1 Auā ‘ua mata‘utia au fa‘amasinoga, le Ali‘i e,‘ua lē ma fa‘amatalaina fo‘i āu fetalaiga.O le mea lea na fa‘asesēina ai o agaga sa lē a‘oa‘oina.
2 Auā sa tāofi ifo e tagata amio leaga ‘ua mafai ‘ona pule sauā i latou i le nu‘u pa‘ia,a ‘ua noatia i latou i noataga o le pouliuli ma le po fa‘alevaleva;‘ua punitia i latou i o latou fale ma ta‘o‘oto ai,o ‘alo ‘ese ai i latou i lau tausiga ‘ua lē aunoa.
3 Sa manatu i latou e lilo i le pogisā o a latou agasala,a ‘ua fa‘ata‘ape‘apeina ma fa‘agaloina i latou i le pouliuli mafiafia sa ufitia ai;o mata‘utuia i le fefe, ma le atuatuvale i le ofo matuā tele anoanoa‘i.
4 O ana sa lafi ai i latou na lē fa‘asaoina ai i latou i le mata‘u,auā sa fefefe i latou i le pa‘ō sa fa‘alogo i ai,ma ‘ua fa‘atupuina lo latou mata‘u ‘ina ‘ua aliali mai o le mau foliga matapāū.
5 Ma ‘ua leai lava se afi ‘ua mafai ‘ona latou maua ai se malamalama,na lē mafai fo‘i i le afi manino o fetū ‘ona fa‘amalamalama i lenā pogisā mata‘utia.
6 Na ‘ona aliali fa‘afuase‘i mai o se afi ‘ua fa‘atumuina ai i latou i le fefe;sa mata‘utuia i latou i mea sa latou va‘ai i ai ma le fa‘anenefuma ‘ua manatu ifo e sili ai ‘ona mata‘utia, auā sa lē manino mai.
7 O le poto fo‘i o taulāitu, o se mea e ula ai;‘ua fa‘aalia le sesē o lo latou fa‘afiapoto, ‘ua māsiasi ai i latou.
8 Auā ‘ua folafola atu e fa‘asaoina e latou o tagata mama‘i a‘i le atuatuvale ma le fefe,a o lenei sa tigāina fo‘i i latou i le mata‘u ‘ua leai sona uiga.
9 Auā e ui fo‘i ‘ina leai se mea mata‘utia e tasi e atuatuvale ai i latou,‘ae sa tetemū i latou i le sāvavali ane o manu po o le sisi a gata;sa oti ai i latou i le fefe ma ‘ua latou mumusu i tepa atu i le ‘ea lenā ‘ua lē mafai i se tagata ‘ona ‘alo ‘ese ai.
10 ‘Ua fefevale le amio leaga auā o lana lava molimau ‘ua nofosala ai o ia;‘ua atuatuvale lona loto fuatia ifo, o le mea lea e nofo fa‘atalitali ai pea i mea fa‘atigā.
11 Auā o le fefe, o le ‘alo ‘ese lea o le mafaufau i ala e mata e maua ai se olataga.
12 ‘Ona ‘ua itiiti fo‘i le fa‘amoemoe o le loto,o lea ‘ua atili ai le mata‘u pe a le malamalama le mea ‘ua ala mai ai le puapuagā.
13 O le po lenā sa latou lē mafafai ‘ona ‘alo ‘ese ai,le po na a‘e mai nai le vanu aupito loloto o seoli, sa latou taufaimomoe uma ai,
14 o tetemū i le tasi itūpō ‘ona o le fefe i foliga mata‘utia,‘ae lailoa i le tasi itūpō ‘ona o le loto vaivai; auā sa o‘otia i latou i le fefe fa‘afuase‘i sa latou lē nofo sauni i ai.
15 A pa‘ū fo‘i se tasi o i latou, ‘ua nofo ai i le ‘ele‘ele,o tāofia ai i lenā falepuipui e aunoa ma ni filifili u‘amea.
16 ‘Āfai fo‘i o se tagata faigaluega, po o se leoleo mamoe, po se tasi sa fa‘ato‘a le ‘ele‘ele,a ‘ua maua i lea mala, sa mafatia ai lava ia ma le leai se ala e sao ai.
17 Auā sa noatia i latou uma i le filifili e tasi o le pogisā.O le ta‘alili o le matagi, po o le tagi malie a manu felelei i lālā putuputu o la‘au,o le ū o vaitafe ‘ua tatafe malosi,
18 po o le pa‘ō tele o ma‘a saga ta‘avalevale; o le taufetuli o manu ‘iā latou ta‘aloga e lē āuiloa e mata,po o le leo malosi o le tagi a manu fe‘ai; o le i‘uleo ‘ua ta‘alili mai i mauga maualuluga,o mea uma ia sa lailoa ai i latou ‘ona o le fefe.
19 Auā sa suluia le lalolagi uma i le malamalama pupula,sa fasaga tagata uma ‘iā latou galuega e aunoa ma se fa‘alavelave,
20 a ‘ua na o i latou ia sa taomia i se pogisā mamafa,o le fa‘atusa lea o le pouliuli e i‘u i ai i latou;a ‘ua sili pea ‘ona mafatia i latou i o latou lava loto fuatia ifo.