na te togitogia i itūlā avanoa ma ‘ua lava ai lona poto e fai i ai sona foliga,‘ona faia ai lea ‘ia foliga i se tagata,
14 po ‘ua fa‘atusaina ai se tasi manu; ‘ona vali lea i le vali mūmū,o fa‘amūmū i le vali le lanu o le la‘au ma ufiufi ai o pona uma ‘ua i ai;
15 ‘ona ia gaosi ai lea sona tulaga tatau, ma fa‘apipi‘i i le pavali o le fale,o fa‘amau i ai i ni fasi u‘amea;
16 o le fa‘aeteete lea ‘ina ne‘i pa‘ū,auā ‘ua malamalama ‘iā te ia‘ua lē mafai i le tupua ‘ona fesoasoani o ia ‘iā te ia lava,auā o le fa‘atagata lava ia, e tatau ‘ona fesoasoani i ai se tasi.
17 Ma ‘ua fa‘asaga atu i ai i ni talosaga mo ana lava mea,po o lana fānau, po o ni ana fa‘aipoipoga.E lē māsiasi o ia i le tautala atu i se mea ‘ua lē o i ai se agaga.
18 ‘Ua tagi atu i le mea vaivai i le fia maua ai le tino malosi;‘ua tagi atu i le mea mate ‘ia maua ai le ola,‘ua tagi atu ‘ia fesoasoani mai lē na te lē mafaia se mea.
19 ‘Ua tatalo atu i lē ‘ua lē mafai ‘ona savali ‘ia fa‘amanuia lana malaga;o lana fa‘atau ma lana galuega, o le manuia i lana taumafai,‘ua ia tagi atu ai i lē ‘ua lē aogā lava ia i se mea e tasi.