1 A o oe, lo matou Atua e, ‘ua e agalelei ma le fa‘amaoni ma le ‘onosa‘i,o tausi i mea uma ma le agaalofa.
2 Auā ‘āfai ‘ua matou agasala, a o ou lava tagata i matou, matou te iloa e ou le mana uma;‘ae ‘āfai ‘ua lē agasala i matou, matou te iloa ‘ua faitauina i matou i lou ‘āiga.
3 Auā o le iloa o oe, o le amiotonu a‘ia‘i lea;o le iloa fo‘i o lau amiotonu ma lou mana, o le pogai lea o le ola e fa‘avavau.
4 ‘Ua lē fa‘asesēina i matou i togafiti leaga a tufuga popoto,po o le ata fa‘atusa ‘ua galue fua i ai le tagata,po o le fa‘atagata ‘ua so‘ona nini i lanu ‘ese‘ese.
5 O le va‘ava‘ai i mea ia e fa‘aosoina a‘i le tu‘inanau o lē ‘ua valea,‘ina ‘ua pipi‘i lona loto i le ata mate o se fa‘atusa ‘ua lē o i ai se ola.
6 O ē fiafia i le agasala, ‘ua aogā i latou ‘ona fa‘atuatua i lea itū‘āiga atua,e fa‘apea fo‘i o ē gaosi tupua, o ē naunau i ai ma ē ifo i ai.
7 O le fai ipu ‘omea ‘ua ia lolomi le ‘omea vaivai, ‘ona gaosi ai lea ma le filigā o ipu ‘ese‘ese e aogā ‘iā te i tatou;o le paluga e tasi lava na te gaosi ai ipu e ‘avea i mea mamalu,e fa‘apea ma ipu e ‘avea i mea lava e lē mamalu;a o le mea e aogā ai o ia ipu ta‘itasi, ‘ua pule ai lava le fai ipu ‘omea.
8 O lana galuega leaga ‘ua gaosi ai fo‘i ma se tupua i le ‘omea lea e tasi;‘ae le‘i leva ‘ona faia o ia a‘i le ‘ele‘ele, e toe itiiti fo‘i ‘ona fo‘i atu lea o ia i le mea na faia ai o ia,pe a toe ‘a‘amiina o le agaga ‘ua nō mai ‘iā te ia.
9 ‘Ae le to‘aga o ia i ‘ona tigā o lumana‘i, po o le pu‘upu‘u fo‘i o si ‘ona ola,‘ae fia tusa o ia ma i latou e galulue i le ario po o le auro,e fa‘ata‘ita‘i fo‘i i ē galulue i le ‘apamemea ma ‘ua manatu ifo o lona mamalu lea pe a gaosi e ia o fa‘atusa ‘ua leai se aogā.
10 O le lefulefu lona loto, o lona fa‘amoemoe o le ‘ele‘ele fa‘atauva‘a;e sili le ‘ele‘elea o lona olaga i lo le palapala.
11 Auā ‘ua na lē iloa lē na faia ai o ia, lē na ia maua mai ai le agaga ‘ua mafai ai ana galuega,lē na mānava atu ‘iā te ia le mānavaga ola.
12 ‘Ua tāofi ifo e tagata ia o lo tatou olaga o le ta‘aloga lava lea ma ‘ua tu‘uina fa‘atasi o tagata ‘ina ‘ia latou faitupe ai,ma ‘ua lelei o togafiti uma e maua ai ‘oloa, e o‘o lava i le agasala.
13 Auā ‘ua mautinoa lava o lenā tagata o ia e sili lona leaga,‘ona ‘ua gaosi o ipu ta‘egofie ‘atoa ma tupua i le ‘omea lava e tasi.
14 A ‘ua vālelea uma lava ma ‘ua lē mafa‘amatalaina o puapuagā o tagata fa‘amaualuluga ia,o fili i latou o lou nu‘u, ‘ua latou pule malosi ‘iā te ia.
15 Auā ‘ua latou tāofi ifo o ni atua o tupua uma a nu‘u ‘ese,‘ua lē mafai ‘ona fa‘aaogāina o latou mata e tepa mai ai,po o latou pogaiisu e mānanava ai, po o latou taliga e fa‘alogologo a‘i,po o latou tamatama‘ilima e galulue ai, ‘ua mumusu fo‘i o latou vae i sāvalivali.
16 Auā na faia i latou e se tagata, ‘ua gaosia e lē ‘ua nō mai i ai le mānavaga ola.E leai se tagata na te mafaia ‘ona gaosi se tupua la te tutusa.
17 Auā ‘ua ‘augavale o ia, o lea ‘ua na o mea mate e gaosia e ona lima agasala.E sili lava ia i ē ‘ua ia ifo i ai, auā e ui ‘ina ‘augavale, a ‘ua ‘iā te ia le ola; peita‘i ‘ua leai lava sina ola ‘iā te i latou na.
18 E o‘o lava i ni manu aupito ‘inosia ‘ua latou ifo i ai,o manu ‘ua sili ‘ona leaga pe a fa‘atatau i isi manu ‘ua lē o i ai se mafaufau;
19 e lē mafai fo‘i i le mata ‘ona iloa atu se itū lelei i manu ia;‘ua latou lē maua fo‘i le vi‘iga ma le fa‘amanuiaga a le Atua.