1 Diproverbia tsa Salomone.Ngwana ya hlalefileng ke thabiso ho ntatae; empa ngwana ya lewatla ke mapalesapelo ho mmae.
2 Maruo o fumanwang ka bokgopo ha a na moeno; empa ho loka ho qobisa lefu.
3 Jehova a ke ke a tlohella motho ya lokileng tlala; empa tse labalabelwang ke e mobe, o mo hlakola tsona.
4 Ya letsoho le botswa o tla fumaneha, empa letsoho la sekgothadi le tla se ruisa.
5 Ya bokellang lehlabula ke ngwana ya bohlale; empa ya robalang ha ho kotulwa, ke ngwana ya hlabisang dihlong.
6 Motho ya lokileng o rwetse mahlohonolo hloohong, empa lonya le aparetse melomo ya e mobe.
7 Ho hopolwa ha mofu ya lokileng ke lehlohonolo, empa lebitso la e mobe le tla bola.
8 Motho ya pelo e hlalefileng o utlwa keletso, empa ya beberang tsa bosawana o tla dihelwa.
9 Ya tsamayang ka ho loka o tsamaya ka kgotso; empa ya kgopamisang metsamao ya hae o a tsebahala.
10 Ya bonyang ka mahlo o a ferekanya; ya molomo o bosawana o ya timelong.
11 Molomo wa motho ya lokileng ke sediba sa bophelo; empa lonya le kwahetse molomo wa ya sa lokang.
12 Hloyo e hotetsa dikomang, empa lerato le apesa ditshito tsohle.
13 Bohlale bo fumanwa molomong wa motho ya masene, empa thupa e mokokotlong wa ya sa utlweng.
14 Ba hlalefileng ba ipokellela tsebo, empa molomo wa mawatla o fehla tshenyeho.
15 Menono ya morui ke qhobosheane ya hae, empa bomadimabe ba mafutsana ke ho fumaneha ha wona.
16 Ya lokileng o sebeletsa ho phela, empa ya sa lokang o ruela sebe.
17 Ya elellwang tayo o tshwere tsela ya bophelo, empa ya hanang nyatso o a lahleha.
18 Ya patang hloyo o na le molomo o mano, empa ya hasang disebo ke lehlanya.
19 Dipolelong tse ngata, tshito ha e hlokwe; ka baka leo, ya itshwarang molomo o bohlale.
20 Leleme la ya lokileng ke silefera e hlwekileng; empa pelo ya e mobe ke lefeelafelane.
21 Molomo wa ba lokileng o phedisa ba bangata, athe mawatla a timela ke ho hloka kelello.
22 Lehlohonolo la Jehova le entsha motho, hase mokgathala wa hae o mo ekeletsang leruo.
23 Ho lewatla ke monyaka ho etsa hampe; ho motho ya hlalefileng monyaka ke ha a etsa ka bohlale.
24 Seo e mobe a se tshabang ke sona se tlang ho mo wela hodimo; empa ba lokileng ba tla newa seo ba se ratang.
25 Jwaloka setsokotsane ha se feta, ya bolotsana o feta jwalo; empa ya lokileng o tiile ka ho sa feleng.
26 Motho ya botswa ho ba mo romang ke asene menong le mosi mahlong.
27 Ho tshaba Jehova ho atisa ditshiu, empa dilemo tsa moetsadibe di tla kgutsufatswa.
28 Tshepo ya ya lokileng e tla fetoha thabo, empa tebello ya motho ya sa lokang e tla timela.
29 Tsela ya Jehova ke qhobosheane ho ya kgabane, empa ho ba kgopo ke tshenyeho.
30 Ya lokileng a ke ke a sisinngwa le ka mohla o le mong; haele ba babe, ba ke ke ba nna ba hlola lefatsheng.
31 Molomo wa ya lokileng o hlahisa tsa bohlale, empa leleme le kgopameng le tla qhwishilwa.
32 Melomo ya ba lokileng e tseba tse kgahlisang; empa molomo wa ba sa lokang o bolela bokgopo feela.